ഇന്ത്യന്‍ ഫുട്‌ബോള്‍ ഇതിഹാസവും മുന്‍ ക്യാപ്റ്റനുമായ പി.കെ ബാനര്‍ജി അന്തരിച്ചു. ശ്വാസകോശത്തിലെ അണുബാധയെ തുടര്‍ന്ന് ഒന്നര മാസമായി ആശുപത്രിയില്‍ കഴിയുകയായിരുന്നു. വെന്റിലേറ്ററിന്റെ സഹായത്തോടെയാണ് ജീവന്‍ നിലനിര്‍ത്തിയിരുന്നത്. 1962 ഏഷ്യന്‍ ഗെയിംസില്‍ സ്വര്‍ണ്ണം നേടിയ ഇന്ത്യന്‍ ഫുട്‌ബോളിലെ അവസാന താരവും ലോകത്തോട് വിടപറഞ്ഞു. കളിക്കാരനായും പരിശീലകനായും ഇന്ത്യന്‍ ഫുട്‌ബോളില്‍ ഇതിഹാസം രചിച്ച പി കെ ബാനര്‍ജിയുടെ മരണം ഇന്ന് ആശുപത്രി അധികൃതര്‍ സ്ഥിരീകരിച്ചു. ഫെബ്രുവരി ആറിനാണ് 83-കാരനായ ബാനര്‍ജിയെ ആശുപത്രിയില്‍ പ്രവേശിപ്പിച്ചത്.

ഇന്ത്യക്ക് വേണ്ടി രണ്ട് തവണ ഒളിമ്ബിക്‌സില്‍ ബൂട്ട് അണിഞ്ഞിട്ടുണ്ട് ബാനര്‍ജി. ഇന്ത്യക്കായി 84 മത്സരങ്ങള്‍ കളിച്ച അദ്ദേഹം 64 ഗോളുകള്‍ രാജ്യത്തിനായി നേടി എന്ന് കണക്കുകള്‍ പറയുന്നു. ഫിഫ അംഗീകരിച്ച 45 മത്സരങ്ങള്‍ ഇന്ത്യക്കായി ബാനര്‍ജി കളിച്ചു. അതില്‍ 14 ഗോളുകളും അദ്ദേഹം നേടി. അര്‍ജ്ജുന അവാര്‍ഡ്, പദ്മശ്രീ പുരസ്‌കാരം, ഫിഫയുടെ പ്രത്യേക ബഹുമതി ഒക്കെ പി കെ ബനാര്‍ജിയെ തേടി എത്തിയിട്ടുണ്ട്. ഫുട്‌ബോള്‍ പരിശീലകനായും ഏറെ മികവ് തെളിയിക്കാന്‍ അദ്ദേഹത്തിനായി.
ഈസ്റ്റ് ബംഗാള്‍, മോഹം ബഗാന്‍, ടാറ്റ് ഫുട്‌ബോള്‍ അക്കാദമി എന്നിവിടങ്ങളില്‍ ഒക്കെ അമരക്കാരനായി പി കെ ബാനര്‍ജി ഉണ്ടായിരുന്നു. ഇന്ത്യന്‍ ദേശീയ ടീമിനെയും രണ്ട് തവണ പരിശീലിപ്പിച്ചിട്ടുണ്ട്. ഇന്ത്യ കണ്ട ഏറ്റവും മികച്ച പരിശീലകനായാണ് ബാനര്‍ജിയെ വിലയിരുത്തുന്നത്.