മീന മാസ പൂജകള്‍ക്കായി ശബരിമല നട തുറന്നു. വൈകുന്നേരം 5ന് തന്ത്രി കണ്ടരര് ബ്രഹ്മദത്തന്റെ സാന്നിധ്യത്തില്‍ മേല്‍ശാന്തി അരുണ്‍കുമാര്‍ നമ്പൂതിരി നട തുറന്ന് ദീപം തെളിയിച്ചു .

തുടര്‍ന്ന് പതിനെട്ടാം പടിക്ക് താഴെ ആഴിയില്‍ അഗ്നി പകര്‍ന്നു. പതിനെട്ടാം പടി കയറി എത്തുന്ന ഭക്തര്‍ക്ക് ഫ്ളൈഓവര്‍ കയറാതെ നേരിട്ട് കൊടിമര ചുവട്ടില്‍ നിന്ന് ശ്രീകോവിലിന് മുന്നിലെത്തി ദര്‍ശനം നടത്തുന്നതിന്റെ ട്രയലും തുടങ്ങി.

നടതുറക്കുന്നതിന് മുന്‍പ് തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് പി.എസ്. പ്രശാന്ത്, അംഗം അഡ്വ. എ. അജികുമാര്‍ എന്നിവര്‍ പുതിയ സംവിധാനവുമായി ബന്ധപ്പെട്ട് മുന്നൊരുക്കങ്ങള്‍ വിലയിരുത്തുകയും ചെയ്തു.

മീന മാസം 1 ന് രാവിലെ 5 മണിക്ക് നട തുറക്കും. മീനമാസ പൂജകള്‍ പൂര്‍ത്തിയാക്കി മാര്‍ച്ച് 19 ന് രാത്രി10 മണിയ്ക്ക് നട അടയ്ക്കും.ഫ്‌ലൈഓവര്‍ വഴിയുള്ള ദര്‍ശന സംവിധാനത്തില്‍ 2 മുതല്‍ 5 സെക്കന്‍ഡ് വരെയാണ് ഭക്തന് ദര്‍ശനം ലഭിച്ചിരുന്നെങ്കില്‍ പുതിയ സംവിധാനം നിലവില്‍ വരുന്നതോടെ 20 മുതല്‍ 30 സെക്കന്‍ഡ് അയ്യപ്പനെ ദര്‍ശിക്കാനുള്ള സൗകര്യമുണ്ടെന്ന് ദേവസ്വം ബോര്‍ഡ് .

പുതിയ സംവിധാനം ഒരുക്കുന്നതിനായി പുതിയ പ്ലാറ്റ്‌ഫോമുകളും ഭക്തരെ രണ്ടു വരിയില്‍ വേര്‍തിരിക്കുന്നതിന് ബാരിക്കേഡും ഒരുക്കിയിട്ടുണ്ട്. അയ്യപ്പഭക്തരെ ശ്രീ കോവിലിന് മുന്നിലേക്ക് പ്രവേശിപ്പിക്കുന്നത് കൊടിമരച്ചോട്ടില്‍ നിന്നും രണ്ട് വരികളിലായിട്ടാണ് .