മമ്മൂട്ടി-മോഹന്ലാല് ഫാന്സ് അറിയാന്; ഉണ്ണി മുകുന്ദന് എഴുതുന്നത്
അന്നും എന്നും മലയാള സിനിമയിലെ പുതിയ താരങ്ങള് നേരിടുന്ന ഒരു ക്ലിഷേ ചോദ്യമുണ്ട് . മമ്മൂട്ടിയെ ആണോ മോഹന്ലാലിനെ ആണോ ഇഷ്ട്ടം?. മോഹന്ലാല് മമ്മൂട്ടി ഫാന്സിനു സോഷ്യല് മീഡിയയിലൂടെ ഒരു തുറന്ന കത്തെഴുതി കൊണ്ട് ഇവര് ഇരുവര്ക്കും താന് ഒരു വേര്തിരിവും വച്ചിട്ടില്ല എന്ന് പറയുകയാണ് ഉണ്ണി മുകുന്ദന്.
ലാലേട്ടന്റെയും മമ്മൂക്കയുടെയും കഥാപാത്രങ്ങള് കണ്ട് അതൊരു പ്രചോദനമാക്കിയാണ് ഞാനും എന്റെ സിനിമ ജീവിതം തുടങ്ങിയത്. എന്നെ പോലൊരു ചെറിയ നടന് ഇവരില് ആരുടെ ഫാന് ആണ് എന്നതിന്റെ പേരില് ഓണ്ലൈനില് കണ്ട ചില ചേരിതിരിവും തര്ക്കവും വല്ലാതെ വേദനിപ്പിച്ചു എന്ന് ഉണ്ണി പറയുന്നു.
ഉണ്ണി മുകുന്ദന്റെ തുറന്ന് കത്ത് ഇങ്ങനെ;
പ്രിയപ്പെട്ട മമ്മൂക്ക ആന്ഡ് ലാലേട്ടന് ഫാന്സ് അറിയുന്നതിന്,
സിനിമ എന്ന വലിയ ലോകത്തേക്ക് അഭിനയം എന്ന കല ആധികാരികമായി പഠിക്കാതെയും, യാതൊരു സിനിമ പാരമ്പര്യവും ഇല്ലാതെയും
എത്തിയ എനിക്ക്, അറിവിന്റെ, അനുഭവത്തിന്റെ പാഠപുസ്തകങ്ങള് ആയി എന്നും കൂടെ ഉണ്ടായിരുന്നത് മമ്മുക്കയും ലാലേട്ടനും ആണ്. അവര് വെള്ളിത്തിരയില് അനശ്വരമാക്കിയ അനവധി കരുത്തുറ്റ കഥാപാത്രങ്ങളെ കണ്ട് പ്രചോദനം ഉള്ക്കൊണ്ടാണ് ഞാനും എന്റെ സിനിമ ജീവിതം തുടങ്ങിയത്. സിനിമയെ സ്നേഹിക്കുന്ന എല്ലാവരെയും പോലെ ഈ രണ്ടു അതുല്യകലാകാരന്മാരെയും ഒരുപാട് ആരാധിക്കുകയും ബഹുമാനിക്കുകയും ചെയ്യുന്ന ഒരു വ്യക്തിയെന്ന നിലയില്, എന്റെ ശ്രദ്ധയില്പെട്ട ചില കാര്യങ്ങള് വളരെ വിഷമിപ്പിച്ചു. എന്നെ പോലെ ചെറിയ ഒരു ആര്ട്ടിസ്റ് ഇവരില് ആരുടെ ഫാന് ആണെന്ന വിഷയത്തിന്റെ പേരില് ഓണ്ലൈനില് കഴിഞ്ഞ രണ്ടു ദിവസങ്ങള് ആയി കാണുന്ന അനാരോഗ്യകരമായ സംഭാഷണങ്ങളും വ്യക്തി ഹത്യകളും ഒരിക്കലും അംഗീകരിക്കാന് ആവില്ല. ഒരു വ്യക്തി എന്ന നിലയിലും നടന് എന്ന നിലയിലും എന്നെ ഒരുപാട് സ്വാധീനിച്ച വ്യക്തികളാണ് ഇവര് രണ്ടു പേരും. ശ്രീ മമ്മൂട്ടിയും ശ്രീ മോഹന്ലാലും എക്കാലവും അഭിനയത്തിന്റെ പകരക്കാരില്ലാത്ത ഉദാഹരണങ്ങളാണ്. മലയാള സിനിമയെ സ്നേഹിക്കുന്ന സാധാരണക്കാരനായ ഒരു മലയാളി പ്രേക്ഷകന് എന്ന നിലയിലും, അഭിനേതാവ് എന്ന നിലയിലും ഒരു രീതിയില് ഉള്ള വേര്തിരിവും ഇവരോട് എനിക്കില്ല. ഈ ഒരു വിഷയത്തിന്റെ പേരില് ഉള്ള ചേരി തിരിഞ്ഞുള്ള വെറുപ്പും വിധ്വേഷവും ഒരുപാട് വേദനിപ്പിക്കുന്നുണ്ട്. കല ദൈവീകമാണ്, ഇവര് അനുഗ്രഹീതരായ കലാകാരന്മാരും. നമ്മുടെ ഇടയിലെ അഭിപ്രായ വ്യത്യാസങ്ങളിലേക്ക് നമ്മുടെ അഭിമാനമായ ഈ കലാകാരന്മാരെ നമുക്ക് വലിച്ചിഴക്കാതെ ഇരിക്കാം. അതവരോട് നമ്മള് കാണിക്കുന്ന മാപ്പില്ലാത്ത അനാദരവാണ്. രണ്ടു പേരെയും ഇത്രയും കാലം നമ്മള് എങ്ങനെ സ്നേഹത്തോടെയും ബഹുമാനത്തോടെയും ചേര്ത്ത് നിര്ത്തിയോ, അത് തുടര്ന്നും നമുക്ക് ചെയ്യാം. മിഖായേല് എന്ന സിനിമ റിലീസ് ആകാന് ഇനി വളരെ കുറച്ച ദിവസങ്ങള് മാത്രമേയുള്ളു. ഈ ഒരു അവസരത്തില്, തികച്ചും ദൗര്ഭാഗ്യകരമായ ഇത്തരത്തിലുള്ള ഒരു സംഭവം, ഒരുപാട് വേദനിപ്പിച്ചത് കൊണ്ടാണ് ഈ തുറന്നെഴുത്. ഇനിയും ഒരുപാട് നല്ല സിനിമകള് എല്ലാവര്ക്കും ഉണ്ടാവട്ടെ.
സ്നേഹത്തോടെ,
ഉണ്ണി മുകുന്ദന്
https://www.facebook.com/Malayalivartha
