സ്മാര്‍ട് ഫോണ്‍ ക്യാമറകളുടെ വരവോടെ ബഹുഭൂരിപക്ഷം ഉപയോക്താക്കള്‍ക്കും പരമ്പരാഗത ക്യാമറയോടുള്ള താല്പര്യം കുറഞ്ഞു. ഭാരിച്ച മറ്റൊരുപകരണം ചുമക്കുക എന്നത് വലിയൊരു ശതമാനം ആളുകള്‍ക്കും വേണ്ടാത്ത കാര്യമാണ്. അത് ക്യാമറ വില്‍പനയില്‍ വ്യക്തമായി പ്രതിഫലിച്ചു കഴിഞ്ഞു. സ്മാര്‍ട്ട് ഫോണുകളുടെ വരവോടെ കാല്‍ക്യുലേറ്ററുകള്‍, വോയ്‌സ് റെക്കോര്‍ഡറുകള്‍, മ്യൂസിക്‌വിഡിയോ പ്ലെയറുകള്‍ തുടങ്ങി ഒരുപറ്റം ഉപകരണങ്ങളുടെ പ്രസക്തി ഇല്ലാതായി. 

കഴിഞ്ഞ വര്‍ഷം ലോകത്ത് ഏകദേശം 1.3 ട്രില്ല്യന്‍ ഫോട്ടോകള്‍ എടുക്കപ്പെട്ടെങ്കിലും ഇവയില്‍ സിംഹഭാഗവും സ്മാര്‍ട് ഫോണുകളിലാണ് എടുത്തത്. ഇത് 2013ല്‍ 660 ബില്ല്യന്‍ ആയിരുന്നു. സ്മാര്‍ട് ഫോണുകള്‍ ക്യാമറ നിര്‍മ്മാതാക്കള്‍ക്ക് ശരിക്കും ഭീഷണിയാകുകയാണെന്നാണ് പുതിയ കണക്കുകള്‍ പറയുന്നത്.

പ്രമുഖ ക്യാമറ നിര്‍മ്മാതാവായ നിക്കോണ്‍ അവരുടെ ചൈനയിലെ ഫാക്ടറിക്ക് കഴിഞ്ഞവര്‍ഷം തന്നെ ഉത്പാദനം നിറുത്തിയിരുന്നു. ബ്രസീലില്‍ നിന്നും അവരുടെ ഔദ്യോഗിക വില്‍പ്പനക്കാരെ നിക്കോണ്‍ പിന്‍വലിച്ചു കഴിഞ്ഞു. ക്യാമറ കമ്പനികള്‍ക്ക് പിടിച്ചു നില്‍ക്കണമെങ്കില്‍ പുതിയ തന്ത്രങ്ങള്‍ മെനയണമെന്നാണ് ഇത് കാണിക്കുന്നത്. 

സ്മാര്‍ട് ഫോണുകളില്‍ കഴിഞ്ഞ പത്തു വര്‍ഷത്തിനിടെ ഫോട്ടോഗ്രഫിയില്‍ കൊണ്ടുവന്ന മാറ്റങ്ങളാണ് അദ്ഭുതകരം. ഗൂഗിള്‍, ആപ്പിള്‍, വാവെയ്, സാംസങ് എന്നീ കമ്പനികള്‍ പ്രത്യേകിച്ചും ഫോണ്‍ ക്യാമറയെ മറ്റൊരു തലത്തിലേക്ക് ഉയര്‍ത്തി. 

പരമ്പരാഗത ഫൊട്ടോഗ്രഫിയില്‍ ഹാര്‍ഡ്‌വെയറിനാണ് പ്രാധാന്യം. കംപ്യൂട്ടേഷണല്‍ ഫൊട്ടോഗ്രഫിയാകട്ടെ സോഫ്റ്റ്‌വെയര്‍ തന്ത്രങ്ങളാണ് ഫോട്ടോ മികവുള്ളതാക്കുന്നത്.

ജപ്പാന്‍ കേന്ദ്രീകൃതമായി പ്രവര്‍ത്തിക്കുന്ന ക്യാമറ ഇമേജിങ് പ്രൊഡക്ട്‌സ് അസോസിയേഷന്റെ കണക്കു പ്രകാരം 2012ല്‍ ഏകദേശം 100 മില്ല്യന്‍ ക്യാമറകളാണ് വിപണിയിലെത്തിയതെങ്കില്‍ 2017ല്‍ അത് 25 മില്ല്യന്‍ ആയി ഇടിഞ്ഞു. കൂടാതെ, അത് വീണ്ടും മൂക്കുകുത്തി വീഴുമെന്നും ഗവേഷകര്‍ പറയുന്നു.