സാമൂഹ്യ ക്ഷേമ പെൻഷനുകൾ സഹകരണ ബാങ്കുകൾ വഴി വീടുകളിൽ എത്തിച്ചു നൽകുന്നത് നിർത്തലാക്കിയ യുഡിഎഫ് സർക്കാർ നടപടി സമൂഹത്തിലെ അശരണർക്കും പാവപ്പെട്ടവർക്കും എതിരെയുള്ള വെല്ലുവിളിയാണ്. ഇടതുപക്ഷ ജനാധിപത്യ സർക്കാരിൻ്റെ കാലത്താണ് മുഴുവൻ ക്ഷേമ പെൻഷനുകളും കൃത്യമായി വീടുകളിൽ എത്തിക്കുന്ന പദ്ധതി തുടങ്ങിയത്. രോഗികളും അശരണരും വികലാംഗരും വൃദ്ധരും കിടപ്പു രോഗികളുമായ ആളുകൾക്ക് ഏറെ ആശ്വാസകരമായ പദ്ധതിയായിരുന്നു ഇത്. യുഡിഎഫ് സർക്കാർ ജനങ്ങൾക്ക് ഗുണപരമായിരുന്ന ആ പദ്ധതി നിർത്തലാക്കിക്കൊണ്ട് ഉത്തരവിട്ടിരിക്കുകയാണ്. ഇനി മുതൽ രോഗികളും വൃദ്ധരും വികലാംഗരും നടക്കാൻ ബുദ്ധിമുട്ടുള്ളവരും അശരണരും എല്ലാം പെൻഷൻ തുകയ്ക്കായി വാണിജ്യ ബാങ്കുകളുടെ ക്യൂവിലേക്ക് മടങ്ങി പോകേണ്ട സാഹചര്യമാണ് വരുന്നത്.

ജീവിതത്തിൽ അത്രയേറെ പ്രയാസപ്പെടുകയും ബുദ്ധിമുട്ടുകയും ചെയ്യുന്ന സാധാരണക്കാരായ പെൻഷൻ വാങ്ങിക്കുന്ന മനുഷ്യർക്ക് നേരെ ക്രൂരമായ നിലപാടാണ് യുഡിഎഫ് ഇതിലൂടെ എടുത്തിരിക്കുന്നത്. ഇത് ജനവിരുദ്ധവും സാധാരണ മനുഷ്യരോടുള്ള വെല്ലുവിളിയുമാണ്. രോഗികൾക്കും വൃദ്ധർക്കും വികലാംഗർക്കും കൊടുക്കേണ്ട മാനുഷികമായ പരിഗണന പോലും യുഡിഎഫ് നൽകുന്നില്ല. വീടുകളിൽ പെൻഷൻ എത്തിച്ചു നൽകുന്ന പദ്ധതി നിർത്തലാക്കിയ യുഡിഎഫിന്റെ മനുഷ്യത്വരഹിത നിലപാടിനെതിരെ ഡിവൈഎഫ്ഐ സംസ്ഥാന സെക്രട്ടേറിയറ്റ് ശക്തമായ പ്രതിഷേധം രേഖപ്പെടുത്തുന്നു.