ദാരിദ്ര്യത്തില് നിന്നും സ്വര്ണകുതിപ്പ്; 'പാരലിമ്പ്യന്' മാരിയപ്പന്: ഇന്ത്യന് കായിക ചരിത്രത്തില് അടയാളപ്പെടുത്തേണ്ട പേര്
പേരിലെ തങ്കവേലുവിനെ പത്തരമാറ്റ് തങ്കമാക്കി മാറ്റിയ മാരിയപ്പന് 120 കോടി ഇന്ത്യന് ജനതയുടെ പ്രണാമം.
താങ്കള് നേടിയ സ്വര്ണ്ണത്തിന് വജ്രത്തേക്കാള് തിളക്കം. വൈകല്യങ്ങള് ഉള്ളവരെ മാറ്റി നിര്ത്തുമ്പോള് ജീവിത പ്രതിസന്ധികളുടെ മേല് ഹൈജംപ് ചാടുകയാണ് മാരിയപ്പന് ചെയ്തത്. റിയോ പാരാലിമ്പിക്സ് ഹൈജമ്പില് സ്വര്ണനേട്ടത്തോടെ ഇന്ത്യന് കായിക ചരിത്രത്തില് തന്റെ പേര് എഴുതി ചേര്ത്തിരിക്കുകയാണ് മാരിയപ്പന് തങ്കവേലു എന്ന തമിഴ്നാട്ടുകാരന്. പാരാലിമ്പിക്സ് ഹൈജമ്പില് സ്വര്ണ നേടുന്ന ആദ്യ ഇന്ത്യക്കാരന്. പാരാലിമ്പിക്സിലെ ഇന്ത്യന് ചരിത്രത്തില് സ്വര്ണം കൊയ്യുന്ന മൂന്നാമത്തെ കായിക താരം.
കരിയറിലെ ഏറ്റവും മികച്ച പ്രകടനത്തോടെ 1.89 മീറ്റര് ചാടിയായിരുന്നു ചരിത്ര സ്വര്ണത്തിലേക്കുള്ള മാരിയപ്പന്റെ കുതിപ്പ്. തമിഴ്നാട്ടിലെ സേലം ജില്ലയിലെ ഒരു ദരിദ്ര കുടംബത്തിലാണ് 22കാരനായ മാരിയപ്പന്റെ ജനനം. അമ്മ പച്ചക്കറി വില്പ്പന നടത്തുന്നു.
ഇഷ്ടിക ചുമക്കുന്ന ജോലിയായിരുന്നു ആദ്യം സരോജയ്ക്ക്. നെഞ്ചുരോഗം പിടികൂടിയപ്പോള് ആ ജോലി ഉപേക്ഷിച്ചു. പിന്നെ മകന് ആരില് നിന്നോ കടംവാങ്ങി നല്കിയ 500 രൂപ കൊണ്ട് പച്ചക്കറി വില്പ്പന ആരംഭിക്കുകയായിരുന്നുവെന്ന് സരോജ പറയുന്നു.
എവിഎസ് കോളേജ് ഓഫ് ആര്ട്സ് ആന്റ് സയന്സില് നിന്നും ബിബിഎ പൂര്ത്തിയാക്കിയിട്ടുണ്ട് മാരിയപ്പന്. അവിടത്തെ കായിക വിഭാഗം മേധാവിയാണ് മാരിയപ്പനിലെ ഹൈജമ്പറെ കണ്ടെത്തുന്നത്. കോളേജിലെ 'ഡു ഓര് ഡൈ' ക്ലബിലും മാരിയപ്പന് അംഗമായിരുന്നു. ക്ലബ് പ്രവര്ത്തനങ്ങള് മാരിയപ്പനിലെ കായിക താരത്തിന് ഏറെ പ്രചോദനമേകി.
