റഷ്യന് ലോകകപ്പില് സ്പെയിനും പോര്ച്ചുഗലും തമ്മിലുള്ള സൂപ്പര് പോരാട്ടം സമനിലയില് കലാശിച്ചു, ആദ്യ ഹാട്രിക്കുമായി സൂപ്പര് താരം ക്രിസ്റ്റ്യാനോ റൊണാള്ഡോ
റഷ്യന് ലോകകപ്പില് സ്പെയിനും പോര്ച്ചുഗലും തമ്മിലുള്ള സൂപ്പര് പോരാട്ടം സമനിലയില് കലാശിച്ചു. ഗ്രൂപ്പ് ബിയിലെ രണ്ടാം മത്സരത്തില് ഇരുടീമും മൂന്നു ഗോള് വീതം അടിച്ച് സമനില പാലിച്ചു. ആദ്യ ഹാട്രിക്കുമായി നിറഞ്ഞാടിയ സൂപ്പര്താരം ക്രിസ്റ്റ്യാനോ റൊണാള്ഡോയുടെ മികവിലാണ് പോര്ച്ചുഗല് പിടിച്ചുനിന്നത്. സ്പെയിനിന് വേണ്ടി ഡിഗോ കോസ്റ്റ ഇരട്ട ഗോള് നേടി. നാലാം മിനിറ്റില് ലഭിച്ച പെനല്റ്റിയില് നിന്നാണ് റൊണാള്ഡോയുടെ ആദ്യ ഗോള്. 24ാം മിനിറ്റില് കോസ്റ്റ നേടിയ ഗോളിലൂടെ സ്പെയിന് ഒപ്പമെത്തി.
എന്നാല് 44ാം മിനിറ്റില് ഗോണ്സാലോ ഗ്വിഡെസിന്റെ നീട്ടി നല്കിയ പാസ് വലയിലാക്കി റൊണാള്ഡോ ആദ്യപകുതിയില് പോര്ച്ചുഗലിനെ മുന്നില് എത്തിച്ചു. രണ്ടാം പകുതിയില് സ്പെയിന് തിരിച്ചടിക്കുന്ന കാഴ്ചയാണ് കണ്ടത്. 55ാം മിനിറ്റില് കോസ്റ്റയിലൂടെ സ്പെയിന് ഒപ്പമെത്തി. ഫ്രീകിക്കില് നിന്നായിരുന്നു ഗോളിലേക്കെത്തിയ നീക്കത്തിന്റെ തുടക്കം. മൂന്നു മിനിറ്റ് പിന്നിടുന്നതിനിടെ പോര്ച്ചുഗലിനെ ഞെട്ടിച്ച് സ്പെയിന് മുന്നിലെത്തി. 58-ാം മിനിറ്റില് നാച്ചോയാണ് സ്പാനിഷ് ടീമിന് ലീഡ് സമ്മാനിച്ചത്. അവസാന മിനിറ്റുകളില് പ്രതിരോധം തീര്ത്ത് സ്പെയിനും ആക്രമണവുമായി പോര്ച്ചുഗലും കളംനിറഞ്ഞു.
ജയപ്രതീക്ഷയുമായി മുന്നേറിയ സ്പെയിന്റെ നെഞ്ചുതകര്ത്ത് 88ാം മിനിറ്റില് റൊണാള്ഡോയുടെ ഗോളെത്തി. ബോക്സിനു വെളിയില് നിന്നും ഫ്രീകിക്ക് ഗോളിലൂടെ റൊണാള്ഡോ ഹാട്രിക് ഗോള് നേടി. ഗ്രൂപ്പ് ബിയില് മൂന്നു പോയിന്റുമായി ഇറാനാണ് മുന്നില്. സമനില പാലിച്ച പോര്ച്ചുഗലും സ്പെയിനും ഒരോ പോയിന്റുമായി തൊട്ടുപിന്നിലുണ്ട്.
"
https://www.facebook.com/Malayalivartha