ഒടിയനെ ഒടിച്ചു: 'ഞാന് പ്രകാശന്' 50 കോടി ക്ലബ്ബില്
ചെറിയ സിനിമകള് 50 കോടി നൂറു കോടി ക്ലബ്ബില് ഇടം നേടുന്നത് ഇന്ത്യന് സിനിമയില് സാധാരണ സംഭവമായി മാറിയെങ്കിലും മലയാളത്തിനിത് അന്യമായിരുന്നു. എന്നാല് ആ ചരിത്രം തിരുത്തി അത്ഭുതം കുറിച്ചിരിക്കുകയാണ് സത്യന് അന്തിക്കാട്-ശ്രീനിവാസന് കൂട്ടുകെട്ടിലൊരുങ്ങിയ ഫഹദ് ഫാസില് ചിത്രം 'ഞാന് പ്രകാശന്'. ഒടിയന് പോലെയുള്ള വമ്പന് ചിത്രങ്ങളോട് പൊരുതിയാണ് പ്രകാശന് ഈ നേട്ടമുണ്ടാക്കിയതെന്നതും ശ്രദ്ധേയം.
ബോക്സോഫീസില് നിന്നും തുടക്കം മുതല്ത്തന്നെ സിനിമയ്ക്ക് മികച്ച പ്രതികരണമായിരുന്നു ലഭിച്ചത്. കലക്ഷനിലും അത് പ്രകടമായിരുന്നു. ശ്രീനിവാസന്റെ തിരക്കഥയാണ് സിനിമയുടെ മറ്റൊരു മുഖ്യ ആകര്ഷണ ഘടകം. ക്രിസ്മസ് റിലീസുകളില് നേട്ടം കൊയ്തത് ഞാന് പ്രകാശനാണെന്നുള്ള റിപ്പോര്ട്ടുകളാണ് ഇപ്പോള് പുറത്തുവന്നിട്ടുള്ളത്. സിനിമ 50 കോടി ക്ലബില് ഇടം നേടിയെന്നാണ് ട്രേഡ് അനലിസ്റ്റുകളുടെ വിലയിരുത്തല്. 16 വര്ഷങ്ങള്ക്കു ശേഷം സത്യന് അന്തിക്കാടിന്റെയും-ശ്രീനിവാസന്റെയും വരവ് അങ്ങനെ ചരിത്രമായി.
ക്രിസ്തുമസ് റിലീസായാണ് പ്രകാശനെത്തിയത്. ഫുള്മൂണ് ഫിലിംസിന്റെ ബാനറില് സേതു മണ്ണാര്ക്കാടാണ് സിനിമ നിര്മ്മിച്ചത്. വേള്ഡ് വൈഡ് റിലീസ് കളക്ഷന് റിപ്പോര്ട്ടുകള് പ്രകാരം 50 കോടിക്ക് മുകളില് ചിത്രം നേടി കഴിഞ്ഞു. വരത്തനിലൂടെ അമ്പരപ്പിച്ച ഫഹദ് പ്രകാശനാകുമ്പോള് കാണാന് കഴിയുന്നത് ഏതു തരം കഥാപാത്രത്തെയും തന്മയത്വത്തോടെ അവതരിപ്പിക്കാനാകുന്ന ഫഹദിന്റെ അഭിനയ മികവാണ്. 2002-ല് ഇറങ്ങിയ യാത്രക്കാരുടെ ശ്രദ്ധയ്ക്കാണ് സത്യന്-ശ്രീനി കൂട്ടുകെട്ടിലിറങ്ങിയ അവസാന ചിത്രം. ടിപി ബാലഗോബാലന് എംഎ, സന്മനസുള്ളവര്ക്ക് സമാധാനം, ഗാന്ധിനഗര് സെക്കന്റ് സ്ട്രീറ്റ്, പട്ടണപ്രവേശം, നാടോടിക്കാറ്റ്, വരവേല്പ്പ്, തലയണമന്ത്രം, സന്ദേശം തുടങ്ങിയവയൊക്കെ മലയാള സിനിമയ്ക്ക് സത്യനും ശ്രീനിയും നല്കിയ ഏറ്റവും വലിയ സമ്മാനങ്ങളാണ്. ഇതിലേയ്ക്കിപ്പോള് വന് വിജയം നേടി പ്രകാശനും എത്തിയിരിക്കുന്നു.
