സ്വര്‍ണവില ശരവേഗത്തില്‍ കുതിച്ച് വീണ്ടും പവന് നാല്‍പതിനായിരം രൂപ കടന്നിരിക്കുന്നു. പണിക്കൂലിയും ജിഎസ്ടിയും ഉള്‍പ്പെടെ ഒരു പവന്‍ ആഭരണത്തിന് അര ലക്ഷത്തോടടുത്ത് വില ഉയര്‍ന്നു.

ഇന്ന് ഒരു ദിവസം മാത്രം പവന് 1,040 രൂപ വര്‍ധിച്ച് 40,560 രൂപ നിരക്കിലേക്കു കുതിച്ചു. യുദ്ധം ഉയര്‍ത്തുന്ന ഭീഷണിയും പെട്രോളിയം വിലയിലെ വര്‍ധനവും കണക്കാക്കിയാല്‍ വരുംദിവസങ്ങളില്‍ സ്വര്‍ണ വില പവന് അര ലക്ഷം രൂപയ്ക്കു മുകളിലെത്തുമെന്നാണ് വ്യാപാര വൃത്തങ്ങള്‍ നല്‍കുന്ന സൂചന.

ഇക്കൊല്ലത്തിന്റെ തുടക്കത്തില്‍ ജനുവരിയിലെ പവന് 36,720 രൂപ എന്ന നിലവാരവുമായി താരതമ്യം ചെയ്യുമ്പോള്‍ രണ്ടുമാസത്തിനിടെ ഒരു പവന് 3840 രൂപയുടെ വര്‍ധനവാണുണ്ടായത്.

ഇന്നത്തെ നിരക്കില്‍ ഒരു ഗ്രാം സ്വര്‍ണത്തിന് 5,070 രൂപയാണ് വില. 2020നു ശേഷം സ്വര്‍ണവില 40,000 രൂപയ്ക്ക് മുകളില്‍ എത്തുന്നത് ആദ്യമാണ്. 2020 ഓഗസ്റ്റ് 7, 8, 9 തീയതികളിലാണ് സ്വര്‍ണവില ആദ്യമായി 40,000 കടന്നത്. അന്ന് ഒരു പവന് 42,000 രൂപയിലെത്തിയശേഷം പിന്നോട്ടു വരികയായിരുന്നു. സ്വര്‍ണവില മൂന്നു വര്‍ഷത്തിനിടെ അതിവേഗത്തില്‍ കൂടുകയും പിന്നീട് വില അല്‍പം താഴുകയുമാണ് പതിവ്. ഒരു പതിറ്റാണ്ടിനുള്ളില്‍ ഒരു പവന് പതിയ്യായിരം രൂപയുടെ വര്‍ധവമാണ് രേഖപ്പെടുത്തിയിരിക്കുന്നത്. സമീപകാല ചരിത്രത്തില്‍ ഒരൊറ്റദിവസം ഇത്രയും വില വര്‍ധനവുണ്ടാകുന്നത് ആദ്യമായാണ്.

ഇക്കൊല്ലം ജനുവരിയിലെ 36,720 നിലവാരവുമായി താരതമ്യം ചെയ്യുമ്പോള്‍ രണ്ടുമാസത്തിനിടെ 3840 രൂപയുടെ വര്‍ധനവാണ് സ്വര്‍ണവിപണിയിലുണ്ടായിരിക്കുന്നത്. റഷ്യ-യുക്രൈന്‍ യുദ്ധം തുടരുന്നതിനാല്‍ രാജ്യാന്തര വിപണിയില്‍ വിലകൂടിയതാണ് ഇന്ത്യയിലെ വിലവര്‍ധനയ്ക്കും കാരണം. രൂപയുടെ മൂല്യമിടിയുന്നതും സ്വര്‍ണവില വര്‍ധിക്കാനിടയാക്കി.

വെള്ളിയുടെ വിലയിലും സ്വര്‍ണത്തിന് സമാനമായ വര്‍ധനവുണ്ടായിട്ടുണ്ട്. അതിനിടെ രാജ്യത്തെ ഹോള്‍മാര്‍ക്കിങ് നിരക്കുകള്‍ വര്‍ധിപ്പിച്ചതും സ്വര്‍ണവില ഫയരാന്‍ കാരാണമായിട്ടുണ്ട്. മാര്‍ച്ച് നാല് മുതല്‍ പ്രാബല്യത്തിലുള്ള സ്വര്‍ണം, വെള്ളി ആഭരണങ്ങള്‍ക്കാണ് ഹാള്‍ മാര്‍ക്കിംഗ് ചാര്‍ജ് വര്‍ധിപ്പിച്ചത്. സ്വര്‍ണം 35 രൂപയായിരുന്ന ഹോള്‍മാര്‍ക്കിങ് ചാര്‍ജ് 45 രൂപയാക്കി.ആഭരണത്തിന്റെ ഏറ്റവും കുറഞ്ഞ നിരക്ക് 200 രൂപയാണെങ്കില്‍ ഇനി ഹോള്‍മാര്‍ക്കിങ് ചാര്‍ജായി 45 രൂപയും ഇതിന് ആനുപാതികമായ ജിഎസ്ടിയും നല്‍കണം. വെള്ളിക്ക് ഒരെണ്ണത്തിന് 35 രൂപയായാണ് ഹോള്‍മാര്‍ക്കിങ് നിരക്ക് വര്‍ധിപ്പിച്ചത്. ആഭരണത്തിന്റെ കുറഞ്ഞ വില 150 രൂപയായിരിക്കണം എന്നാണ് നിബന്ധന.