ഇന്ത്യയെ സംബന്ധിച്ചിടത്തോളം കഴിഞ്ഞ ഇരുപത് വര്‍ഷത്തിനിടയ്ക്ക് ഏറ്റവും ഉയര്‍ന്ന തൊഴിലില്ലായ്മ ദൃശ്യമാകുന്ന വര്‍ഷമാണ് ഇപ്പോള്‍ കടന്നുപോകുന്നത്. തൊഴിലില്ലായ്മ രാജ്യത്ത് ഏറ്റവും വലിയ സാമൂഹിക പ്രശ്‌നമായി വളരുകയാണ്. ഇത് നയ രൂപീകരണം നടത്തുന്നവര്‍ക്ക് വളരെ അധികം പ്രതിസന്ധി സ്യഷ്ടിക്കുന്നുണ്ട്. കഴിഞ്ഞ ഇരുപത് വര്‍ഷത്തിനിടയ്ക്ക് രാജ്യത്തെ തൊഴിലില്ലായ്മ ഏറ്റവും രൂക്ഷമായ വര്‍ഷമാണ് ഇപ്പോള്‍ കടന്നുപോകുന്നത്. രാജ്യത്തിന്റെ ജിഡിപി വളര്‍ച്ചയും തൊഴില്‍ സൃഷ്ടിയും തമ്മിലുളള ബന്ധം നാള്‍ക്ക് നാള്‍ മോശമാവുകയാണ്. 

തൊഴിലില്ലായ്മയ്‌ക്കൊപ്പം രാജ്യത്തെ ഏറ്റവും ഞെട്ടിപ്പിക്കുന്ന വസ്തുത കുറഞ്ഞ ശമ്പളത്തില്‍ വലിയ ശതമാനം തൊഴിലാളികള്‍ക്കും ജീവനക്കാര്‍ക്കും തൊഴിലെടുക്കേണ്ടി വരുന്നതാണ്. തൊഴിലുളള 82 ശതമാനം പുരുഷന്മാരും 92 ശതമാനം സ്ത്രീകളും തൊഴിലെടുക്കുന്നത് 10,000 രൂപയില്‍ താഴെ മാത്രം മാസ ശമ്പളം വാങ്ങിയാണ്. ഇതിനാല്‍ തന്നെ കൂടുതല്‍ പ്രതിസന്ധിയിലാവുന്നത് സ്ത്രീ ജീവനക്കാരാണ്. ഏഴാം ശമ്പളക്കമ്മീഷന്‍ രാജ്യത്ത് കുറഞ്ഞ ശമ്പളം മാസം 18,000 രൂപയെന്ന് റിപ്പോര്‍ട്ട് നല്‍കിയ സമയത്താണ് ഈ ഞെട്ടിപ്പിക്കുന്ന കുറവ്. ഇതാണ് സര്‍ക്കാര്‍ ജോലിയോട് സമൂഹത്തിന് താല്‍പര്യം കൂടാന്‍ കാരണം.

ഉന്നത വിദ്യാഭ്യാസം നേടിയ 16 ശതമാനം യുവാക്കള്‍ക്കും രാജ്യത്ത് തൊഴിലില്ല. രാജ്യത്തിന്റെ എല്ലാ പ്രദേശത്തും തൊഴിലില്ലായ്മയും ശമ്പളക്കുറവും പ്രതിസന്ധിയിലാണങ്കിലും ഉത്തരേന്ത്യന്‍ സംസ്ഥാനങ്ങളിലാണ് തൊഴിലില്ലായ്മ രൂക്ഷമായിട്ടുള്ളത്.