മലയാളി താരങ്ങളായ ആശ ശോഭനയും സജന സജീവനും ഇന്ത്യന്‍ വനിതാ ട്വന്റി20 ടീമില്‍. ബംഗ്ലാദേശിനെതിരെയുള്ള ട്വന്റി20 പരമ്പരയ്ക്കുള്ള ഇന്ത്യന്‍ ടീമിലാണ് ഇരുവരും ഇടംനേടിയത്.

5 മത്സരങ്ങളുടെ പരമ്പര 28 മുതല്‍ മേയ് 9 വരെയാണ്. ബംഗ്ലദേശ് പര്യടനത്തില്‍ ഇരുവര്‍ക്കും മികച്ച പ്രകടനം പുറത്തെടുക്കാനായാല്‍ ഈ വര്‍ഷം ബംഗ്ലാദേശ് വേദിയാകുന്ന വനിതാ ട്വന്റി20 ലോകകപ്പ് ടീമിലേക്കും അവസരം ലഭിച്ചേക്കാവുന്നതാണ്.

അടുത്തിടെ നടന്ന വനിതാ പ്രീമിയര്‍ ലീഗില്‍ ഇരുവരും മികച്ച പ്രകടനമാണ് കാഴ്ചവച്ചത്. തിരുവനന്തപുരം പേരൂര്‍ക്കട സ്വദേശിനിയായ ആശ ശോഭന ബാംഗ്ലൂര്‍ റോയല്‍ ചാലഞ്ചേഴ്‌സ് ടീമിലെ ലെഗ് സ്പിന്നറാണ്. വയനാട് മാനന്തവാടി സ്വദേശിനിയായ സജന സജീവന്‍ മുംബൈ ഇന്ത്യന്‍സ് ടീമിലെ ഓള്‍റൗണ്ടറാണ്. സീസണിലെ ആദ്യ മത്സരത്തില്‍ യുപി വാരിയേഴ്‌സിനെതിരെ 5 വിക്കറ്റുമായി തിളങ്ങിയ ആശ ശോഭന അതോടെ ഡല്‍ഹി ടീമിന്റെ സ്‌ട്രൈക്ക് ബോളറായി മാറി.

ബെംഗളൂരുവിന്റെ കിരീടനേട്ടത്തില്‍ ഫൈനലില്‍ ഉള്‍പ്പെടെ നിര്‍ണായക പങ്കാണ് ആശ വഹിച്ചത്. ഡബ്ല്യുപിഎലില്‍ 5 വിക്കറ്റ് നേട്ടം സ്വന്തമാക്കിയ ആദ്യ ഇന്ത്യന്‍ താരമെന്ന നേട്ടം സ്വന്തമാക്കിയ ആശ സീസണില്‍ ആകെ 10 മത്സരങ്ങളില്‍ നിന്ന് 12 വിക്കറ്റുകളുമായി വിക്കറ്റ് നേട്ടത്തില്‍ രണ്ടാം സ്ഥാനം സ്വന്തമാക്കുകയും ചെയ്തു