259 വര്‍ഷത്തെ പ്രവര്‍ത്തന പാരമ്പര്യമുള്ള ബ്രിട്ടീഷ് കളിപ്പാട്ട നിര്‍മ്മാണക്കമ്പനിയായ ഹാംലീസ് റിലയന്‍സ് ഗ്രൂപ്പ് സ്വന്തമാക്കി. ഇതിന്റെ ഭാഗമായി ഹോങ്കോംഗ് ലിസ്റ്റഡ് കമ്പനിയായ സി ബാനര്‍ ഇന്റര്‍നാഷണല്‍ ഹോള്‍ഡിംഗ്‌സുമായി റിലയന്‍സ് കരാറൊപ്പിട്ടു. മുകേഷ് അംബാനിയുടെ റിലയന്‍സ് ബ്രാന്‍ഡ്‌സ് ലിമിറ്റഡ് 620 കോടി രൂപയ്ക്കാണ് ഹാംലീസിനെ സ്വന്തമാക്കിയത്. കഴിഞ്ഞ കുറേ വര്‍ഷങ്ങളായി ഹാംലീസ് ബ്രാന്‍ഡിന്റെ കളിപ്പാട്ടങ്ങള്‍ റിലയന്‍സ് ഇന്ത്യയില്‍ ലാഭകരമായി വിറ്റഴിക്കുന്നുണ്ട്. 

ലോകത്തിലെതന്നെ ഏറ്റവും പഴയ കളിപ്പാട്ട നിര്‍മ്മാണക്കമ്പനിയായ ഹാംലീസിന് ഇന്ത്യയില്‍ 29 സിറ്റികളിലായി 88 സ്‌റ്റോറുകളുണ്ട്. ഈ സ്‌റ്റോറുകള്‍ റിലയന്‍സ് ഗ്രൂപ്പാണ് കൈകാര്യം ചെയ്യുന്നത്. കേരളത്തില്‍ ഹാംലീസിന്റെ സ്‌റ്റോര്‍ ലുലു മാളിലാണ് പ്രവര്‍ത്തിക്കുന്നത്. ലണ്ടനിലെ റീജെന്റ് ട്രീറ്റിലായിരുന്നു ഹാംലീസിന്റെ ആദ്യ സ്‌റ്റോര്‍ തുറന്നത്. 2015 മുതല്‍ ചൈനയുടെ സിബാനറാണ് ഹാംലീസിന്റെ ഉടമ. ബര്‍ബെറി, കനാലി, പോള്‍ സ്മിത്ത്, അര്‍മാനി, ജസ്റ്റ് കവാലി, ജിമ്മി ചൂ തുടങ്ങിയ ബ്രാന്‍ഡുകളുടെകൂടെ ഹാംലീസുകൂടി എത്തുമ്പോള്‍ കളിപ്പാട്ട ബിസിനസില്‍ പ്രധാനിയായി റിലയന്‍സ് മാറും. നിലവില്‍ 18 രാജ്യങ്ങളിലായി 167 സ്റ്റോറുകളാണ് ഹാംലീസിനുള്ളത്.