63ാം മിനിട്ടില്‍ ലയണല്‍ മെസിയുടെ പെനാല്‍റ്റി കിക്ക് തടുത്തിട്ടുകൊണ്ടാണ് ഹാള്‍ഡോര്‍സണ്‍ മല്‍സരത്തിലെ ഹീറോയായത്. അര്‍ജന്റീനയുടെ വിജയം നിഷേധിച്ചത് ഐസ്‌ലന്‍ഡ് ഗോളി ഹാന്‍സ് ഹാള്‍ഡോര്‍സണ്‍തന്നെയാണ്. വിജയത്തിന് തുല്യമായ സമനില നേടിയതോടെ താരമായി മാറിയിരിക്കുകയാണ് ഐസ്‌ലന്‍ഡ് ഗോളി. 

എന്നാല്‍ മെസി കിക്കെടുക്കുന്നത് എങ്ങനെയെന്ന് താന്‍ മുന്‍കൂട്ടി മനസിലാക്കിയെന്നാണ് ഐസ്‌ലന്‍ഡ് ഗോളി വെളിപ്പെടുത്തുന്നത്. മെസി കിക്ക് എടുക്കാന്‍ തുടങ്ങിയപ്പോള്‍ തന്നെ പന്ത് തന്റെ വലതുവശത്തേക്കാണ് വരുകയെന്ന് ഉറപ്പിച്ചു. അതുകൊണ്ടുതന്നെയാണ് വലതുവശത്തേക്ക് ഡൈവ് ചെയ്ത പന്ത് തട്ടിയകറ്റാനായത്. മെസിയുടെ പെനാല്‍റ്റി നേരിടാന്‍ വളരെ മുമ്പ് തന്നെ താന്‍ തയ്യാറെടുത്തുവെന്നും അദ്ദേഹം പറയുന്നു. ഇത്തരമൊരു സന്ദര്‍ഭമുണ്ടാകുമെന്ന് നേരത്തെ തോന്നിയിരുന്നു. മെസിയുടെ പെനാല്‍റ്റികള്‍ വീഡിയോയിലൂടെ കണ്ട് അദ്ദേഹത്തിന്റെ ദൌര്‍ബല്യം വിലയിരുത്തിയിരുന്നു. 

അവസാനം മെസിയെടുത്ത പെനാല്‍റ്റികള്‍ നഷ്ടമാക്കിയതും ശ്രദ്ധയില്‍പ്പെട്ടിരുന്നു. അവസാനമെടുത്ത ഏഴ് പെനാല്‍റ്റികളില്‍ നാലെണ്ണം മെസി നഷ്ടപ്പെടുത്തി. അതുകൊണ്ടുതന്നെ മെസിയുടെ പെനാല്‍റ്റി നേരിടേണ്ടി വന്നാല്‍ അത് തടുക്കാനാകുമെന്ന ആത്മവിശ്വാസം വര്‍ദ്ധിച്ചതായും ഹാന്‍സ് ഹാള്‍ഡോര്‍സണ്‍ പറയുന്നു.