അംഗീകാരമില്ലാത്ത ടെക്‌നിക്കല്‍ കോഴ്‌സുകള്‍ വ്യാപകം
അംഗീകാരമില്ലാത്ത കോഴ്‌സുകളുമായി സ്വകാര്യ സ്ഥാപനങ്ങള്‍ രംഗത്ത്. നൂറുശതമാനം പ്ലേസ്‌മെന്റ് സൗകര്യങ്ങളും ആകര്‍ഷകമായ പാക്കേജുകളും വാഗ്ദാനം ചെയ്യുന്ന ഈ കോഴ്‌സുകള്‍ക്ക് യു ജി സി യുടെ അംഗീകാരം ഇല്ലെന്ന വസ്തുത വിദ്യാര്‍ത്ഥികള്‍ അറിയാതെ പോകുന്നു. യു ജി സി യുടെ അംഗീകാരം ലഭിച്ച യൂണിവേഴ്‌സിറ്റിയുടെ സര്‍ട്ടിഫിക്കറ്റുകള്‍ക്ക് മാത്രമേ ജോലി സാധ്യത ഉള്ളു.
അരുണാചല്‍ പ്രദേശ് യൂനിവേഴ്‌സിറ്റിയെന്ന സ്വകാര്യ സര്‍വകലാശാലയുടെ പേരിലുള്ള ടെക്‌നിക്കല്‍ കോഴ്‌സുകളാണ് സ്ഥാപനങ്ങള്‍ നടത്തുന്നത്. ഈ യൂനിവേഴ്‌സിറ്റിക്ക് കേരളത്തിലോ മറ്റ് സംസ്ഥാനങ്ങളിലോ കോഴ്‌സുകള്‍ നടത്താനുള്ള അനുവാദമില്ല. കോഴ്‌സുകള്‍ക്ക് അനുമതി നല്‍കുന്നതിനാവശ്യമായ യു ജി സി സംഘം അരുണാചല്‍ പ്രദേശ് യൂനിവേഴ്‌സിറ്റിയില്‍ പരിശോധിച്ച് ഇതുവരെ റിപ്പോര്‍ട്ട് സമര്‍പ്പിച്ചിട്ടില്ല. ഇത്തരത്തില്‍ പരിശോധന നടത്തുകയും അതില്‍ നിന്നും ലഭിക്കുന്ന വിവരങ്ങളുടെ അടിസ്ഥാനത്തില്‍ അഫിലിയേഷന്‍ നല്‍കുകയും ചെയ്താലേ കോഴ്‌സുകള്‍ നടത്താന്‍ സാധിക്കുകയുള്ളു. മാത്രമല്ല അഞ്ച് വര്‍ഷം തുടര്‍ച്ചയായി ഇത്തരത്തില്‍ പരിശോധന നടത്തി അഫിലിയേഷന്‍ നല്‍കിയാല്‍ മാത്രമേ യൂനിവേഴ്‌സിറ്റി നിലനില്‍ക്കുന്ന സംസ്ഥാനത്തിന് പുറത്ത് ഓഫ് ക്യാമ്പസ് വഴി ടെക്‌നിക്കല്‍ കോഴ്‌സുകള്‍ നടത്താന്‍ സാധിക്കുകയുള്ളു. ഇത്തരത്തിലുള്ള ഒരു അംഗീകാരവുമില്ലാത്ത യൂനിവേഴ്‌സിറ്റിയുടെ പേരിലാണ് ഇപ്പോള്‍ അഡ്മിഷന്‍ നടക്കുന്നതെന്നതാണ് വാസ്തവം. എറണാകുളം, തൃശൂര്‍, കോട്ടയം ജില്ലകളില്‍ വിവിധ സ്ഥാപനങ്ങളിലായി കാണുന്ന ഇത്തരം കോഴ്‌സുകള്‍ ഇതിനോടകം എല്ലാ ജില്ലകളിലേക്കും വ്യാപിച്ചിട്ടുണ്ടെന്നാണ് അറിയുന്നത്. ഡിപ്ലോമ ഇന്‍ ഓട്ടോമൊബൈല്‍, ഇലക്ട്രിക്കല്‍, ഇലക്‌ട്രോണിക്‌സ്, ഇന്‍സ്ട്രുമെന്റേഷന്‍, മെക്കാനിക്കല്‍ തുടങ്ങിയ കോഴ്‌സുകളും ബി ബി എ ഏവിയേഷന്‍, ഇന്റീരിയര്‍ ഡിസൈനിംഗ് തുടങ്ങിയ പുതുതലമുറ കോഴ്‌സുകളുമാണ് നടത്തിവരുന്നത്. ഓരോ സെമസ്റ്ററിനും 25,000 മുതല്‍ 60,000 രൂപ വരെ ഫീസാണ് ഈടാക്കുന്നത്.
ഇതിന് മുന്‍പ് കര്‍ണാടക യൂനിവേഴ്‌സിറ്റിയുടെ പേരിലും ഇത്തരം തട്ടിപ്പുകള്‍ നടന്നിട്ടുണ്ട്.
യുജി സി മാനദണ്ഡ പ്രകാരം ഇത്തരം യൂനിവേഴ്‌സിറ്റികള്‍ക്ക് ടെക്‌നിക്കല്‍ കോഴ്‌സുകള്‍ നടത്താനുള്ള അംഗീകാരമില്ല. ഇത് മറച്ചുവെച്ചുകൊണ്ടാണ് കേരളത്തില്‍ സ്ഥാപനങ്ങള്‍ കോഴ്‌സുകള്‍ നടത്തി വന്നത്. മറ്റ് വിവിധ ഓപ്പണ്‍ യൂനിവേഴ്‌സിറ്റികളുടെ പേരിലും സമാന വിദ്യാഭ്യാസ തട്ടിപ്പ് നടക്കുന്നുണ്ട്.
പുതിയ കോഴ്‌സുകള്‍ക്ക് ചേരുന്നതിനുമുന്പ് സ്ഥാപനങ്ങളുടെ വിശ്വാസ്യത ഉറപ്പു വരുത്തേണ്ടതുണ്ട്. അതുപോലെ പഠിക്കാന്‍ ഉദ്ദേശിക്കുന്ന കോഴ്‌സിന് യു ജി സി യുടെ അംഗീകാരം ഉണ്ടോ എന്നും പരിശോധിക്കുക . ആകര്‍ഷകമായ പാക്കേജുകളിലും പരസ്യങ്ങളിലും കുടുങ്ങി വഞ്ചിതരാകാതിരിക്കാന്‍ വിദ്യാര്‍ത്ഥികളും രക്ഷിതാക്കളും ശ്രദ്ധിക്കേണ്ടതുണ്ട് .
https://www.facebook.com/Malayalivartha
