നായകന്‍ സുനില്‍ ഛേത്രി തിളങ്ങിയ മത്സരത്തില്‍ കെനിയയെ തോല്‍പ്പിച്ച് ഇന്ത്യയ്ക്ക് ഇന്റര്‍കോണ്ടിനെന്റല്‍ കിരീടം. ഇന്ത്യന്‍ കുപ്പായത്തില്‍ തന്റെ നൂറാം മത്സരവും കടന്നു പോരാട്ടം തുടരുന്ന ക്യാപ്റ്റന്‍ സുനില്‍ ഛേത്രി മുംബൈ ഫുട്‌ബോള്‍ അരീനയിലെത്തിയ ഫുട്‌ബോള്‍ പ്രേമികള്‍ക്കു സമ്മാനിച്ചത് ഒരിക്കലും മറക്കാനാകാത്ത ചരിത്ര നിമിഷങ്ങളായിരുന്നു. കെനിയയെ എതിരില്ലാത്ത രണ്ടു ഗോളുകള്‍ക്കാണ് ഇന്ത്യ തോല്‍പിച്ചത്. ഛേത്രിയുടെ കാലില്‍ നിന്നായിരുന്നു രണ്ടു ഗോളുകളും. ഇന്ത്യന്‍ ഗോളി ഗുര്‍പ്രീത് സന്ധുവിന്റെ നിര്‍ണായക സേവുകളും ടീമിന്റെ ഫൈനല്‍ നേട്ടത്തിനു ചുക്കാന്‍ പിടിച്ചു.

ഇതോടെ ദേശീയ ടീമിന് വേണ്ടി ഏറ്റവും കൂടുതല്‍ ഗോള്‍ നേടുന്ന നിലവില്‍ കളിക്കുന്ന താരങ്ങളുടെ പട്ടികയില്‍ ഇതിഹാസതാരം മെസിക്കൊപ്പമെത്തി ഛേത്രി. 64 ഗോളുകളാണ് ഇപ്പോള്‍ ഛേത്രിയുടെ അക്കൗണ്ടിലുള്ളത്. 102 മത്സരങ്ങളില്‍ നിന്നാണ് ഛേത്രിയുടെ ഗോള്‍ നേട്ടം. നായകന്റെ എല്ലാ കരുത്തും കരുതലും പ്രകടമാക്കി സ്‌റ്റേഡിയം നിറഞ്ഞുള്ള കളിയായിരുന്നു ഛേത്രി പുറത്തെടുത്തത്. മികച്ച ഫോമില്‍ കളം നിറഞ്ഞ അദ്ദേഹമാണ് കളി ഇന്ത്യയ്ക്ക് അനുകൂലമാക്കിയതും. കളി തുടങ്ങി എട്ടാം മിനിറ്റിലായിരുന്നു ആദ്യ ഗോള്‍. 29ാം മിനിറ്റില്‍ രണ്ടാം ഗോളും പിറന്നതോടെ മുംബൈ അന്ധേരിയിലെ സ്‌റ്റേഡിയം ഇന്ത്യയ്ക്കു വേണ്ടിയുള്ള ആര്‍പ്പുവിളികളില്‍ മുങ്ങി. നാല്‍പത്തിമൂന്നാം മിനിറ്റില്‍ ലഭിച്ച ഒരു ഫ്രീകിക്ക് പാഴാക്കിയില്ലായിരുന്നെങ്കില്‍ വീണ്ടും ഹാട്രിക് നേട്ടത്തിലെത്തുമായിരുന്നു ഛേത്രി. ഗാലറിയില്‍ കാണികളുടെ പിന്തുണയ്ക്കായി ഛേത്രിക്ക് നേരത്തേ അഭ്യര്‍ഥന നടത്തേണ്ടി വന്നിരുന്നെങ്കിലും ഫൈനലിന് സ്‌റ്റേഡിയം 'ഹൗസ് ഫുള്‍' ആയിരുന്നു.

മെസി 124 മത്സരങ്ങളില്‍ നിന്നാണ് ഇത്രയും ഗോള്‍ സ്‌കോര്‍ ചെയ്തത്. പോര്‍ച്ചുഗലിനു വേണ്ടി ക്രിസ്റ്റ്യാനോ റൊണാള്‍ഡോ നേടിയ 81 ഗോളുകളെന്ന റെക്കോര്‍ഡാണ് ഇനി ഛേത്രിക്കു മുന്നിലുള്ളത്. കെനിയക്കെതിരെ മികച്ച കളി പുറത്തെടുത്ത ഇന്ത്യന്‍ നായകന്‍ കളിതുടങ്ങി എട്ടാം മിനിറ്റില്‍ തന്നെ സ്‌കോര്‍ ചെയ്തു. 29ാം മിനിറ്റില്‍ രണ്ടാം ഗോളും വന്നതോടെ കളി ഇന്ത്യയുടെ വരുതിയിലായി. നേരത്തെ ടൂര്‍ണമെന്റിലെ മൂന്നു കളികളിലും ഛേത്രി സ്‌കോര്‍ ചെയ്തിരുന്നു. മൊത്തം എട്ട് ഗോളുകളാണ് ഛേത്രി ടൂര്‍ണമെന്റില്‍ തന്റെ പേരില്‍ കുറിച്ചത്. ചൈനീസ് തായ്‌പേയിക്കെതിരായ ഹാട്രിക്കും ഇതില്‍ ഉള്‍പ്പെടുന്നു.

ദേശീയ ടീമിനായി കൂടുതല്‍ ഗോള്‍ നേടിയവരുടെ പട്ടികയില്‍ 19ാം സ്ഥാനത്താണ് ഛേത്രി. കൂടുതല്‍ ഗോള്‍ നേടിയവരുടെ പട്ടികയില്‍ ക്രിസ്റ്റ്യാനോ മൂന്നാം സ്ഥാനത്തും മെസി 18ാം സ്ഥാനത്തുമാണ്. ഇറാന്റെ ഇതിഹാസതാരം അലി ദേയിയാണ് ലോകത്തെ ഏറ്റവും മികച്ച ഗോള്‍ വേട്ടക്കാരില്‍ ഒന്നാമത്.