ക്രെഡിറ്റ് റേറ്റിംഗ് ഏജന്‍സിയായ മൂഡീസ് ഇന്‍വസ്‌റ്റേഴ്‌സ് സര്‍വീസിന്റെ റിപ്പോര്‍ട്ട് പ്രകാരമാണ് 2018ല്‍ ലോകത്തിലെ ഏറ്റവും ലാഭകരമായ കമ്പനിയായി സൗദി ആരാംകോയെ തിരഞ്ഞെടുത്തത്. സൗദിയിലെ എണ്ണ ഭീമനായ അരാംകോ ആപ്പിളിനെ പോലും കടത്തിവെട്ടിയാണ് ലോകത്ത് ഒന്നാം സ്ഥാനത്തെത്തിയത്. എണ്ണ, വാതക മേഖലകളില്‍നിന്ന് വരുമാനം കൂടുതല്‍ നേടാനുള്ള നടപടികള്‍ സ്വീകരിച്ചതാണ് കമ്പനിയെ വരുമാനത്തില്‍ ഒന്നാമതെത്തിച്ചത്. ലോകത്തിലെ ഏറ്റവും വലിയ എണ്ണപ്പാടങ്ങളില്‍ പലതും ആരാംകോയുടെ ഉടമസ്ഥതയിലാണ്. അരാംകോയുടെ ഷെയറുകള്‍ ഓഹരി വിപണയില്‍ വില്‍ക്കാനുള്ള തയ്യാറെടുപ്പിനിടയിലാണ് തങ്ങളുടെ സമ്പത്ത് വെളിപ്പെടുത്താന്‍ കമ്പനി തയ്യാറായത്. 

സൗദിയിലെ പ്രമുഖ പെട്രോകെമിക്കല്‍ കമ്പനിയായ സാബിക്കിന്റെ 70 ശതമാനം ഓഹരികള്‍ വാങ്ങുന്നതിന് മുന്നോടിയായിട്ടായിരുന്നു നടപടി. സാബിക്കിന്റെ 69.1 ബില്യന്‍ ഡോളറിന്റെ ഓഹരികളാണ് അരാംകോ വാങ്ങുന്നത്. രാജ്യത്തെ സാമ്പത്തിക രംഗത്തിന്റെ വൈവിധ്യവല്‍ക്കരണം ലക്ഷ്യമിട്ട് സൗദി രാജകുമാരന്‍ മുഹമ്മദ് ബിന്‍ സല്‍മാന്‍ നടത്തുന്ന മെഗാപദ്ധതിയുടെ ഭാഗമായാണിത്.

അരാംകോയുടെ വരവോടെ ലോകത്തിലെ ഏറ്റവും ലാഭകരമായ കമ്പനിയെന്ന പേര് യുഎസ് ടെക്‌നോളജി ഭീമനായ ആപ്പിളിന് നഷ്ടമായി. ആപ്പിളിന്റെ കഴിഞ്ഞ വര്‍ഷത്തെ അറ്റാദായം 50 ബില്യന്‍ ഡോളറായിരുന്നു. കടബാധ്യതകള്‍ കുറവാണെന്നതാണ് സൗദി അരാംകോയുടെ പ്രധാന സവിശേഷതകളില്‍ ഒന്നെന്ന് ഫിച്ച് റേറ്റിംഗ്‌സ് പറഞ്ഞു. എന്നാല്‍ അരാംകോയ്ക്ക് ഫിച്ച് നല്‍കിയത് എ ക്രെഡിറ്റ് റേറ്റിംഗും മൂഡീസ് നല്‍കിയത് എ1 റേറ്റിംഗുമാണ്. കമ്പനിയുടെ വരുമാനത്തിലേറെയും സൗദി സര്‍ക്കാരാണ് കൊണ്ടുപോവുന്നു എന്നതാണ് കാരണം.

ആപ്പിള്‍ (5,950 കോടി ഡോളര്‍), ആല്‍ഫബെറ്റ് (3,70 കോടി ഡോളര്‍) എന്നിവയാണ് തൊട്ടു പിന്നില്‍. മറ്റ് എണ്ണക്കമ്പനികളില്‍ റോയല്‍ ഡച്ച് ഷെല്‍ 2,390 കോടി ഡോളറും എക്‌സോണ്‍ മൊബൈല്‍സ് 2,080 കോടി #ോളറും നേടി.