ഇന്ത്യന്‍ സൂപ്പര്‍ ലീഗില്‍ കേരള ബ്ലാസ്റ്റേഴ്സിനു നിരാശ. കഴിഞ്ഞ മത്സരത്തില്‍ സ്വന്തം തട്ടകത്തില്‍ ചെന്നൈയിന്‍ എഫ്സിയെ വീഴ്ത്തി തിരിച്ചു വന്ന കൊമ്പന്മാര്‍ക്ക് പക്ഷേ ഇന്ന് അതേ മൈതാനത്ത് തോല്‍വി നേരിടുകയായിരുന്നു.

മറുപടിയില്ലാത്ത ഒറ്റ ഗോളിന് ബ്ലാസ്റ്റേഴ്സിനെ എഫ്സി ഗോവ വീഴ്ത്തി. കളിയുടെ 40ാം മിനിറ്റില്‍ ബോറിസ് സിങ് തങ്ജമാണ് ഗോവയുടെ വിജയ ഗോള്‍ വലയിലാക്കിയത്.

ആക്രമണത്തിലും പന്തടക്കത്തിലും ആധിപത്യം പുലര്‍ത്താനായി ബ്ലാസ്റ്റേഴ്സിനായി. എന്നാല്‍ ലക്ഷ്യത്തിലേക്ക് പന്തെത്തിക്കാന്‍ ടീമിനു സാധിച്ചില്ല. തോല്‍വിയോടെ ടീം പത്താം സ്ഥാനത്തേക്ക് വീണു. ഗോവ അഞ്ചാമത്. തോല്‍വി ബ്ലാസ്റ്റേഴ്സിന്റെ നോക്കൗട്ട് സാധ്യതകളേയും ബാധിക്കും.