റിയോ 2016 ഒളിമ്പിക്‌സ് ദീപം തെളിഞ്ഞു. വിഖ്യാതമായ മാരക്കാന സ്‌റ്റേഡിയത്തില്‍ നടന്ന ഉദ്ഘാടന ചടങ്ങില്‍ ബ്രസീല്‍ കായിക ചരിത്രത്തിലെ ആദരണീയനായ താരങ്ങളില്‍ ഒരാളായ മുന്‍ മാരത്തോണ്‍ താരം വാന്‍ഡര്‍ലി ലിമയായിരുന്നു ദീപം കൊളുത്തിയത്. ദീപം കൊളുത്തുന്നത് ആരാണെന്ന സസ്‌പെന്‍സ് അവസാന നിമിഷം വരെ നില നിര്‍ത്തിയ ശേഷമായിരുന്നു വാന്‍ഡര്‍ലി എത്തിയത്.
ഫുട്‌ബോള്‍ ഇതിഹാസം പെലെയുടെയും മുന്‍ ടെന്നീസ് നമ്പര്‍ വണ്‍ താരം ഗുസ്താവോ കര്‍ട്ടന്റെയും പേരുകള്‍ ദീപം തെളിയിക്കാന്‍ കേട്ടിരുന്നെങ്കിലും ബ്രസീലിയന്‍ സാംസ്‌ക്കാരിക തനിമ വിളിച്ചോതിയാണ് ഉദ്ഘാടന ചടങ്ങില്‍ വാന്‍ഡര്‍ലിയെ ചടങ്ങിനായി നിയോഗിക്കുകയായിരുന്നു. 2004 ല്‍ കാണികളില്‍ ഒരാള്‍ തടസ്സപ്പെടുത്തിയിട്ടും വെങ്കലം നേടി രാജ്യത്തിന്റെ അഭിമാനം ഉയര്‍ത്തുകയും മത്സരം പൂര്‍ത്തിയാക്കി സ്‌പോര്‍ട്‌സ്മാന്‍ സ്പിരിറ്റും പ്രതിസന്ധികളെ അതിജീവിക്കലാണ് മാനവികതയെന്നും ലോകത്തിന് കാണിച്ചുകൊടുത്ത താരമാണ് വാന്‍ഡര്‍ലി ലിമ.
ഒളിമ്പിക് പതായ്ക്ക് കീഴില്‍ പങ്കെടുത്ത അഭയാര്‍ത്ഥി ടീമിനെ വലിയ കയ്യടി നല്‍കിയാണ് കാണികള്‍ വരവേറ്റത്. ഒളിമ്പിക്‌സില്‍ പങ്കെടുക്കുന്ന അഭയാര്‍ത്ഥി ടീമിനുള്ള ആദരമായിരുന്നു ഒളിമ്പിക് കമ്മറ്റി പ്രസിഡന്റ് തോമസ് ബാക്കിന്റെ വാക്കുകളില്‍ നിറഞ്ഞു നിന്നത്. ഒളിമ്പിക്‌സ് വില്ലേജില്‍ 10,000 കായികതാരങ്ങള്‍ രാജ്യവര്‍ണ്ണവംശീയതയ്ക്ക് അപ്പുറത്ത് ഒരുമിച്ച് ജീവിക്കുന്നത് ലോകം നിറഞ്ഞു നില്‍ക്കുന്ന കലഹങ്ങള്‍ക്ക് അപ്പുറത്ത് ഐക്യത്തിന്റെ പ്രാധാന്യത്തെ വിളിച്ചോതുന്നതാണെന്നും അദ്ദേഹം പറഞ്ഞു.
ഒളിമ്പിക്‌സിലെ പ്രത്യേക നേട്ടങ്ങളെ പരിഗണിച്ച് ആദ്യമായി അവതരിപ്പിച്ച ഒളിമ്പിക് ലൗറേല്‍ പുരസ്‌ക്കാരം രണ്ടുതവണ ഒളിമ്പിക് ചാമ്പ്യനായിരുന്നു കെനിയന്‍ താരം കിപ് കെയ്‌നോ സ്വീകരിച്ചു.