സംസ്ഥാനത്തെ വിവിധ പ്രാഥമിക സഹകരണസംഘങ്ങളിലെയും സഹകരണ ബാങ്കുകളിലെയും 183 ഒഴിവുകളിലേക്ക് അപേക്ഷകൾ ക്ഷണിക്കുന്നു; നിയമനം റാങ്ക് ലിസ്റ്റ് പ്രകാരം
153 ജൂനിയര് ക്ലാര്ക്ക്/കാഷ്യര്, എട്ട് സെക്രട്ടറി, 14 ഡേറ്റ എന്ട്രി ഓപ്പറേറ്റര് എന്നിവയുള്പ്പെടെ സംസ്ഥാനത്തെ വിവിധ പ്രാഥമിക സഹകരണസംഘങ്ങളിലെയും സഹകരണ ബാങ്കുകളിലെയും 183 ഒഴിവുകളിലേക്ക് സഹകരണ സര്വീസ് പരീക്ഷാ ബോര്ഡ് അപേക്ഷ ക്ഷണിച്ചു. പരീക്ഷാ ബോര്ഡ് നടത്തുന്ന എഴുത്തുപരീക്ഷയുടെയും ബന്ധപ്പെട്ട സഹകരണസ്ഥാപനങ്ങള് നടത്തുന്ന കൂടിക്കാഴ്ചയുടെയും അടിസ്ഥാനത്തില് പരീക്ഷാ ബോര്ഡ് നല്കുന്ന ലിസ്റ്റില്നിന്ന് സംഘങ്ങള് തയ്യാറാക്കുന്ന റാങ്ക് ലിസ്റ്റ് പ്രകാരമാണ് നിയമനം.
പ്രായപരിധി: 01-01-2019-ല് 18-40 വയസ്സ്. പട്ടികജാതി/പട്ടികവര്ഗത്തില്പ്പെട്ടവര്ക്ക് ഉയര്ന്ന പ്രായപരിധിയില് അഞ്ചുവര്ഷത്തെ ഇളവും മറ്റു പിന്നാക്കവിഭാഗത്തിനും വിമുക്തഭടന്മാര്ക്കും മൂന്നു വര്ഷത്തെ ഇളവും അംഗപരിമിതര്ക്ക് 10 വര്ഷത്തെ ഇളവും ലഭിക്കും.
ഏതെങ്കിലും ഒരു സംഘത്തിന്റെ പ്രവര്ത്തനപരിധിയില് വരുന്ന ജില്ലയില്നിന്നുള്ള ഉദ്യോഗാര്ഥികള്ക്ക് പ്രസ്തുത സംഘത്തിലെ ഇന്റര്വ്യൂവിന് ലഭിക്കാവുന്ന പരമാവധി 15 മാര്ക്കിനുപുറമേ അധിക ആനുകൂല്യമായി 5 മാര്ക്ക് കൂടി ലഭിക്കും. അപേക്ഷാഫോമില് സ്വന്തം ജില്ല വ്യക്തമാക്കേണ്ടതും ഇന്റര്വ്യൂ സമയത്ത്, ബന്ധപ്പെട്ട അധികാരികളില്നിന്ന് ലഭിക്കുന്ന നേറ്റിവിറ്റി സര്ട്ടിഫിക്കറ്റ് ഹാജരാക്കേണ്ടതുമാണ്.
ഉദ്യോഗാര്ഥികള്ക്ക് ഒന്നില് കൂടുതല് സംഘങ്ങളിലേക്കും തസ്തികകളിലേക്കും അപേക്ഷിക്കാം. ഒരു സംഘത്തിലേക്ക്/തസ്തികയിലേക്ക് അപേക്ഷിക്കാന് 150 രൂപയാണ് ഫീസ് (എസ്.സി./എസ്.ടി. വിഭാഗത്തിന് 50 രൂപ). അധികമായി അപേക്ഷിക്കുന്ന ഓരോ സംഘത്തിനും/തസ്തികയ്ക്കും 50 രൂപ അധികമായി അടയ്ക്കണം. ഒന്നില് കൂടുതല് തസ്തികയ്ക്കും/ സംഘത്തിലേക്കും അപേക്ഷിക്കുന്നതിന് ഒരു അപേക്ഷാഫോമും ഒരു ഡിമാന്ഡ് ഡ്രാഫ്റ്റും മതി.
