ഒരു നിമിഷത്തെ ശ്രദ്ധയില്ലായ്മ കാരണം പോരാട്ടവീര്യത്തിന്റെ നിറരൂപമായി നിറഞ്ഞുനിന്ന ഈജിപ്തിനെ പിന്തള്ളി യുറഗ്വായ്ക്ക് വിലപ്പെട്ട മൂന്നു പോയിന്റും സ്വന്തമാക്കി. മല്‍സരം അവസാനിക്കാന്‍ രണ്ടു മിനിറ്റു മാത്രം ശേഷിക്കെ ഫ്രീക്കില്‍നിന്നെത്തിയ പന്തിന് തലവച്ച ഹോസെ ജിമെനെസിന്റെ ബുള്ളറ്റ് ഹെഡറാണ് യുറഗ്വായ്ക്ക് വിജയം സമ്മാനിച്ചത്.

കാര്‍ലോസ് സാഞ്ചസ് ഉയര്‍ത്തിവിട്ട പന്തില്‍ ഹോസെ ജിമെനെസ് തൊടുത്ത ബുള്ളറ്റ് ഹെഡര്‍ ഈജിപ്ത് ഗോള്‍കീപ്പറിന്റെ പ്രതിരോധം തകര്‍ത്ത് വലയനക്കി. സ്‌കോര്‍ 1-0. നിര്‍ണായകമായ ഈ ഗോളില്‍ യുറഗ്വായ്ക്ക് വിജയവും വിലപ്പെട്ട മൂന്നു പോയിന്റും. സൂപ്പര്‍ താരം മുഹമ്മദ് സലായുടെ അസാന്നിധ്യത്തിലും അവസാന നിമിഷം വരെ പൊരുതിനിന്ന ഈജിപ്തിന് നിരാശപ്പെടുത്തുന്ന തോല്‍വി. ഒട്ടേറെ അവസരങ്ങള്‍ പാഴാക്കിയ ലൂയി സ്വാരസും എഡിസന്‍ കവാനിയുടെ മിന്നല്‍ ഷോട്ട് അതിലും വേഗത്തില്‍ രക്ഷപ്പെടുത്തിയ ഈജിപ്ത് ഗോള്‍കീപ്പറുമാണ് മല്‍സരം ബാക്കിവയ്ക്കുന്ന മറ്റ് ഓര്‍മചിത്രങ്ങള്‍.

ലൂയി സ്വാരസും എഡിസന്‍ കവാനിയും ഉള്‍പ്പെട്ട സൂപ്പര്‍താര നിരയെ 88 മിനിറ്റോളം പിടിച്ചുകെട്ടിയിട്ട ഈജിപ്തിന് സമ്പൂര്‍ണ നിരാശ സമ്മാനിക്കുന്നതാണ് മല്‍സരഫലം. സൂപ്പര്‍താരം മുഹമ്മദ് സലായെ കൂടാതെ ഇറങ്ങിയിട്ടും മികച്ച പ്രകടനം പുറത്തെടുത്ത ഈജിപ്തിന് 88–ാം മിനിറ്റില്‍ വഴങ്ങിയ ഫ്രീകിക്കാണ് തിരിച്ചടിയായത്.