ശാലീന സൗന്ദര്യവുമായി ഒരു വയനാടന് ഗ്രാമം: തൈലക്കുന്ന്
ശാലീന സൗന്ദര്യം വഴിഞ്ഞൊഴുകുന്ന വയനാടന് ഗ്രാമം. തേയിലത്തോട്ടങ്ങള്ക്കൊപ്പം, അരുവിയോട് കിന്നരിച്ച്, മലനിരകള് കണികണ്ടുണരുന്ന പ്രഭാതങ്ങള്. വൈകുന്നേരങ്ങളില് പലപ്പോഴും വിരുന്നെത്തുന്ന കോടമഞ്ഞും കൂടി ആവുമ്പോള് മാസ്മരികമായ സൗന്ദര്യം നിറയും തൈലക്കുന്നില്. വൈത്തിരിയില് നിന്ന് രണ്ട് കിലോമീറ്ററോളമേ ഉള്ളൂ ഇവിടേക്ക്.
തേയിലത്തോട്ടങ്ങള്ക്ക് ഇടയിലൂടെ ചെറിയ വഴി വളഞ്ഞും തിരിഞ്ഞും തൈലക്കുന്നിലേക്ക് എത്തുന്നു. ചെറിയൊരു അരുവിയുണ്ട്. തെളിഞ്ഞ വെള്ളം പതഞ്ഞൊഴുകുന്ന ഈ കുഞ്ഞ് കാട്ടുചോലയുടെ ഇരുവശത്ത് നിന്നും വളര്ന്നു പടര്ന്ന് പന്തലിട്ടത് പോലെ നില്ക്കുന്ന ഓട (ഈറ്റ) അരുവിയെ കാഴ്ചയില് നിന്ന് മറച്ചു വയ്ക്കും. നല്ല തണുപ്പുള്ള വെള്ളത്തില് ചവിട്ടി തോട്ടിലൂടെ നടക്കാം. കുഞ്ഞ് മല്സ്യങ്ങള് ഇടക്കിടെ അതിവേഗം നീന്തി നീങ്ങുന്നത് കാണാം. തോട്ടില് ഇരപിടിക്കാനെത്തുന്ന നാടന് പക്ഷികളും ധാരാളം.
തൈലക്കുന്നിന്റെ തൊട്ടടുത്ത് തേയിലക്കുന്നുകളാണ്. നിരന്നു നില്ക്കുന്ന പച്ചക്കുന്നുകള്ക്കപ്പുറം ചെമ്പ്ര കാണാം. ചെമ്പ്രയിലെ പച്ചപ്പുല്മേടുകളില് സൂര്യന്റെ കിരണങ്ങളേറ്റ് തിളങ്ങുന്നത് കാണാം. അവിടവിടെയായി ഉറവ പൊട്ടിയൊലിച്ചിറങ്ങുന്ന ചെമ്പ്രയിലെ കാട്ടുചോലകള് വെയിലേറ്റ് വെള്ളിയരഞ്ഞാണം പോലെ തോന്നും. മറു ദിശയിലേക്കും ഏറെ ദൂരം വരെ കാഴ്ചയെത്തും. പരന്ന് കിടക്കുന്ന വയലുകളും, തേയിലത്തോട്ടങ്ങളും, മലകളും ഒക്കെ ദൃശ്യപ്പൊലിമയേറ്റുന്നു.
https://www.facebook.com/Malayalivartha