വരുമാനം ലക്ഷ്യമിട്ട് ബാറുകളിലും ബാര്‍ ലൈസന്‍സുള്ള ക്ലബ്ബുകളിലും പരിധിയില്ലാതെ മദ്യ കൗണ്ടറുകള്‍ ആരംഭിക്കാന്‍ സര്‍ക്കാര്‍ നിര്‍ദ്ദേശത്തോടെ എക്‌സൈസ് വകുപ്പിന്റെ അനുമതി. ബാറുകള്‍ക്ക് കൂടുതല്‍ കൗണ്ടറുകള്‍ അനുവദിക്കാന്‍ വിദേശമദ്യചട്ടങ്ങളിലെ ചട്ടം 13 ഉപവകുപ്പ് (3 ഡി) ആണ് ഭേദഗതി ചെയ്തത്. എക്‌സൈസ് അധികൃതരില്‍ നിന്നും മുന്‍കൂര്‍ അനുമതി വാങ്ങി 'സര്‍വീസ് ഡെസ്‌കുകള്‍' വഴി പരിമിതമായ അളവില്‍ മദ്യം വിതരണം ചെയ്യാന്‍ ബാറുകള്‍ക്ക് നേരത്തേ അനുമതി നല്‍കിയിരുന്നു. എന്നാല്‍ ചട്ടങ്ങള്‍ പാലിക്കാതെ ബാറിന്റെ നീന്തല്‍കുളത്തിനരികിലും മേല്‍ക്കൂരയിലുമെല്ലാം സര്‍വീസ് ഡെസ്‌കുകള്‍ സ്ഥാപിക്കപ്പെട്ടു. ഇതിനെതിരെ ആക്ഷേപം ഉയരുകയും എക്‌സൈസ് കേസെടുക്കുകയും ചെയ്തിരുന്നു. ഇതിനെത്തുടര്‍ന്നാണ് 25,000 രൂപ വാര്‍ഷിക ഫീസ് നല്‍കിയാല്‍ ബാര്‍ ഹാളിനു പുറത്ത് അധിക കൗണ്ടറുകള്‍ ആരംഭിക്കാന്‍ സര്‍ക്കാര്‍ അനുമതി നല്‍കിയത്. 

ബാറുകളില്‍ അനുവദനീയമായ ഒരു കൗണ്ടറിന് പുറമേ അധികമായി തുടങ്ങുന്ന ഓരോ കൗണ്ടറിനും 25,000 രൂപയും, ക്ലബ്ബുകളില്‍ അധികമായി തുടങ്ങുന്ന ഓരോ കൗണ്ടറിനും 50,000 രൂപവരെയുമാണ് വാര്‍ഷിക ഫീസ്. ക്ലബ്ബുകളില്‍, ക്ലബ്ബ് റൂമിനു പുറത്തുള്ള സ്ഥലങ്ങളില്‍ കൗണ്ടറുകള്‍ ആരംഭിക്കുന്നതിന് 30,000 രൂപയാണ് വാര്‍ഷിക ഫീസ്. മേല്‍ക്കൂര, നീന്തല്‍കുളത്തിന്റെ പരിസരം തുടങ്ങിയ സ്ഥലങ്ങളില്‍ കൗണ്ടര്‍ സ്ഥാപിക്കുന്നതിന് 50,000രൂപ വാര്‍ഷിക ഫീസായി നല്‍കണം. ബാങ്കറ്റ് ഹാള്‍, ബോര്‍ഡ് റൂം, റിക്രിയേഷന്‍ ഹാള്‍ എന്നിവിടങ്ങളില്‍ മദ്യം വിളമ്പുന്നതിന് 50,000രൂപയാണ് വാര്‍ഷിക ഫീസ്. 

ബാറുകള്‍ക്കും ക്ലബ്ബുകള്‍ക്കും ആവശ്യാനുസരണം എത്ര കൗണ്ടറുകള്‍ വേണമെങ്കിലും ആരംഭിക്കാം. ബാറുകള്‍ക്ക് കൂടുതല്‍ കൗണ്ടറുകള്‍ തുടങ്ങാനുള്ള ഉത്തരവ് ഈ മാസം 13നാണ് പുറത്തിറക്കിയത്. ക്ലബ്ബുകളെ സംബന്ധിച്ച ഉത്തരവ് ഉടന്‍ പുറത്തിറങ്ങും. കൂടുതല്‍ കൗണ്ടറുകള്‍ ആരംഭിക്കാന്‍ അനുവദിക്കണമെന്ന് ഏറെ നാളായി ബാറുടമകള്‍ ആവശ്യപ്പെട്ട് വരികയായിരുന്നു. 

സംസ്ഥാനത്ത് നിലവില്‍ 432 ബാറുകളും 466 ബിയര്‍ വൈന്‍ പാര്‍ലറുകളുമാണ് പ്രവര്‍ത്തിക്കുന്നത്. 33ക്ലബ്ബുകള്‍ക്ക് ബാര്‍ ലൈസന്‍സുണ്ട്. 28 ലക്ഷം രൂപയാണ് ബാറുകളുടെ വാര്‍ഷിക ലൈസന്‍സ് ഫീസ്. ക്ലബ്ബുകളുടേത് 15 ലക്ഷം രൂപയാണ്. കൂടുതല്‍ കൗണ്ടറുകള്‍ ആരംഭിക്കാന്‍ സര്‍ക്കാര്‍ ആനുവദിച്ചതോടെ മദ്യ ഉപയോഗം കുത്തനെ ഉയരും.