ടോകിയോ ഒളിമ്പിക്​സില്‍ ഗ്ലാമര്‍ ഇനമായ ജിംനാസ്​റ്റിക്​സില്‍ മെഡലിനരികെ കളി നിര്‍ത്തി മടങ്ങിയ അമേരിക്കക്കാരിയായ കറുത്ത വംശജ സിമോണ്‍ ബൈല്‍സിനോട്​ കെറുവിച്ചും വംശവെറി കാണിച്ചും അരിശം കാണിച്ചവരേറെ. അതൊന്നുമല്ല, പറഞ്ഞ കാരണം ന്യായമാണെന്നും അതിന്​ ഇതില്‍പരം വലിയ പരിഹാരക്രിയയില്ലെന്നും ആശ്വസിപ്പിച്ചവര്‍ മറുവശത്തും​. സമീപകാലത്ത്​ ജിംനാസ്​റ്റിക്​സ്​ കണ്ട ഏറ്റവും മികച്ച താരമായിട്ടും എന്തുകൊണ്ടാകും സുവര്‍ണ നിമിഷം മുന്നില്‍ നി​ല്‍ക്കെ അവര്‍ നാട്ടിലേക്ക്​ വിമാനം കയറിയത്​?

പ്രായമേറെ ചെന്നില്ലെങ്കിലും ലോക ചാമ്ബ്യന്‍ഷിപ്പുകളിലും ഒളിമ്പിക്​സിലുമായി 30 മെഡലുകള്‍ സ്വന്തമാക്കിയിട്ടുണ്ട്​ ബൈല്‍സ്​. ഇത്തവണയും അനായാസം സ്വര്‍ണ മെഡല്‍ ഒന്നിലേറെ വാരിക്കൂട്ടുമെന്ന്​​ പ്രവചിക്കപ്പെട്ടവര്‍. യോഗ്യത പൂര്‍ത്തിയാക്കി ഫൈനലിലെത്തിയ ശേഷം പക്ഷേ, അവര്‍ പിന്മാറ്റം പ്രഖ്യാപിച്ചു. മാനസിക പിരിമുറുക്കമായിരുന്നു പ്രശ്​നം.

2016ലെ റിയാ ഒളിമ്പിക്​സില്‍ നാലു സ്വര്‍ണം മാറോടു ചേര്‍ത്ത താരം അതുംകഴിഞ്ഞ്​ രണ്ടു വര്‍ഷത്തിനു ശേഷം സമൂഹ മാധ്യമത്തില്‍ കുറിച്ച ഒരു കുറിപ്പ്​ ബൈല്‍സ്​ അനുഭവിച്ചതിന്റെ ചെറിയ ചിത്രം പങ്കുവെക്കുന്നുണ്ട്​. യു.എസ്​ ജിംനാസ്​റ്റിക്​സ്​ ടീം ഡോക്​ടര്‍ ലാറി നസര്‍ നടത്തിയ ലൈംഗിക പീഡനമായിരുന്നു പ്രധാന പരാതി. ഒരു വര്‍ഷം കഴിഞ്ഞ്​ തന്റെ സഹോദരന്‍ നടത്തിയ കുറ്റ കൃത്യമായിരുന്നു പിന്നീട്​ അവരെ വേട്ടയാടിയത്​. അതില്‍ പക്ഷേ, കോടതി സഹോദരനെ വിട്ടയച്ചത്​ ആശ്വാസമായി.

എന്നാല്‍, പിതാവ്​ ചെറുപ്പത്തിലേ വി​ട്ടേച്ചുപോകുകയും മാതാവ്​ ലഹരിക്കടിമയാകുകയും ചെയ്​ത ബാല്യം ബൈല്‍സ്​ ഓര്‍ക്കുന്നുണ്ട്​. താനും മൂന്നു ​സഹോദരങ്ങളും പലപ്പോഴും പട്ടിണി കിടന്ന നാളുകള്‍. വീട്ടിലുണ്ടായിരുന്ന പൂച്ചയുടെ വിശപ്പടക്കാന്‍ കാണിച്ച തിടുക്കം പോലും മാതാവ്​ തങ്ങളുടെ കാര്യത്തില്‍ കാണിച്ചില്ലെന്ന്​ പറയുന്നു,

താരം. അയല്‍ വാസികള്‍ പ്രശ്​നമാക്കിയതോടെ ഇവരെ പരിചരണ കേന്ദ്രത്തിലേക്ക്​ മാറ്റുകയായിരുന്നു. അതിനിടെ വല്ല്യഛനും വല്ല്യമ്മയും ഏറ്റെടുത്തതോടെ കാര്യങ്ങള്‍ മാറി. അവിടെ നിന്നായിരുന്നു ഒരു ജിംനാസ്​റ്റിന്റെ പുതിയ തുടക്കം.

