വിവിധ വകുപ്പുകളില്‍ എല്‍.ഡി. ക്ലാര്‍ക്ക് നിയമനത്തിനുള്ള പുതിയ വിജ്ഞാപനം പി.എസ്.സി നവംബർ 15 ആം തീയതി പ്രസിദ്ധീകരിക്കും. അപേക്ഷകർക്ക് വേണ്ടുന്ന യോഗ്യത. എസ്.എസ്.എല്‍.സി.യാണ്. അപേക്ഷകരുടെ ഉയര്‍ന്ന പ്രായപരിധി പൊതുവിഭാഗത്തിന് 36 വയസ്സ്. ഒ.ബി.സി.ക്ക് 39 വയസ്സ്. എസ്.സി./എസ്.ടി.ക്ക് 41 വയസ്സ്. 2019 ജനുവരി ഒന്ന് കണക്കാക്കി പ്രായം നിശ്ചയിക്കുന്നത്. 2021 ഏപ്രില്‍ ആദ്യം റാങ്ക്പട്ടിക പ്രസിദ്ധീകരിക്കാനാണു ലക്ഷ്യമിടുന്നത്. നിലവിലുള്ള റാങ്ക്പട്ടികയുടെ മൂന്നുവര്‍ഷ കാലാവധി 2021 ഏപ്രില്‍ ഒന്നിന് അവസാനിക്കും. എല്‍.ഡി.സി.യുടെ യോഗ്യത എസ്.എസ്.എല്‍.സി.യില്‍നിന്ന് പ്ലസ്ടുവാക്കി ഉയര്‍ത്തി 2011-ല്‍ സര്‍ക്കാര്‍ ഉത്തരവിറക്കിയെങ്കിലും സ്പെഷ്യല്‍റൂള്‍ അംഗീകരിച്ചിട്ടില്ല. അതിനാല്‍ 2013-ല്‍ പ്രത്യേക ഉത്തരവിറക്കിയാണ് എസ്.എസ്.എല്‍.സി. യോഗ്യത നിലനിര്‍ത്തി എല്‍.ഡി.സി. വിജ്ഞാപനങ്ങള്‍ പി.എസ്.സി. പ്രസിദ്ധീകരിക്കുക. ശമ്പളം 19000- 43600.നേരിട്ടുള്ള നിയമനം നടത്തും.

സ്പെഷ്യല്‍ റൂള്‍ ഭേദഗതിചെയ്യുന്നത് വരെ എസ്.എസ്.എല്‍.സി. യോഗ്യതയാക്കി നിയമനം നടത്താന്‍ പി.എസ്.സി.ക്ക് അനുമതി നല്‍കുന്നതാണ് 2013 ജൂലായ് 23-ന്റെ ഉത്തരവ്. ഇതിന്റെ അടിസ്ഥാനത്തിലാണ് പുതിയ വിജ്ഞാപനവും പി.എസ്.സി. തയ്യാറാക്കിയത്. എല്‍.ഡി. ക്ലാര്‍ക്കിനൊപ്പം 64 തസ്തികകളുടെ വിജ്ഞാപനങ്ങളും അംഗീകരിച്ചു. സ്റ്റാറ്റിസ്റ്റിക്സ്, ഇക്കണോമിക്സ് കോളേജ് ലക്ചറര്‍, കൊമേഴ്സ്യല്‍ പ്രാക്ടീസില്‍ ഹെഡ് ഓഫ് സെക്ഷന്‍, സയന്റിഫിക് അസിസ്റ്റന്റ്, ട്രെയിനിങ് ഓഫീസര്‍ തുടങ്ങിയവയാണു മറ്റു തസ്തികകള്‍. ഇ-വേക്കന്‍സിയായി റിപ്പോര്‍ട്ട് ചെയ്യുന്നതിനൊപ്പം തപാല്‍ മുഖേനയും ഇ-മെയിലായും കിട്ടുന്ന ഒഴിവുകളും 2020 മാര്‍ച്ച് 31 വരെ സ്വീകരിക്കാന്‍ പി.എസ്.സി. യോഗം തീരുമാനിച്ചു. ഡിസംബർ 11 വരെ അപേക്ഷിക്കാൻ അവസരമുണ്ടാകും. വിജ്ഞാപനം പ്രസിദ്ധീകരിച്ച് കഴിഞ്ഞാൽ www.keralapsc.gov.in എന്ന വെബ്സൈറ്റിൽ ഒറ്റത്തവണ പ്രൊഫൈലിലൂടെ അപേക്ഷിക്കാം. 2020 സെപ്റ്റംബറിന് മുൻപ് തന്നെ പരീക്ഷ തീർക്കും. കഴിഞ്ഞ പരീക്ഷയുടെ വിജ്ഞാപനം 2016 നവംബർ 25 നായിരുന്നു പ്രസിദ്ധീകരിച്ചത്.  ഇത്തവണ 18 ലക്ഷം അപേക്ഷകർ ഉണ്ടാകുമെന്നാണ് കരുതുന്നത്. അങ്ങനെയെങ്കിൽ ഏഴോ എട്ടോ ഘട്ടമായി പരീക്ഷ നടത്തേണ്ടതായി വരും.