ലാലിഗയില്‍ ജയത്തോടെ ഒന്നാം സ്ഥാനം തിരിച്ചുപിടിച്ച് റയല്‍ മാഡ്രിഡ്. ഗ്രനഡയെ 20ത്തിനാണ് റയല്‍ കീഴടക്കിയത്. വലന്‍സിയയെ 21ന് തോല്‍പിച്ച് മണിക്കൂറുകള്‍ക്കകമാണ് ജിറോണ രണ്ടാം സ്ഥാനത്തായത്്. ഇരുടീമിനും 38 പോയന്റ് വീതമാണെങ്കിലും റയലിനേക്കാള്‍ കുറഞ്ഞ ഗോള്‍ ശരാശരിയാണ് അവര്‍ക്ക് തിരിച്ചടിയായത്. ജര്‍മന്‍ മിഡ്ഫീല്‍ഡര്‍ ടോണി ക്രൂസ് നല്‍കിയ മനോഹര പാസില്‍ ഗോള്‍ നേടി ബ്രഹിം ഡയസാണ് റയലിന് ലീഡ് സമ്മാനിച്ചത്.

ആദ്യപകുതിക്ക് പിരിയാന്‍ മൂന്ന് മിനിറ്റ് ശേഷിക്കെ ഡയസ് ബെല്ലിങ്ഹാമിന് ഗോളടിക്കാന്‍ പാകത്തില്‍ തകര്‍പ്പന്‍ പാസ് നല്‍കിയെങ്കിലും താരത്തിന് ഫിനിഷ് ചെയ്യാനായില്ല. 57ാം മിനിറ്റില്‍ ജൂഡ് ബെല്ലിങ്ഹാമിന്റെ ഷോട്ട് ഗോള്‍കീപ്പര്‍ തടഞ്ഞിട്ടപ്പോള്‍ റീബൗണ്ടില്‍ പന്ത് വലയിലേക്ക് അടിച്ചുകയറ്റി റോഡ്രിഗോ പട്ടിക പൂര്‍ത്തിയാക്കി. തുടര്‍ച്ചയായ അഞ്ചാം മത്സരത്തിലാണ് റയല്‍ ജയിക്കുന്നത്. മത്സരത്തില്‍ 71 ശതമാനവും പന്ത് നിയന്ത്രിച്ചത് റയല്‍ മാഡ്രിഡായിരുന്നു.