സൂര്യപുത്രന്മാര്ക്ക് കിരീടം
ഐപിഎല്ലില് ആദ്യ കിരീടം ചൂടി സണ്റൈസേഴ്സ് ഹൈദരാബാദ്. റോയല് ചലഞ്ചേഴ്സ് ബാംഗ്ലൂരിനെ എട്ട് റണ്സുകള്ക്ക് പരാജയപ്പെടുത്തിയാണ് ഹൈദരാബാദ് ഐപിഎല്ലിലെ ആദ്യ കിരീടം ചൂടിയത്. ടോസ് നേടി ആദ്യം ബാറ്റ് ചെയ്യാനായിരുന്നു ഡേവിഡ് വാര്ണറുടെ തീരുമാനം.
സ്കോര്: സണ്റൈസേഴ്സ് ഹൈദരാബാദ്208/7, ബാംഗളൂര് റോയല് ചലഞ്ചേഴ്സ്200/7
ആദ്യം ബാറ്റുചെയ്ത സണ്റൈസേഴ്സ് നിശ്ചിത ഓവറില് ഏഴു വിക്കറ്റ് നഷ്ടത്തില് 208 റണ്സാണ് അടിച്ചുകൂട്ടിയത്. നായകന് ഡേവിഡ് വാര്ണറുടെയും യുവരാജ് സിംഗിന്റെയും ബെന് കട്ടിംഗിന്റെയും തകര്പ്പന് ബാറ്റിംഗാണ് ഹൈദരാബാദിന് മികച്ച സ്കോര് നല്കിയത്.വാര്ണറും ധവാനും ചേര്ന്ന് സണ്റൈസേഴ്സിന് 63 റണ്സിന്റെ ഓപ്പണിംഗ് കൂട്ടുകെട്ട് നല്കി.
ഹൈദരാബാദിന്റെ പ്രതീക്ഷ തെറ്റിക്കാതെ ക്യാപ്റ്റന് വാര്ണര് തന്നെ മുന്നില് നിന്നു നയിച്ചു 38 പന്തില് 69 റണ്സ്. എട്ടു ഫോറും മൂന്നു സിക്സും വാര്ണര് അടിച്ചു കൂട്ടി.ധവാനും (28), ഹെന്റിക്വെസും (നാല്) രണ്സെടുത്തു പുറത്തായി. പിന്നീടെത്തിയ യുവരാജ് നാലു ഫോറും രണ്ടു സിക്സുമായി 23 പന്തില് 38 റണ്സ് അടിച്ചെടുത്ത് ഹൈദരാബാദ് സ്കോറിങിന് വേഗത കൂട്ടി. അവസാന ഓവറുകളില് ബെന് കട്ടിങ്ങിന്റെ വക വെടിക്കെട്ട് ബാറ്റിംഗാണ് ഹൈദരാബാദിനെ 200 കടത്തിയത്. 3 ഫോറും 4 സിക്സും സഹിതം 39 റണ്സാണ് കട്ടിങ് അടിച്ചത് അതും വെറും 15 പന്തില് നിന്നും. ഇതില് വാട്സന്റെ ഒരു ഫുള്ടോസ് കട്ടിങ് സ്റ്റേഡിയത്തിന് പുറത്തേക്ക് അടിച്ചത് 117 മീറ്റര് ദൂരത്താണ് വീണത്. അവസാന മൂന്നോവറില് ഹൈദരാബാദ് അടിച്ചെടുത്തത് 52 റണ്സ്. ഡെത്ത് ഓവര് സ്പെഷലിസ്റ്റുകളായ വാട്സനും ജോര്ദാനും ചേര്ന്നാണ് ഈ അടി മൊത്തം വാങ്ങിയത്.
എന്നാല് 208 രണ്സ് ഒന്നുമല്ലെന്ന രീതിയിലായിരുന്നു ബംഗ്ലൂരിന്റെ ബാറ്റിംഗ്. ക്രിസ് ഗെയ്ല്– വിരാട് കോഹ്ലി സഖ്യം ആദ്യവിക്കറ്റില് 10.3 ഓവറില് 114 റണ്സെടുത്തപ്പോള് ഗെയ്ലിന്റെ വിക്കറ്റ് നഷ്ടമായി.എട്ടു സിക്സറും നാലു ബൗണ്ടറികളുമാണ് ഗെയിലിന്റെ ബാറ്റില് നിന്നും പറന്നത്. സ്കോര് 140ല് എത്തിനില്ക്കേ വിരാട് കോലിയും പുറത്തായി. 35 പന്തില് 54 റണ്സായിരുന്നു കോലിയുടെ സമ്പാദ്യം. അഞ്ച് ഫോറും രണ്ട് സിക്സും കോലി പറത്തി. ആറ് പന്തില് 5 റണ്സ് മാത്രമെടുത്ത് എ ബി ഡിവില്ലിയേഴ്സ് ഔട്ടായതാണ് ബാംഗ്ലൂരിന് തോല്വിയുടെ പ്രധാന കാരണമെന്നു പറയാം. അവസാന ഓവറുകളില് 10 പന്തില് 18 റണ്സുമായി മലയാല്താരം സച്ചിന് ബേബി പൊരുതി നോക്കി പക്ഷേ കളി ജയിക്കാനായില്ല. കണ്ണീരൊടെയാണ് സച്ചിന് ബേബി കളം വിട്ടത്.പതിനഞ്ചാം ഓവര് വരെ കളി ബാംഗ്ലൂരിന്റെ കയ്യിലായിരുന്നു. എന്നാല് കട്ടിങ്, മുസ്താഫിസുര്, ഭുവനേശ്വര് കുമാര് എന്നിവര് ചേര്ന്ന് കളി മനോഹരമായി എറിഞ്ഞുപിടിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
