ലുക്കാക്കുവിന്റെ ഇരട്ടഗോളില്‍ ബെല്‍ജിയത്തിന് തകര്‍പ്പന്‍ ജയം; പാനമയെ തകര്‍ത്തത് എതിരില്ലാത്ത മൂന്ന് ഗോളുകള്‍ക്ക്
സോച്ചിയില്‍ നടന്ന ആവേശകരമായ മത്സരത്തില്‍ പാനമയെ എതിരില്ലാത്ത മൂന്നു ഗോളുകള്‍ക്ക് ബെല്‍ജിയം പരാജയപ്പെടുത്തി. പ്രതിഭാധാരാളിത്തം മുഖമുദ്രയാക്കിയാണ് റഷ്യയില്‍ ബല്‍ജിയം ഇന്നിറങ്ങിയത്. പനാമ താരതമ്യേന ദുര്‍ബലരായ ടീം ആയതുകൊണ്ടുതന്നെ ജയം ഉറപ്പിച്ചാണ് ബെല്‍ജിയം ഇറങ്ങിയത്. ഒഴിഞ്ഞ ഒന്നാം പകുതിക്കുശേഷം രണ്ടാം പകുതിയിലാണ് ബെല്‍ജിയം മൂന്ന് ഗോളും അടിച്ചുകയറ്റിയത്.
പല അവസരങ്ങളും ഒന്നൊന്നായി പൊലിഞ്ഞുപോയശേഷം മെര്‍ട്ടെന്‍സാണ് തന്ത്രപരമായ ഒരു ഗോളിലൂടെ ബെല്‍ജിയത്തെ ആദ്യം മുന്നിലെത്തിച്ചത്. നാല്‍പത്തിയേഴാം മിനിറ്റിലായിരുന്നു ഗോള്‍. ബോക്‌സില്‍ നിന്നു കിട്ടിയ പന്ത് ഗോളിയുടെ തലയ്ക്ക് മുകളിലൂടെ പോസ്റ്റിന്റെ മൂലയിലേയ്ക്ക് കോരിയിടുകയായിരുന്നു മെര്‍ട്ടെന്‍സ്. പിന്നീട് ലുക്കാക്കുവിന്റെ ഊഴമായിരുന്നു. ആറു മിനിറ്റിന്റെ ഇടവേളയിലായിരുന്നു ലുക്കാക്കുവിന്റെ രണ്ട് ഗോളുകളും. ആദ്യം അറുപത്തിയൊന്‍പതാം മിനിറ്റിലും രണ്ടാമത്തേത് എഴുപത്തിയഞ്ചാം മിനിറ്റിലും.
എല്ലാം കൊണ്ടും ശക്തരായിരുന്നു ബെല്‍ജിയം. കിക്കോഫ് മുതല്‍ ചെങ്കടല്‍ ഇരമ്പുകയായിരുന്നു.
വിന്‍സന്റ് കംപാനിയില്ലാതെ ഇറങ്ങിയ ബെല്‍ജിയത്തിന്റെ ഓരോ നീക്കവും പാനമയുടെ ഗോള്‍ ഏരിയയില്‍ എരിഞ്ഞടിങ്ങുകയായിരുന്നു. കിട്ടിയ അവസരങ്ങള്‍ മുതലാക്കാന്‍ എഡന്‍ ഹസാര്‍ഡിനും ലുക്കാക്കുവിനും കഴിഞ്ഞിരുന്നില്ല. പാനമയുടെ പ്രതിരോധഭടന്‍ ടോറസാണ് ഈ മുന്നേറ്റങ്ങളുടെ മുനയൊടിച്ചവരില്‍ മുമ്പന്‍. എന്നാല്‍, ഈ പിഴവുകള്‍ക്ക് ഹസാര്‍ഡും ലുക്കാക്കുവും രണ്ടാം പകുതില്‍ പ്രായശ്ചിത്തം ചെയ്തുപോലെയായിരുന്നു ആ മൂന്ന് ഗോളുകളും.
https://www.facebook.com/Malayalivartha
