രാജ്യത്തെ മുന്‍നിര സ്വകാര്യ ബാങ്കായ എച്ച്.ഡി.എഫ്.സി. ബാങ്ക് രണ്ട് വര്‍ഷത്തിനുള്ളില്‍ കേരളത്തിലെ ശാഖകളുടെ എണ്ണം 200 ആക്കി ഉയര്‍ത്തും. കേരളത്തിലെ നൂറ്റിഅമ്പതാമത് ശാഖ കാക്കനാട്ട് തുറന്ന ശേഷം നടത്തിയ പത്രസമ്മേളനത്തില്‍ എച്ച്.ഡി.എഫ്.സി. ബാങ്കിന്റെ ബ്രാഞ്ച് ബാങ്കിങ് വിഭാഗം മേധാവി ധീരജ് റെല്ലി അറിയിച്ചതാണിത്.
അടുത്ത 12 മുതല്‍ 24 മാസം കൊണ്ട് 50 പുതിയ ശാഖകള്‍ തുറക്കാനാണ് ബാങ്ക് ലക്ഷ്യമിട്ടിരിക്കുന്നതെന്ന് അദ്ദേഹം വ്യക്തമാക്കി. കേരളത്തിലെ എല്ലാ ജില്ലകളിലും ബാങ്കിന് സാന്നിധ്യമുണ്ട്. കഴിഞ്ഞ അഞ്ച് വര്‍ഷത്തിനിടയിലാണ് അതിവേഗത്തില്‍ ബ്രാഞ്ച് ശൃംഖല വളര്‍ന്നത്. ബാങ്കിന്റെ കേരളത്തിലെ ആദ്യ ശാഖ കൊച്ചിയില്‍ രവിപുരത്ത് 1997ലാണ് തുറന്നത്.
നിലവിലെ 150 ശാഖകളില്‍ ഏതാണ്ട് 70 ശതമാനവും ഗ്രാമീണ മേഖലയിലും ചെറു പട്ടണങ്ങളിലുമാണ്. കേരളത്തില്‍ ബാങ്കിന്റെ വായ്പാ നിക്ഷേപ അനുപാതം 113 ശതമാനമാണ്. ഇത് സംസ്ഥാന ശരാശരിയെക്കാള്‍ കൂടുതലാണെന്നും അദ്ദേഹം വ്യക്തമാക്കി.

കാക്കനാട് സീപോര്‍ട്ട്എയര്‍പോര്‍ട്ട് റോഡില്‍ ടി.വി. സെന്ററിന് സമീപം ചാക്കച്ചേരിയില്‍ ടവറില്‍ ആരംഭിച്ച 150ാമത് ശാഖ എസ്.എഫ്.ഒ. ടെക്‌നോളജീസ് വൈസ് ചെയര്‍മാനും മാനേജിങ് ഡയറക്ടറുമായ എന്‍. ജഹാംഗീര്‍ ആണ് ഉദ്ഘാടനം ചെയ്തത്. എച്ച്.ഡി.എഫ്.സി. ബാങ്ക് സോണല്‍ മേധാവി എസ്.എസ്. ജയശങ്കര്‍, സര്‍ക്കിള്‍ മേധാവി ഹെമി സെബാസ്റ്റ്യന്‍ എന്നിവരും ചടങ്ങില്‍ സംബന്ധിച്ചു.