പിന്നീട് ബെംഗളൂരില് നിന്നുള്ള സത്യ നാരായാണ മാരിയപ്പനെ രണ്ട് വര്ഷം പരിശീലിച്ചു. പതിനായിരും രൂപ സ്റ്റൈപ്പന്റും ഓഫറുണ്ടായിരുന്നു. കാലിന് ശേഷി കുറവുള്ള ആളാണ് മാരിയപ്പന്. അഞ്ച് വയസ്സുള്ളപ്പോള് സ്കൂളിനടുത്ത് വെച്ച് സര്ക്കാര് ബസ്സ് കാലിന് മുകളിലൂടെ കയറി പോയതിന്റെ അനന്തരഫലം. എന്നാല് ഉയരത്തിലേക്കുള്ള ചാട്ടത്തില് അതൊന്നും മാരിയപ്പന് തടസ്സമായില്ല. 17 വര്ഷം നീണ്ട നിയമപോരാട്ടത്തിന് ഒടുവിലാണ് മാരിയപ്പന് സര്ക്കാരില് നിന്നും രണ്ട് ലക്ഷം രൂപ നഷ്ടപരിഹാരമായി ലഭിച്ചത്. ഒരു ലക്ഷം രൂപ കേസ് നടത്താന് വാങ്ങിയ കടം വീട്ടാന് വിനിയോഗിച്ചു. ബാക്കി വന്ന ഒരു ലക്ഷം രൂപ സരോജ മാരിയപ്പന്റെ പേരില് ബാങ്കിലിട്ടിരിക്കുകയാണ്.
മാരിയപ്പന് മൂന്ന് സഹോദരന്മാരും ഒരു വിവാഹിതയായ സഹോദരിയുമുണ്ട്. കുമാറും കായിക താരമായിരുന്നു. എന്നാല് സാമ്പത്തിക പ്രയാസം കാരണം ഫിസിക്കല് എജുക്കേഷന് ബിരുദ പഠനം പാതിവഴിയില് ഉപേക്ഷിക്കേണ്ടി വന്നു. ഒരു സഹോദരന് പഠനം സ്കൂളില് അവസാനിപ്പിച്ചു. ഇളയ സഹോദരന് പന്ത്രണ്ടാം ക്ലാസില് പഠിക്കുന്നു. ആരെങ്കിലും സഹായിച്ചാല് മക്കളെ കോളേജ് പഠനത്തിന് അയക്കുമെന്ന് സരോജ പറഞ്ഞു.
ഭര്ത്താവ് കുടുംബം ഉപേക്ഷിച്ച് പോയതിനാല് ഏറെ കഷ്ടതകള് അനുഭവിച്ചാണ് സരോജ മക്കളെ വളര്ത്തി വലുതാക്കിയത്. ഏറെനാള് വാടകയ്ക്ക് വീട് നല്കാന് പോലും പലരും തയ്യാറായില്ല. 500 രൂപ മാസ വാടക നല്കി ഒരു ചെറിയ വീട്ടിലാണ് സരോജയും മക്കളും ഇപ്പോള് കഴിയുന്നത്. സ്വര്ണം നേടിയ മാരിയപ്പന് 2 കോടി പാരിതോഷികം പ്രഖ്യാപിച്ചിരിക്കുകയാണ് തമിഴ്നാട് മുഖ്യമന്ത്രി ജയലളിത. മാരിയപ്പനെ അഭിനന്ദിക്കാനും ജയലളിത മറന്നില്ല.
ചരിത്രത്തിലേക്കാണ് താങ്കളുടെ ചാട്ടം. രാജ്യത്തിന്റേയും തമിഴ്നാടിന്റേയും അഭിമാനം കാത്തു. പ്രതിബന്ധങ്ങള് മറികടന്ന് മഹത്തരമായ നേട്ടങ്ങള് വെട്ടിപിടിക്കാന് കുട്ടികള് പ്രചോദനമേകും താങ്കളുടെ പാരലിമ്പിക്സ് പ്രകടനം... മാരിയപ്പനെ അഭിനന്ദിച്ച് ജയലളിതയുടെ വാക്കുകള്.
https://www.facebook.com/Malayalivartha