അപേക്ഷാ ഫീസ് ഫെഡറല് ബാങ്ക്, കേരള സംസ്ഥാന സഹകരണ ബാങ്ക് എന്നിവയുടെ ബ്രാഞ്ചുകളില് ചെലാന് വഴി നേരിട്ട് അടയ്ക്കാം. അതിനാവശ്യമായ ചെലാന് സഹകരണ സര്വീസ് പരീക്ഷാ ബോര്ഡിന്റെ വെബ്സൈറ്റില് അപേക്ഷാഫോമിനൊപ്പം കൊടുത്തിട്ടുണ്ട്. അല്ലെങ്കില് ജില്ലാ സഹകരണ ബാങ്ക്, സ്റ്റേറ്റ് ബാങ്ക് ഓഫ് ഇന്ത്യ എന്നീ ബാങ്കുകളില്നിന്ന് സഹകരണ സര്വീസ് പരീക്ഷാ ബോര്ഡ് സെക്രട്ടറിയുടെ പേരില് തിരുവനന്തപുരത്ത് മാറാവുന്ന ക്രോസ് ചെയ്ത സി.ടി.എസ്. പ്രകാരം മാറാവുന്ന ഡിമാന്ഡ് ഡ്രാഫ്റ്റ് മാത്രമേ പരീക്ഷാ ഫീസായി സ്വീകരിക്കുകയുള്ളൂ. അക്കൗണ്ടില് പണമടച്ചതിന്റെ ചെലാന് രസീത്/ഡിമാന്ഡ് ഡ്രാഫ്റ്റ് അപേക്ഷയോടൊപ്പം ഉള്ളടക്കം ചെയ്യണം. ആ വിവരം അപേക്ഷയില് പ്രത്യേകം കാണിക്കണം. വിജ്ഞാപന തീയതിക്ക് ശേഷം എടുക്കുന്ന ഡിമാന്ഡ് ഡ്രാഫ്റ്റ് മാത്രമേ അതത് പരീക്ഷയ്ക്കായി ഫീസിനത്തില് പരിഗണിക്കുകയുള്ളൂ.
തസ്തിക, യോഗ്യത, സംഘങ്ങളുടെ വിലാസം, ഒഴിവുകള് തുടങ്ങിയവ ഈ ആഴ്ചയിലെ തൊഴില് വാര്ത്തയില് പ്രസിദ്ധീകരിച്ചിട്ടുണ്ട്. അപേക്ഷയുടെ മാതൃക സഹകരണ സര്വീസ് പരീക്ഷാ ബോര്ഡിന്റെ http://www.csebkerala.org എന്ന വെബ്സൈറ്റില് ലഭ്യമാണ്. അപേക്ഷയും അനുബന്ധങ്ങളും ബോര്ഡ് നിശ്ചയിച്ചിട്ടുള്ള മാതൃകയില്ത്തന്നെ മേയ് 24-ന് വൈകിട്ട് 5 മണിക്ക് മുന്പായി സഹകരണ സര്വീസ് പരീക്ഷാ ബോര്ഡില് ലഭിക്കേണ്ടതാണ്.
വിലാസം: സഹകരണ സര്വീസ് പരീക്ഷാ ബോര്ഡ്, കേരള സംസ്ഥാന സഹകരണ ബാങ്ക് ബില്ഡിങ്, ഓവര് ബ്രിഡ്ജ്, തിരുവനന്തപുരം-695001. ഫോണ്: 0471-2468690, 2468670.
https://www.facebook.com/Malayalivartha