16 വര്ഷത്തിനിപ്പുറം ഇരുവരും ഒന്നിച്ച് സിനിമ പ്രഖ്യാപിച്ചപ്പോള് നായകനായി മോഹന്ലാല് എത്തുമെന്നായിരുന്നു വാര്ത്തകള്. എന്നാല് ഫഹദ് ഫാസിലിനൊപ്പമാണ് ഇത്തവണ തങ്ങള് വരുന്നതെന്ന് സത്യന് അന്തിക്കാട് തന്നെ വ്യക്തമാക്കിയതോടെയാണ് ആശയക്കുഴപ്പം മാറിയത്. ഒരു ഇന്ത്യന് പ്രണയകഥയ്ക്കു ശേഷം അന്തിക്കാടും ഫഹദ് ഫാസിലും ഒന്നിച്ച ചിത്രമാണ് പ്രകാശന്. മോഹന്ലാലിന്റെ അഭിനയ മികവിനോടാണ് ഫഹദ് ഫാസിലിന്റെ അഭിനയത്തെ സത്യന് അന്തിക്കാട് വിശേഷിപ്പിച്ചത്. ക്യാമറയ്ക്കു മുന്നില് അത്ഭുതം കാണിക്കുന്ന നടനെന്നാണ് ഫഹദിനെ പറഞ്ഞത്. ഇത് പ്രേക്ഷകരും അംഗീകരിക്കുന്നു. അത്രയേറെ പ്രകാശന് ഫഹദിനോട് അലിഞ്ഞുചേര്ന്നിരിക്കുന്നു. പ്രകാശന് മാത്രമല്ല, ചെയ്യുന്ന എല്ലാ കഥാപാത്രങ്ങളോടും ഫഹദ് ഈ നീതി പുലര്ത്തിയിട്ടുണ്ട്.
മെഡിസിനു പഠിക്കാന് ആഗ്രഹിച്ച്, നഴ്സിങ്ങ് പഠനം പൂര്ത്തിയാക്കി ജോലിക്കൊന്നും പോകാതെയിരിക്കുന്ന പി.ആര്.ആകാശ് മലയാളിയുടെ മറ്റൊരു മുഖമാണ്. വിദേശത്ത് എന്തു ജോലിയും ചെയ്യാന് മടിക്കാത്ത അയാള് സ്വന്തം നാട്ടില് ലഭിക്കുന്ന മാന്യമായ തൊഴില് പോലും സ്വീകരിക്കാന് ഇഷ്ടപ്പെടില്ല. അറബിയുടെ ശുചിമുറി കഴുകാന് മടിക്കാത്ത അയാള്ക്ക് ഇവിടെ വിയര്പ്പിന്റെ അസുഖമാണ്. നാട്ടില് വൈറ്റ് കോളര് ജോലിയില്ലെങ്കില് വെറുതിയിരിക്കാന് ഒരുമടിയുമില്ല. അച്ഛനമ്മമാരിട്ട പ്രകാശ് എന്ന പേര് പിടിക്കാത്തതിനാല് ഗസറ്റില് കൊടുത്ത് പി ആര് ആകാശ് എന്നാക്കി മാറ്റുന്ന നായകന്, പതിവു പോലെ മലയാളിയെ തന്നെ മലയാളിക്ക് കാണിച്ചു കൊടുത്ത് കയ്യടി വാങ്ങിയിരിക്കുകയാണ് ശ്രീനിവാസന്.
ഫഹദ് ഫാസില്, നിഖില വിമല്, ശ്രീനിവാസന്, കെപിഎസി ലളിത തുടങ്ങി മികച്ച താരനിരയാണ് ചിത്രത്തില്. എസ് കുമാറാണ് ചിത്രത്തിന്റെ ഛായാഗ്രാഹകന്, ഷാന് റഹ്മാനൊരുക്കിയ ഗാനങ്ങളും സൂപ്പര് ഹിറ്റായി.
https://www.facebook.com/Malayalivartha
