ഉദ്യോഗാര്ത്ഥികള് ആശങ്കയോടെ.... ലാസ്റ്റ് ഗ്രേഡ് റാങ്ക് ലിസ്റ്റിന്റെ കാലാവധി നാളെ അവസാനിക്കും
ലാസ്റ്റ് ഗ്രേഡ് റാങ്ക്ലിസ്റ്റിന്റെ കാലാവധി നാളെ അവസാനിക്കും. ഇതുവരെ പി.എസ്.സി നിയമിച്ചത് 20 ശതമാനം പേരെ മാത്രം. ഏറ്റവും കുറഞ്ഞ യോഗ്യതയില് ഏറെ പേര്ക്ക് നിയമനം നല്കുന്ന തസ്തികയില് ഇക്കുറി ശുഷ്കനിയമനമാണ് നടന്നത്. 14 ജില്ലകളില് നിന്നായി 52,000ല് അധികം പേര് ഇടം പിടിച്ച റാങ്ക്പട്ടികയില്നിന്നും ഇതുവരെ നിയമിച്ചത് 10,440 പേരെയാണ്. ബിരുദധാരികള്ക്ക് ഈ തസ്തികയില് അവസാന അവസരമാണിത്.
കഴിഞ്ഞ റാങ്ക്പട്ടികക്ക് മൂന്നുമാസം കാലാവധി നീട്ടിനല്കിയതും തെരഞ്ഞെടുപ്പിന്റെ പശ്ചാത്തലത്തില് രണ്ടുമാസം നിയമനനിരോധം നിലനിന്നതും ഉദ്യോഗാര്ഥികള്ക്ക് തിരിച്ചടിയായി. അതുകൊണ്ട് തന്നെ പ്രായപരിധി കഴിഞ്ഞവര്ക്ക് മറ്റു പ്രതീക്ഷകള് ഇല്ലാത്ത സാഹചര്യത്തില് റാങ്ക്പട്ടികയുടെ കാലാവധി നീട്ടണമെന്നാണ് ഉദ്യോഗാര്ഥികളുടെ ആവശ്യം. 2013 ഡിസംബര് 31നാണ് പി.എസ്.സി ലാസ്റ്റ്ഗ്രേഡ് പരീക്ഷ വിജ്ഞാപനം പുറപ്പെടുവിച്ചത്.
2015 ജൂണ് 28ന് റാങ്ക്ലിസ്റ്റ് നിലവില് വന്നുവെങ്കിലും നിയമനം നടക്കാന് സമയമെടുത്തു. തിരുവനന്തപുരത്താണ് അധിക നിയമനം നടന്നത്. കഴിഞ്ഞ ചൊവ്വാഴ്ച വരെ 1468 പേരെ ഇവിടെ നിയമിച്ചു കഴിഞ്ഞു. രണ്ടാം സ്ഥാനം പാലക്കാടിനാണ് (938). മൂന്നാമത് കോഴിക്കോടും (913). വയനാടാണ് നിയമനം ഏറ്റവും കറവ് നടന്നത് (331). കുറവില് രണ്ടാം ജില്ല കാസര്കോടാണ് (409). പത്തനംതിട്ടയാണ് (570) മൂന്നാമത്. എറണാകുളം (864), തൃശൂര് (849), കൊല്ലം (825), മലപ്പുറം (795), കണ്ണൂര് (700), ആലപ്പുഴ (614), കോട്ടയം (588), ഇടുക്കി (576) എന്നിങ്ങനെയാണ് മറ്റ് ജില്ലകളിലെ നിയമനം.
https://www.facebook.com/Malayalivartha