2023ല്‍ ടെന്നീസില്‍ നിന്ന് വിരമിച്ച സാനിയ മിര്‍സ നിലവില്‍ അവതാരകയായും കമന്റേറ്ററായും പ്രവര്‍ത്തിക്കുകയാണ്. ഇപ്പോള്‍ താരം പ്രണയത്തിലാണെന്നും രണ്ടാം വിവാഹത്തിന് തയ്യാറെടുക്കുകയുമാണെന്ന തരത്തില്‍ പുറത്തുവന്ന അഭ്യൂഹങ്ങളില്‍ വ്യക്തത വരുത്തിയിരിക്കുകയാണ്. നേഹ ധൂപിയയും അംഗദ് ബേദിയും അവതാരകരായ 'ഡബിള്‍ ഡേറ്റ്' എന്ന ടോക്ക് ഷോയില്‍ സംവിധായിക ഫറ ഖാനോടൊപ്പം പങ്കെടുത്തപ്പോഴാണ് താന്‍ നിലവില്‍ ആരുമായും പ്രണയത്തിലല്ലെന്ന് സാനിയ സ്ഥിരീകരിച്ചത്.

അടുത്തിടെ ആരെങ്കിലും കോഫി ഡേറ്റിനായി ക്ഷണിച്ചിരുന്നോ എന്ന അവതാരകരുടെ ചോദ്യത്തിന്, തന്റെ ആണ്‍സുഹൃത്തുക്കള്‍ യാത്രകള്‍ക്ക് ക്ഷണിക്കാറുണ്ടെങ്കിലും തന്നോട് ഒരു സാധാരണ സുഹൃത്തിനെപ്പോലെയാണ് പെരുമാറുന്നതെന്നും പ്രണയ താത്പര്യങ്ങളൊന്നും പ്രകടിപ്പിച്ചിട്ടില്ലെന്നും സാനിയ വെളിപ്പെടുത്തി. തുടര്‍ന്ന്, ഒരു പുരുഷനൊപ്പം മനോഹരമായ നിമിഷങ്ങള്‍ ചെലവഴിക്കാന്‍ ആഗ്രഹിക്കുന്നുണ്ടോ എന്ന് അംഗദ് ബേദി ചോദിച്ചപ്പോഴാണ്, 'എന്റെ ജീവിതത്തില്‍ ഒരു പുരുഷനുമില്ല, ഭാവിയില്‍ ഉണ്ടാകുമോ എന്നും അറിയില്ല' എന്ന് സാനിയ തുറന്നു പറഞ്ഞത്.

39കാരിയായ സാനിയ 2010ല്‍ മുന്‍ പാകിസ്താന്‍ ക്രിക്കറ്റ് ക്യാപ്റ്റന്‍ ഷുഐബ് മാലിക്കിനെയാണ് വിവാഹം കഴിച്ചിരുന്നത്. 2018ല്‍ ഇരുവര്‍ക്കും ഇസ്ഹാന്‍ എന്ന മകന്‍ ജനിച്ചു. 2024ല്‍ ഈ വിവാഹബന്ധം വേര്‍പിരിഞ്ഞതിനു ശേഷം സാനിയ സിംഗിളായി തുടരുകയാണ്. അതേസമയം, മാലിക് പാകിസ്താന്‍ നടി സന ജാവേദിനെ വിവാഹം കഴിച്ചു.