മലയാള സിനിമയെ പല നിരൂപകരും വിശേഷിപ്പിക്കുന്നത് മണിച്ചിത്രത്താഴിനു മുന്‍പും ശേഷവും എന്നാണ്. അത്രയേറെ മലയാള സിനിമ ചരിത്രത്തില്‍ ഇടംനേടിയ ചിത്രമാണ് ഫാസിലിന്റെ മണിച്ചിത്രത്താഴ്. കഥ, തിരക്കഥ, സംവിധാനം, അഭിനേതാക്കളുടെ സമ്പന്നത എന്നു തുടങ്ങി എല്ലാം തികഞ്ഞ മലയാളചിത്രം. വര്‍ഷങ്ങള്‍ കഴിയുംതോറും പുതിയ മാനങ്ങള്‍ സ്വന്തമാക്കുന്ന മണിച്ചിത്രത്താഴ് 25-ാം വയസ്സിന്റെ നിറവിലെത്തിയിരിക്കുകയാണ്.

ഈ ഡിസംബറില്‍ 25 വര്‍ഷം പൂര്‍ത്തിയാകുമ്പോള്‍ സിനിമയെക്കുറിച്ചുള്ള ഓര്‍മ്മകള്‍ പങ്കുവെച്ചിരിക്കുകയാണ് നടി ശോഭന. ശോഭനയ്ക്ക് ആ വര്‍ഷത്തെ മികച്ച നടിക്കുള്ള സംസ്ഥാന-ദേശീയ അവാര്‍ഡുകള്‍ മണിച്ചിത്രത്താഴിലൂടെ ലഭിച്ചിരുന്നു. ഫെയ്‌സ്ബുക്കിലൂടെയാണ് ഗംഗയുടെ ഓര്‍മ്മകള്‍ നടി വീണ്ടും പങ്കുവെച്ചത്.

'എല്ലാ മീഡിയ സുഹൃത്തുക്കള്‍ക്കും എക്കാലത്തെയും എന്റെ പ്രിയ ചിത്രമായ മണിച്ചിത്രത്താഴിന്റെ ഫാന്‍സിനും, മാര്‍ഗഴി ഫെസ്റ്റിവലുമായി ഞാന്‍ ചെന്നൈയില്‍ തിരക്കിലാണ്. അതാണ് നിങ്ങളുടെ അന്വേഷണങ്ങള്‍ക്ക് മറുപടി തരാന്‍ കഴിയാതെ പോയത്. ക്ഷമ ചോദിക്കുന്നു. വര്‍ഷങ്ങളിത്ര കഴിഞ്ഞിട്ടും ആ സിനിമ ആളുകള്‍ മറന്നിട്ടില്ലെന്നതും കൂടുതല്‍ അഭിനന്ദനങ്ങള്‍ നേടുന്നതും വലിയ കാര്യമാണ്. ശരിക്കും വിസ്മയകരമായി തോന്നുന്നു. എനിക്കു മാത്രമല്ല സിനിമയിലെ മറ്റ് ആര്‍ട്ടിസ്റ്റുകള്‍, സംവിധായകന്‍, ടെക്‌നീഷ്യന്മാര്‍ എന്നിവര്‍ക്കും സമാന അനുഭവമായിരിക്കുമെന്ന് കരുതുന്നു. അവരോടെല്ലാം എന്റെ സ്‌നേഹവും ബഹുമാനവും' ശോഭന കുറിച്ചു.

1993 ഡിസംബറില്‍ റിലീസ് ചെയ്ത ചിത്രം 1994 ഡിസംബര്‍ വരെ ഓടി 365 ദിവസമോടിയ ചിത്രമെന്ന റെക്കോര്‍ഡിട്ടു. തമിഴ്, തെലുങ്ക്, കന്നട, ഹിന്ദി, ബംഗാളി ഭാഷകളിലേയ്‌ക്കൊക്കെ റീമേക്ക് ചെയ്‌തെങ്കിലും ക്ലാസിക് വിജയമായത് മലയാളമാണ്. മോഹന്‍ലാല്‍, സുരേഷ് ഗോപി, ശോഭന, ഇന്നസെന്റ്, കെപിഎസി ലളിത, പപ്പു, നെടുമുടിവേണു തുടങ്ങി മലയാളത്തിലെ മികച്ച താരനിര തന്നെ ചിത്രത്തിലുണ്ടായിരുന്നു.