കായിക പുരസ്കാരങ്ങള് പ്രഖ്യാപിച്ചു: മനു ഭാക്കറിനും ഗുകേഷിനുമുള്പ്പെടെ നാല് പേര്ക്ക് ഖേല്രത്ന; മലയാളി നീന്തല് താരം സജന് പ്രകാശിന് അര്ജുന അവാര്ഡ്; പുരസ്കാരങ്ങള് ജനുവരി 17ന് രാഷ്ട്രപതി സമ്മാനിക്കും
കായിക പുരസ്കാരങ്ങള് പ്രഖ്യാപിച്ചു. രാജ്യത്തെ പരമോന്നത കായിക ബഹുമതിയായ ധ്യാന്ചന്ദ് ഖേല്രത്ന പുരസ്കാരത്തിന് നാലു താരങ്ങള് അര്ഹരായി. ഷൂട്ടിംഗ് താരം മനു ഭാക്കര്, ഇന്ത്യന് ഹോക്കി ക്യാപ്റ്റന് ഹര്മന് പ്രീത് സിംഗ്, ലോക ചെസ് ചാമ്പ്യന് ഡി ഗുകേഷ്, പാരാലിമ്പിക്സ് സ്വര്ണ്ണ മെഡല് ജേതാവ് പ്രവീണ്കുമാര് എന്നിവര്ക്കാണ് ഖേല്രത്ന പുരസ്ക്കാരം ലഭിച്ചത്. മലയാളി നീന്തല് താരം സജന് പ്രകാശിന് അര്ജുന അവാര്ഡ് ലഭിച്ചു. 32 പേരാണ് അര്ജുന അവാര്ഡിന് അര്ഹരായത്. പുരസ്കാരങ്ങള് ജനുവരി 17ന് രാഷ്ട്രപതി സമ്മാനിക്കും.
പാരിസ് ഒളിമ്പിക്സില് 10 മീറ്റര് എയര് പിസ്റ്റളില് വെങ്കലം നേടി മനു ഭാക്കര് ചരിത്രമെഴുതിയിരുന്നു. ഷൂട്ടിങ് വ്യക്തിഗത വിഭാഗത്തില് മെഡല് നേടുന്ന ആദ്യ ഇന്ത്യന് വനിതയെന്ന ചരിത്രമാണ് മനു ഭാക്കര് സ്വന്തമാക്കിയത്. സിംഗപ്പൂരില് നടന്ന ലോകചാമ്പ്യന്ഷിപ്പില് ചൈനീസ് ചെസ് താരം ഡിങ് ലിറെനിനെ തോല്പ്പിച്ചാണ് 18 കാരനായ ഗുകേഷ് ലോകചാമ്പ്യനായത്. ഇതോടെ ലോകചാമ്പ്യനാകുന്ന ഏറ്റവും പ്രായം കുറഞ്ഞ താരം എന്ന റെക്കോഡും ഗുകേഷിന് ലഭിച്ചു.
പാരിസ് ഒളിമ്പിക്സില് വെങ്കല മെഡല് നേടിയ ഇന്ത്യന് ഹോക്കി ടീമിനെ നയിച്ചത് ഹര്മന്പ്രീത് സിങ്ങായിരുന്നു. പാരിസ് പാരാലിംപിക്സില് ടി64 പുരുഷ ഹൈജംപില് സ്വര്ണം നേടിയ താരമാണ് പ്രവീണ് കുമാര്. സുപ്രീം കോടതി ജഡ്ജിയായിരുന്ന ജസ്റ്റിസ് വി രാമസുബ്രഹ്മണ്യന് നേതൃത്വം നല്കുന്ന 12 അംഗ സെലക്ഷന് കമ്മിറ്റിയാണ് പുരസ്കാരത്തിനായി താരങ്ങളെ ശുപാര്ശ ചെയ്തത്.
https://www.facebook.com/Malayalivartha
