സംസ്ഥാനത്തെ വിവിധ സര്‍ക്കാര്‍/ പൊതുമേഖലാ/സ്വകാര്യ സ്ഥാപനങ്ങളില്‍ നിലവിലുള്ള ഒഴിവുകളിലേക്ക് ടെക്നിക്കല്‍ അപ്രന്റിസുകളെ തിരഞ്ഞെടുക്കുന്നു. ഇതിനായി കേന്ദ്ര സര്‍ക്കാരിന്റെ കീഴിലുള്ള ചെന്നൈയിലെ ദക്ഷിണ മേഖല ബോര്‍ഡ് ഓഫ് അപ്രന്റിസ്ഷിപ്പ് സൂപ്പര്‍വൈസറി ഡെവലപ്പ്മെന്റ് സെന്ററും ഒന്നിച്ച്‌ ഇന്റര്‍വ്യൂ നടത്തുന്നു. കളമശ്ശേരി സര്‍ക്കാര്‍ പോളിടെക്നിക്ക് കോളേജില്‍ ഓഗസ്റ്റ് 17നാണ് വാക്ക്-ഇന്‍-ഇന്റര്‍വ്യൂ നടത്തുക. രാവിലെ 9.30 മുതല്‍ വൈകുന്നേരം അഞ്ചു മണി വരെയാണ് ഇന്റര്‍വ്യൂ. ഏകദേശം 1000 ഒഴിവുകൾ ഉള്ളതായി കരുതുന്നു. ഇന്റര്‍വ്യൂവിനായി സൂപ്പര്‍വൈസറി ഡെവലപ്പമെന്റ് സെന്ററില്‍ രജിസ്റ്റര്‍ ചെയ്യണം. രജിസ്റ്റര്‍ ചെയ്തവർക്ക് മാത്രമേ ഇന്റര്‍വ്യൂ സൗകര്യം ഒരുക്കിയിട്ടുള്ളൂ. 3542 രൂപ പ്രതിമാസ സ്‌റ്റൈപ്പന്റായി നൽകും. ട്രെയിനിംഗിന് ശേഷം കേന്ദ്രസര്‍ക്കാര്‍ പ്രോഫിഷ്യന്‍സി സര്‍ട്ടിഫിക്കറ്റ് നൽകും. ഈ സർട്ടിഫിക്കറ്റ് അഖിലേന്ത്യ തലത്തില്‍ തൊഴില്‍ പരിചയമായി പരിഗണിച്ചിട്ടുള്ളതാണ്.

ട്രെയിനിങ് കാലത്തുള്ള മികവ് അനുസരിച്ചു പല സ്ഥാപനങ്ങളിലേക്കും സ്ഥിരം ജോലിക്കും അവസരം കിട്ടും. അഭിമുഖത്തിന് വരുന്നവർ സര്‍ട്ടിഫിക്കറ്റുകളുടെയും മാര്‍ക്ക് ലിസ്റ്റുകളുടെയും അസ്സലും മൂന്നു കോപ്പികളും വിശദമായ ബയോഡേറ്റയുടെ മൂന്നു കോപ്പികളും സഹിതം ഓഗസ്റ്റ് 17ന് രാവിലെ 9.30ന് തിരഞ്ഞെടുപ്പ് കേന്ദ്രത്തില്‍ എത്തണം എന്നാണ് അറിയിച്ചിരിക്കുന്നത്. സൂപ്പര്‍വൈസറി ഡെവലപ്പ്മെന്റ് സെന്ററില്‍ ഇതുവരെ രജിസ്റ്റര്‍ ചെയ്യാത്തവര്‍ പതിനേഴാം തീയതിക്ക് മുന്‍പ് രജിസ്റ്റര്‍ ചെയ്യുക. അപേക്ഷാഫോമും രജിസ്റ്റര്‍ ചെയ്യുന്നതിനുള്ള മാര്‍ഗ നിര്‍ദേശങ്ങളും www.sdcentre.org എന്ന വെബ് സൈറ്റിൽ ലഭ്യമാണ്. ഇന്റര്‍വ്യൂ ദിവസം രജിസ്ട്രേഷന്‍ ഉണ്ടായിരിക്കുന്നതല്ല. സൂപ്പര്‍വൈസറി ഡെവലപ്പ്മെന്റ് സെന്റര്‍ നല്‍കുന്ന രജിസ്ട്രേഷന്‍ കാര്‍ഡോ ഇ-മെയില്‍ പ്രിന്റോ ഇന്റര്‍വ്യൂവിന് വരുമ്പോൾ നിര്‍ബന്ധമായും കാണിക്കണം. ബോര്‍ഡ് ഓഫ് അപ്രന്റീസ് ട്രെയിനിങ്ങിന്റെ നാഷണല്‍ വെബ്പോര്‍ട്ടല്‍ www.mhrdnats.gov.in-ല്‍ രജിസ്റ്റര്‍ ചെയ്തവര്‍ അതിന്റെ പ്രിന്റൗട്ട് കൊണ്ടുവന്നാലും പരിഗണിക്കപ്പെടുന്നതായിരിക്കും . പങ്കെടുക്കുന്ന കമ്പനികളുടെയും ഒഴിവുകളുടെയും വിവരങ്ങള്‍ www.sdcentre.org എന്ന വെബ്സൈറ്റില്‍ പ്രസിദ്ധീകരിക്കുന്നതാണ്.