എന്‍ജിനീയറിംഗ് എന്‍ട്രന്‍സ് പരീക്ഷ: മിനിമം മാര്‍ക്ക് പത്തില്‍ നിന്ന് ഇരുപതായി ഉയര്‍ത്താന്‍ പരീക്ഷാ പരിഷ്‌കരണ സമിതി ശുപാര്‍ശ
എന്‍ജിനിയറിംഗ് എന്‍ട്രന്‍സ് പരീക്ഷയില്‍ ഓരോ പേപ്പറിനും യോഗ്യത നേടാനുള്ള മിനിമം മാര്‍ക്ക് പത്തില്‍ നിന്ന് ഇരുപതായി ഉയര്‍ത്താന്‍ എന്‍ട്രന്‍സ് പരീക്ഷാ പരിഷ്‌കരണത്തിനുള്ള സമിതി സര്‍ക്കാരിന് ശുപാര്‍ശ നല്‍കി. എന്‍ട്രന്‍സ് പരീക്ഷയില്‍ 480 മാര്‍ക്ക് വീതമുള്ള ഫിസിക്‌സ്, കെമിസ്ട്രി ഒന്നാം പേപ്പറിലും കണക്കിന്റെ രണ്ടാം പേപ്പറിലും പത്ത് മാര്‍ക്ക് നേടുന്നവരെയേ നിലവില്‍ റാങ്ക്‌ലിസ്റ്റില്‍ ഉള്‍പ്പെടുത്താറുള്ളൂ.
ഇത് 20 ആക്കാനാണ് ശുപാര്‍ശ. ശരി ഉത്തരത്തിന് നാലും തെറ്റുത്തരത്തിന് ഒരു നെഗറ്റീവ് മാര്‍ക്കുമാണുള്ളത്്. മൂന്ന് ഉത്തരം ശരിയാക്കിയാല്‍ യോഗ്യതാ പട്ടികയില്‍ ഇടം പിടിക്കാമായിരുന്നു. മിനിമം മാര്‍ക്ക് ഒഴിവാക്കണമെന്ന് ഏറെക്കാലമായി സ്വാശ്രയ മാനേജ്‌മെന്റുകള്‍ ആവശ്യപ്പെടുകയാണ്.
2015ല്‍ എന്‍ട്രന്‍സ് പരീക്ഷ എഴുതിയവരില്‍ 35,851പേരാണ് മിനിമം മാര്‍ക്കില്ലാതെ റാങ്ക്‌ലിസ്റ്റില്‍ നിന്ന് പുറത്തായത്. തുടര്‍ന്ന് പ്ലസ് ടു മാര്‍ക്കിന്റെ അടിസ്ഥാനത്തില്‍ സ്വാശ്രയ സീറ്റുകളിലേക്ക് പ്രവേശനം അനുവദിക്കണമെന്ന ആവശ്യവുമായി മാനേജ്‌മെന്റ് അസോസിയേഷന്‍ രംഗത്തെത്തി.
എന്‍ജിനിയറിംഗിന് പ്രവേശനം നേടിയശേഷം കോഴ്‌സ് ഉപേക്ഷിച്ചു പോകുന്നവരില്‍ നിന്ന് പിഴ ഈടാക്കുന്നത് വേണ്ടെന്നുവയ്ക്കാനും സമിതി ശുപാര്‍ശ ചെയ്തു.
https://www.facebook.com/Malayalivartha
