1969ല്‍ ഐ.എസ്.ആര്‍.ഒ. സ്ഥാപിതമായതിന് ശേഷം മറ്റ് രാഷ്ട്രങ്ങളെ വെല്ലുന്ന തരത്തിലുള്ള ദൗത്യങ്ങളാണ് ഐ.എസ്.ആര്‍.ഒ വിജയിപ്പിച്ചിട്ടുള്ളത്. ചന്ദ്രയാന്റെ ആദ്യ വിജയത്തിന് ശേഷമാണ് ലോകരാഷ്ട്രങ്ങള്‍ ബഹിരാകാശ മേഖലയില്‍ ഇന്ത്യയെ ശ്രദ്ധിക്കാന്‍ തുടങ്ങിയത്. മറ്റ് വികസിത രാഷ്ട്രങ്ങളില്‍ നിന്ന് വ്യത്യസ്തമായി ഏറ്റവും ചെലവ് കുറഞ്ഞ രീതിയില്‍ ബഹിരാകാശ ദൗത്യങ്ങള്‍ ഏറ്റെടുത്ത് വിജയിപ്പിച്ച അഭിമാനസ്ഥാപനമാണ് ഇന്ത്യയുടെ ഐ.എസ്.ആര്‍.ഒ. നാസ വളരെ സൂഷ്മതയോടെയാണ് ഐ.എസ്.ആര്‍.ഒയുടെ പ്രവര്‍ത്തനങ്ങള്‍ വിലയിരുന്നുന്നത്. 

ഏറ്റവും ഒടുവിലായി നാസ കാത്തിരിക്കുന്നത് ചന്ദ്രയാന്‍ 2 വിന്റെ വിക്ഷേപണമാണ്. ചന്ദ്രയാന്‍ 1 ന്റെ തുടര്‍ച്ചയാണ് ചന്ദ്രയാന്‍ 2ല്‍ രാജ്യം ലക്ഷ്യമിടുന്നത്. രണ്ടാമത്തെ ചാന്ദ്ര ദൗത്യം ജൂലായ് 9 നും 16 നും ഇടയില്‍ നടക്കുമെന്നാണ് ഐ.എസ്.ആര്‍.ഒ അറിയിച്ചിരിക്കുന്നത്. 800 കോടി രൂപ ചെലവിലാണ് ചാന്ദ്രയാന്‍ 2 ഒരുങ്ങുന്നത്. 200 കോടി വിക്ഷേപണത്തിനും 600 കോടി ഉപഗ്രഹത്തിനും വേണ്ടിമാണ് ചെലവാക്കുന്നത്. ഒരു ഹോളിവുഡ് ചിത്രത്തിത്തേക്കാള്‍ ചെലവ് കുറവാണെന്ന് പ്രത്യേകതയും ഈ ദൗത്യത്തിനുണ്ട്. സെപ്തംബര്‍ ആറിന് ചന്ദ്രയാന്‍ 2 ചന്ദ്രനില്‍ ഇറങ്ങുമെന്നാണ് വിലയിരുത്തുന്നത്. ജി എസ് എല്‍ വി ശ്രേണിയിലെ ഏറ്റവും വികസിത റോക്കറ്റായ മാര്‍ക് ത്രീയാണ് ചന്ദ്രയാന്‍ വഹിക്കുന്നത്. നാലായിരം കിലോയിലധികം ഭാരവാഹകശേഷിയുള്ള റോക്കറ്റ് ഐ.എസ്.ആര്‍.ഒയുടെ 'ഫാറ്റ്‌ബോയ്' എന്നാണ് അറിയപ്പെടുന്നത്.

ചന്ദ്രനെ ഭ്രമണം ചെയ്യുന്ന ഓര്‍ബിറ്റര്‍, ചന്ദ്രോപരിതലത്തിലേക്ക് ഇറങ്ങുന്ന ലാന്‍ഡര്‍ എന്നിവയ്‌ക്കൊപ്പം പര്യവേഷണം നടത്തുന്ന റോവര്‍ കൂടി ഉള്‍പ്പെടുന്നതാണു ചന്ദ്രയാന്‍ 2. ഐ.എസ്.ആര്‍.ഒ ഇതുവരെ നടത്തിയിട്ടുള്ളതില്‍ വച്ച് ഏറ്റവും സങ്കീര്‍ണമെന്ന് വിശേഷിപ്പിക്കപ്പെടുന്ന ദൗത്യത്തിന്റെ ആകെ ഭാരം 3290 കിലോ ആണ്. ചന്ദ്രനില്‍ വെള്ളം, ടൈറ്റാനിയം, കാല്‍സ്യം, മഗ്‌നീഷ്യം, അലുമിനിയം, ഇരുമ്പ് എന്നീ ലോഹങ്ങളുടെ സാന്നിധ്യം, ചന്ദ്രന്‍ ഒരുകാലത്തു പൂര്‍ണമായും ഉരുകിയ അവസ്ഥയിലായിരുന്നു എന്നുള്ള മാഗ്മ ഓഷന്‍ ഹൈപ്പോത്തിസിസിന്റെ സ്ഥിരീകരണം എന്നിവയെല്ലാം ചന്ദ്രയാന്‍ 1 ദൗത്യത്തിന്റെ നിര്‍ണായക സംഭാവനകളായിരുന്നു. ഇതിന്റെ തുടര്‍ച്ചയാണ് ചന്ദ്രയാന്‍2