ബ്രസീലിന്റെ സൂപ്പര്‍താരം നെയ്മര്‍ സൗദി വിട്ട് ഇനി ബ്രസീലില്‍. നെയ്മര്‍ സൗദി അറേബ്യ ക്ലബ്ബായ അല്‍-ഹിലാല്‍ വിട്ടു. ബ്രസീലിയന്‍ ക്ലബ്ബായ സാന്റോസുമായാണ് നെയ്മര്‍ കരാറിലെത്തിയത്.

തുടര്‍ച്ചയായി പിടിപെടുന്ന പരിക്കുകള്‍ മൂലം വളരെ ചുരുങ്ങിയ മത്സരങ്ങളാണ് താരം അല്‍ ഹിലാലിന് വേണ്ടി കളിച്ചത്. ഹിലാല്‍ നെയ്മറുമായുള്ള കരാര്‍ റദ്ദാക്കുകയായിരുന്നു. നെയ്മറിന്റെ ബാല്യകാല ക്ലബ്ബാണ് സാന്റോസ്. ഇവിടെ തന്നെയാണ് താരത്തിന്റെ പ്രൊഫഷണല്‍ ഫുട്‌ബോള്‍ കരിയര്‍ ആരംഭിച്ചതും.

അതേസമയം സാന്റോസിനായി ആദ്യ ഘട്ടത്തില്‍ 225 മത്സരത്തില്‍ കളിക്കാനിറങ്ങിയ നെയ്മര്‍ 136 ഗോളടിച്ചിട്ടുണ്ട്. അക്കാദമി മുതല്‍ പത്ത് വര്‍ഷം നെയ്മര്‍ സാന്റോസിന് വേണ്ടി കളിച്ചിട്ടുണ്ട്.

ബ്രസീലിയന്‍ ക്ലബ്ബിനൊപ്പം കോപ്പ ലിബര്‍ട്ടഡോറസ്, കോപ്പ ഡോ ബ്രസീല്‍, കാമ്പിയോനാറ്റോ പോളിസ്റ്റ് എന്നീ കിരീടങ്ങള്‍ നേടാനായി നെയ്മറിന് സാധിച്ചു. സാന്റോസില്‍ നിന്നും സ്പാനിഷ് സൂപ്പര്‍ ക്ലബ്ബായ ബാഴ്‌സലോണയിലേക്കാണ് നെയ്മര്‍ ചേക്കെറിയത്, പിന്നീട് ജര്‍മന്‍ ക്ലബ്ബായ പാരിസ് സെയിന്റ്-ജെര്‍മെയിനിന് വേണ്ടിയും 32 കാരന്‍ പന്ത് തട്ടി. അതിന് ശേഷമാണ് അല്‍-ഹിലാലിലേക്കെത്തുന്നത്.

90 മില്യണ്‍ യൂറോ നല്‍കി 2023ലാണ് അല്‍ ഹിലാല്‍ നെയ്മറനെ ക്ലബ്ബിലെത്തിച്ചത്. താരത്തിന് അല്‍ ഹിലാലിനായി ഏഴ് മത്സരങ്ങള്‍ മാത്രമേ കളിക്കാനായി കഴിഞ്ഞുള്ളൂ. ഒരു ഗോള്‍ നേടുകയും മൂന്ന് അസിസ്റ്റുകള്‍ നല്‍കുകയും ചെയ്തു. തുടര്‍ന്ന് പരിക്കിന്റെ പിടിയിലായ താരം ഒരു വര്‍ഷമായി പുറത്തായിരുന്നു.