അമ്മയില്‍ എല്ലാ കാര്യങ്ങളും പോസിറ്റീവാക്കിയത് പ്രസിഡന്റ് മോഹന്‍ലാലിന്റെ മാജിക്. എല്ലാവരെയും ഒരുമിച്ച് കൊണ്ടുപോവുകയാണ് തന്റെ നയെന്ന് മോഹന്‍ലാല്‍ വ്യക്തമാക്കിയതോടെ ഗണേഷനും മുകേഷും ഇടവേളബാബുവും പത്തിമടക്കി മര്യാദരാമന്‍മാരായി ഇരുന്നു. മുകേഷും ഗണേഷും മാധ്യമങ്ങളോട് മോശമായി പെരുമാറിയതിലൂടെ സംഘടനയ്ക്കുണ്ടായ പേര് ദോഷം ആവര്‍ത്തിക്കാതിരിക്കാനാണ് ശ്രമം. സംഘടനയുടെ ബൈലോ അടക്കം മാറ്റണമെന്ന നടന്‍ ജോയി മാത്യുവിന്റെ ആവശ്യം സംഘടന ഗൗരവമായി പരിഗണിക്കും. ദിലീപിനൊപ്പം നിന്ന് സംഘടനയെ വീണ്ടും വെട്ടിലാക്കാനുള്ള മുകേഷിന്റെയും ഗണേഷിന്റെയും ഇടവേളബാബുവിന്റെയും ശ്രമങ്ങള്‍ മങ്ങിയതോടെയാണ് രഹസ്യബാലറ്റ് ഉള്‍പ്പെടെയുള്ള കാര്യങ്ങള്‍ ജനറല്‍ ബോഡിയില്‍ ഉപയോഗിക്കാന്‍ തീരുമാനിച്ചത്. 

പത്തനാപുരം തെരഞ്ഞെടുപ്പ് വിവാദങ്ങളെ തുടര്‍ന്ന് സംഘടനയില്‍ നിന്ന് അകന്ന് നിന്നിരുന്ന ജഗദീഷിനെ സജീവമാക്കുന്നതിന് പിന്നിലും മോഹന്‍ലാലിന്റെ മാന്ത്രികതയുണ്ടായിരുന്നു. ജഗദീഷ് ഇത്തവണ ഭാരവാഹിയാകാന്‍ തീരുമാനിച്ചിരുന്നില്ല. എന്നാല്‍ മോഹന്‍ലാല്‍ ഉള്‍പ്പെടെയുള്ളവര്‍ ഇടപെട്ട് അദ്ദേഹത്തെ നേതൃത്വത്തിലേക്ക് കൊണ്ടുവരുകയായിരുന്നു. മമ്മൂട്ടിയും മോഹന്‍ലാലും ദിലീപും മുകേഷും ഗണേഷും അടക്കമുള്ള ചിലര്‍ക്ക് വേണ്ടി പലകാര്യങ്ങളിലും വിട്ടുവീഴ്ച ചെയ്തിരുന്നു. അവര്‍ ചെയ്ത് കൂട്ടിയ ചില കാര്യങ്ങള്‍ക്ക് ഇരുവരും പഴികേള്‍ക്കേണ്ടി വന്നു. അതില്‍ മനംമടുത്താണ് മമ്മൂട്ടി ഭാരവാഹിത്വം ഒഴിഞ്ഞത്. 

സംഘടനയില്‍ ഇപ്പോഴും ചില പ്രശ്‌നങ്ങള്‍ നിലനില്‍പ്പുണ്ടെന്ന് ഇന്നലെ നടത്തിയ വാര്‍ത്താസമ്മേളനത്തില്‍ മോഹന്‍ലാല്‍ വ്യക്തമായ സൂചന നല്‍കി. അത് പരിഹരിച്ച് എല്ലാവരേയും ഒരുമിച്ച് കൊണ്ടുപോകാന്‍ ശ്രമിക്കും ഇല്ലെങ്കില്‍ രാജിവയ്ക്കുമെന്നും പറഞ്ഞത് അതുകൊണ്ടാണ്. പുതിയ തീരുമാനങ്ങളോട് ഗണേഷ്‌കുമാറിന് യോജിപ്പില്ല, താരസംഘടനയില്‍ പൊതുജനങ്ങള്‍ക്കും മാധ്യമങ്ങള്‍ക്കും എന്താണ് കാര്യമെന്ന് ഗണേഷ് പലതവണ ആവര്‍ത്തിച്ചിരുന്നു. എന്നാല്‍ മാധ്യമങ്ങളില്‍ നിന്ന് ഒളിച്ചോടാനില്ലെന്ന ശക്തമായ നിലപാടിലാണ് മോഹന്‍ലാല്‍. ഇന്നലെ എക്‌സിക്യൂട്ടീവ് നടന്ന ഹാളിലേക്ക് മാധ്യമങ്ങളെ ക്ഷണിച്ചതും പിന്നീട് പത്രസമ്മേളനം അവിടെ തന്നെ നടത്തിയതും ഇതിന്റെ ആദ്യപടിയാണ്. വാര്‍ത്താസമ്മേളനത്തില്‍ മുകേഷ് മൗനംപാലിക്കുകയും ജഗദീഷ് സ്‌കോര്‍ ചെയ്യുകയും ചെയ്തു എന്നത് ശ്രദ്ധേയമാണ്. 

പരാതി നല്‍കിയ രേവതി, പാര്‍വതി, പത്മപ്രിയ എന്നിവര്‍ സന്തോഷത്തോടെയാണ് ചര്‍ച്ച കഴിഞ്ഞ് തിരിച്ചിറങ്ങിയത്. അത് പോലെ രാജിവെച്ച നടിമാരെ തിരികെ കൊണ്ടുവരാന്‍ ശ്രമിക്കും എന്ന് പറഞ്ഞതും ദിലീപിനും ഗണേഷിനും വലിയ തിരിച്ചടിയാണ്. രാജിവെച്ച രമ്യാനമ്പീശന്‍, റിമകല്ലിങ്കല്‍, ഭാവന, ഗീതുമോഹന്‍ദാസ് എന്നിവര്‍ സ്ഥിരം പ്രശ്‌നക്കാരാണെന്നാണ് ഗണേഷ് ആരോപിച്ചിരുന്നത്. ഇവര്‍ രാജിവെച്ചപ്പോള്‍ ദിലീപിന്റെ ബാല്യകാല സുഹൃത്തും അത് വഴി ദിലീപ് ചിത്രമായ അവതാരത്തിന് തിരക്കഥ എഴുതുകയും ചെയ്ത വ്യാസന്‍ എടവനക്കാട് പറഞ്ഞത് 514- 4 = 0 അമ്മ തകര്‍ന്നു എന്നാണ്. ആ നാല് പേരെ തിരിച്ചെടുക്കാന്‍ ആലോചിക്കുമെന്നും അവരുടെ അഭിപ്രായം ആരായുമെന്നും മോഹന്‍ലാല്‍ പറഞ്ഞത് വ്യാസനെ പോലുള്ള ദിലീപ് കൂടാരത്തിലുള്ളവര്‍ക്കുള്ള ചുട്ടമറുപടിയാണ്.