സൗദി ടൂറിസം വകുപ്പ് 25,000സ്വദേശി വനിതകള്‍ക്ക് തൊഴിലവസരമൊരുക്കുന്നു. 2020 ആകുമ്പോഴേക്കും ലക്ഷ്യത്തിലെത്തുമെന്നു മന്ത്രാലയം അറിയിച്ചു. ഇതിനായി സൗദിയില്‍ ടൂറിസം മേഖലയില്‍ ജോലി ചെയ്യാന്‍ പാകത്തില്‍ ഇരുപത്തി അയ്യായിരം സ്വദേശി വനിതകള്‍ക്ക് പരിശീലനം നൽകും

കൂടുതല്‍ സ്വദേശീ വനിതകള്‍ക്ക് സൗദി ടൂറിസം മേഖലയില്‍ ജോലി കണ്ടെത്താൻ ലക്ഷ്യമിട്ടിട്ടുള്ളതാണ് പുതിയ പദ്ധതി . പരിശീലനം നൽകുന്ന 25,000 പേരിൽ ആയിരത്തി നാനൂറ് പേര് ടൂര്‍ ഗൈഡുകള്‍ ആയിരിക്കും. ഇതിനകം ഒമ്പതിനായിരം സൗദി വനിതകള്‍ക്ക് പരിശീലനം നല്‍കിയതായി വകുപ്പ് പ്രതിനിധി നാസര്‍ അല്‍ നഷ്മി പറഞ്ഞു. 8108 ടൂറിസം ബിരുദധാരികള്‍ നിലവില്‍ സൌദിയില്‍ ഉണ്ട് എന്ന് കണക്കാക്കപ്പെടുന്നു.

ഇതുവരെ ടൂറിസം രംഗത്ത് ജോലി ചെയ്യുന്നവരില്‍ സ്വദേശീ വനിതകളുടെ പ്രാതിനിധ്യം ഇരുപത്തി രണ്ടു ശതമാനം മാത്രമാണ്. രാജ്യത്ത് നിര്‍മാണത്തിലിരിക്കുന്ന പുതിയ ടൂറിസം പദ്ധതികളില്‍ വനിതകള്‍ ഉള്‍പ്പെടെ പതിനായിരക്കണക്കിന് സ്വദേശികള്‍ക്ക് തൊഴിലവസരങ്ങള്‍ ഉണ്ടാകും. കഴിഞ്ഞയാഴ്ചയയാണ് സൌദിയില്‍ ആദ്യമായി വനിതാ ടൂര്‍ ഗൈഡുകള്‍ക്കുള്ള ലൈസന്‍സ് അനുവദിച്ചത്.