ബി.എം.ഡബ്‌ള്യുവിന്റെ കീഴിലുള്ള അത്യാഡംബര ചെറുകാര്‍ ബ്രാന്‍ഡാണ് മിനി. ലോകമെമ്പാടും ഒട്ടേറെ ആരാധകരുള്ള മിനി വിപണിയിലെത്തിക്കുന്ന പുതിയ 3 ഡോര്‍ കണ്‍വെര്‍ട്ടിബിള്‍ ഹാച്ച്ബാക്ക് മോഡലാണ് കൂപ്പര്‍ എസ്. ബ്രിട്ടീഷ് പതാകയായ യൂണിയന്‍ ജാക്കില്‍ നിന്ന് പ്രചോദനമുള്‍ക്കൊണ്ട് ഒട്ടേറെ ഡിസൈന്‍ ഓപ്ഷനുകളും പുതിയ മോഡലിലുണ്ട്. പുതിയ എല്‍.ഇ.ഡി ടെയ്ല്‍ ലൈറ്റിന്റെ യൂണിയന്‍ ജാക്ക് ഡിസൈനാണ് ഇതില്‍ ഏറ്റവും ശ്രദ്ധേയം. ഓപ്ഷണല്‍ എല്‍.ഇ.ഡി മെട്രിക്‌സ് ഹൈഡ്‌ലൈറ്റിനൊപ്പം സ്റ്റാന്‍ഡേര്‍ഡായാണ് പുത്തന്‍ ടെയ്ല്‍ ലൈറ്റ് അവതരിപ്പിക്കുന്നത്.

കണ്‍വെര്‍ട്ടിബിളിന്റെ ഫാബ്രിക് റൂഫ്, ഹാച്ച്ബാക്കിന്റെ മുകള്‍ഭാഗം, ഹെഡ;റെസ്റ്റ്, ഔട്ട്‌സൈഡ് മിറര്‍ എന്നിവയിലെല്ലാം ഈ പുത്തന്‍ രൂപകല്പനാ ആശയം കാണാം. ഉപഭോക്താവിന്റെ ആശയങ്ങള്‍ക്ക് അനുസരിച്ച് കസ്റ്റമൈസ് ചെയ്യാമെന്നതാണ് പുത്തന്‍ മിനി കൂപ്പര്‍ എസിലെ ഈ രൂപകല്പനാ മാറ്റങ്ങളുടെ അടിസ്ഥാനം. ഉദാഹരണത്തിന്, ഡാഷ്‌ബോര്‍ഡിന്റെ ഡിസൈന്‍ വാഹന ഉടമയുടെയോ മറ്റോ പേര് കൂടി ഉള്‍പ്പെടുത്തി കസ്റ്റമൈസ് ചെയ്യാം.
സാങ്കേതിക വിഭാഗത്തില്‍ പുത്തന്‍ കൂപ്പര്‍ എസില്‍ കാര്യമായ മാറ്റങ്ങള്‍ കാണാനാവില്ല. 192 എച്ച്.പി കരുത്തുള്ള രണ്ട് ലിറ്റര്‍ പെട്രോള്‍ എന്‍ജിന്‍ നിലനിറുത്തിയിട്ടുണ്ട്. ഹാച്ച്ബാക്കിന് പൂജ്യത്തില്‍ നിന്ന് 100 കിലോമീറ്റര്‍ വേഗം കൈവരിക്കാന്‍ 6.8 സെക്കന്‍ഡ് മതി. കണ്‍വെര്‍ട്ടിബിളിന് 7.1 സെക്കന്‍ഡ് വേണം. പുതിയ 7 സ്പീഡ് ഡ്യുവല്‍ ക്‌ളച്ച് ട്രാന്‍സ്മിഷന്‍ സംവിധാനം ഇന്ത്യന്‍ വിപണിയിലെത്തിക്കുന്ന പെട്രോള്‍ വേരിയന്റിന്റെ പ്രത്യേകതയായിരിക്കും
ഇന്ത്യന്‍ നിരത്തുകള്‍ക്ക് ഇണങ്ങിയ വിധത്തിലായിരിക്കും ഇന്ത്യയിലെത്തിക്കുന്ന പുത്തന്‍ കൂപ്പര്‍ എസ് മോഡലുകളുടെ നിര്‍മ്മാണം. ഉയര്‍ന്ന വേഗതയിലും മോശം റോഡുകളിലും മികച്ച റൈഡിംഗ് പ്രകടനം കാഴ്ചവയ്ക്കാന്‍ പുതിയ കൂപ്പര്‍ എസിന് സാധിക്കും. പൂര്‍ണമായ വൃത്താകൃതിയിലുള്ള ഡിസ്പ്‌ളേയാണ് ടച്ച് സ്‌ക്രീന്‍ ഓപ്ഷനോട് കൂടിയ ഇന്‍ഫോടെയ്ന്‍മെന്റ് സംവിധാനത്തിനായി മിനി ഒരുക്കിയിരിക്കുന്നത്. ജര്‍മ്മന്‍ ബ്രാന്‍ഡായ ബി.എം.ഡബ്‌ള്യുവില്‍ നിന്ന് വരുന്നതിനാല്‍ ജര്‍മ്മന്‍ ടച്ചും ഈ ബ്രിട്ടീഷ് രൂപകല്പനാ ആശയം നിറഞ്ഞ അത്യാഡംബര ചെറുകാറില്‍ കാണാം.
പെര്‍ഫോമന്‍സ് കാറെന്ന വിഭാഗത്തില്‍ ഉള്‍പ്പെടുന്നില്ലെങ്കിലും മികവുറ്റതും പ്രൗഢവുമായ യാത്രാ അനുഭവം സമ്മാനിക്കുമെന്നതാണ് പുതിയ മിനി കൂപ്പര്‍ എസ് മോഡലിന്റെ സവിശേഷത. ഇന്ത്യന്‍ വിപണിയില്‍ പ്രതീക്ഷിക്കുന്ന എക്‌സ്‌ഷോറൂം വില 35 ലക്ഷം രൂപ.