പഠന കാലത്തുതന്നെ ജിംനാസ്​റ്റിക്​സ്​ തലക്കുപിടിച്ച അവര്‍ ഐമി ബോര്‍മാന്‍ എന്ന കോച്ചിനു കീഴിലേക്ക്​ മാറി. അവരായിരുന്നു 2016 റിയോ ഒളിമ്പിക്​സില്‍ യു.എസ്​ ജിംനാസ്​റ്റിക്​സ്​ ടീമിന്റെ പരിശീലക. 14ാം വയസ്സില്‍ സ്​കൂള്‍ പഠനം വീട്ടിലേക്ക്​ ചുരുക്കി മുഴുസമയ പരിശീലനത്തിലേക്ക്​ തിരിഞ്ഞു.

2013ല്‍ സീനിയര്‍ വിഭാഗത്തില്‍ യു.എസ്​ ടീമി​ല്‍ അരങ്ങേറി. വൈകാതെ ലോക വേദികളില്‍ ശ്രദ്ധിക്കപ്പെട്ടു. അതേ വര്‍ഷം യു.എസ്​ ദേശീയ ചാമ്ബ്യന്‍ഷിപ്പും ലോക ചാമ്ബ്യന്‍ഷിപ്പും ബൈല്‍സിനെ തേടിയെത്തി. അടുത്തടുത്ത വര്‍ഷങ്ങളിലും അത്​ നിലനിര്‍ത്തി.

റിയോയില്‍ വോള്‍ട്ട്​, ഫ്ലോർ, വ്യക്​തിഗത ഓള്‍റൗണ്ട്​, ടീം ഓള്‍റൗണ്ട്​ ഇനങ്ങളില്‍ സ്വര്‍ണം സ്വന്തമാക്കി. ബാലന്‍സ്​ ബീമില്‍ വെങ്കലവും. മെഡലുകളേറെ വാരിയ താരമായിരുന്നു സമാപന ചടങ്ങില്‍ അമേരിക്കന്‍ പതാക വഹിച്ചത്​. ഒളിമ്പിക്​സിനു പിറകെ ഉത്തേജക വിവാദവും പിടികൂടിയെങ്കിലും പിന്നോട്ട് പോയില്ല.

2017ല്‍ സമ്പൂര്‍ണ വിശ്രമമെടുത്ത ബൈല്‍സ്​ എന്‍റര്‍ടെയ്​ന്‍മെന്‍റ്​ രംഗത്തും സജീവമായി. ആയിടെ അമേരിക്കന്‍ കായിക ലോകത്തെ പിടിച്ചുലച്ച ലാറി നസര്‍ ലൈംഗിക പീഡന കേസില്‍ ഇരകളില്‍ താനുമുണ്ടെന്ന വെളിപ്പെടുത്തലും താരം നടത്തി. 300 വര്‍ഷമാണ്​ നസറിന്​ ജയില്‍ശിക്ഷ ലഭിച്ചത്​. 2018ല്‍ തിരിച്ചെത്തിയ അവര്‍ ഖത്തറില്‍ ലോകചാമ്ബ്യന്‍ഷിപ്പില്‍ വീണ്ടും കിരീടംതൊട്ടു. 2019ലും ആവര്‍ത്തിക്കപ്പെട്ടു- അതോടെ ജിംനാസ്​റ്റിക്​സിലെ ഏറ്റവും ആദരിക്കപ്പെട്ട വിശേഷണവും തേടിയെത്തി.

അതിനിടെ സഹോദരന്റെ വിവാദം വീണ്ടും തളര്‍ത്തിയെങ്കിലും പിടിച്ചു നിന്നു. 2021ലെ യു.എസ്​ ദേശീയ ചാമ്ബ്യന്‍ഷിപ്പില്‍ വരെ കിരീടം നിലനിര്‍ത്തിയാണ്​ ഒളിമ്പിക്​സിനെത്തിയത്​. പക്ഷേ, തുടക്കത്തിലേ അമേരിക്കന്‍ ടീം മൊത്തത്തില്‍ പതറി. ഗുരുതര തെറ്റ്​ വരുത്തി ബൈല്‍സ്​ പിഴയും വാങ്ങി. എന്നിട്ടും അവര്‍ ഫൈനലില്‍ കടന്നു. അവിടെ വെച്ചായിരുന്നു മാനസിക പിരിമുറുക്കം കാണിച്ച്‌​ തത്​കാലം പിന്മാറ്റം പ്രഖ്യാപിച്ചത്​. ടീം മാനേജ്​മെന്‍റ്​ അവര്‍ക്കൊപ്പം നില്‍ക്കുകയും ചെയ്​തു.