പ്രേമത്തിന്റെ വ്യാജന്‍ കാനഡയില്‍ നിന്നെന്ന് പോലീസ്. നിവിന്‍ പോളി നായകനായി തിയേറ്ററുകളില്‍ ഇപ്പോഴും നിറഞ്ഞോടുന്ന പ്രേമം സിനിമയുടെ സെന്‍സര്‍ പതിപ്പ് സൈബര്‍ ലോകത്ത് എത്തിയത് കാനഡയില്‍നിന്ന്. സിനിമയുടെ നിര്‍മാതാവ് അന്‍വര്‍ റഷീദിന്റെ പരാതിയില്‍ വ്യാജനെ തപ്പിയിറങ്ങിയ സൈബര്‍ സെല്ലാണ് വാര്‍ത്ത പുറത്തുവിട്ടത്. സംഭവത്തില്‍ എഫ്‌ഐആര്‍ രജിസ്റ്റര്‍ ചെയ്ത് അന്വേഷണം ആരംഭിക്കുന്നതിന് സൈബര്‍ സെല്‍ ഡിജിപിയോട് അനുമതി ചോദിച്ചു.
\'പ്രേമം\', ഹിറ്റ് പട്ടികയില്‍ ഇടം പിടിക്കുമെന്ന നിരീക്ഷകരുടെ പ്രതികരണങ്ങള്‍ക്ക് പിന്നാലെയാണ് ചിത്രത്തിന്റെ വ്യാജ പതിപ്പ് ഇന്റര്‍നെറ്റില്‍ പ്രദര്‍ശനമാരംഭിച്ചത്. ചിത്രത്തിന്റെ സെന്‍സര്‍ കോപ്പി ലീക്കായത് അണിയറ പ്രവര്‍ത്തകരെയും അധികൃതരെയും ഒരുപോലെ ഞെട്ടിച്ചു. ആദ്യം യുട്യൂബിലെത്തിയ വ്യാജനെ പിന്നീട് നീക്കം ചെയ്‌തെങ്കിലും നിരവധി വെബ്‌സൈറ്റുകള്‍ വഴി ചിത്രം പ്രചരിച്ചുകൊണ്ടിരുന്നു. സംഭവത്തിന് പിന്നാലെ മലയാള സിനിമകളുടെ പൈറസി കാത്തുസൂക്ഷിക്കുന്നതില്‍ മലയാള സിനിമാ സംഘടനകള്‍ പരാജയപ്പെട്ടുവെന്ന കടുത്ത വിമര്‍ശനവുമായി സംവിധായകനും നിര്‍മാതാവുമായ അമല്‍ നീരദ് രംഗത്തെത്തിയിരുന്നു.
വ്യാജന്‍ വ്യാപകമായതോടെ സിനിമയുടെ കളക്ഷനില്‍ വന്‍ ഇടിവ് സംഭവിച്ചതായി നിര്‍മ്മാതാവ് പറഞ്ഞു. പൈറസിക്കെതിരെ ശക്തമായി നിലപാടെടുത്തില്ലെങ്കില്‍ അത് മലയാള സിനിമയുടെ അന്ത്യമാകുമെന്നും നിര്‍മ്മാതാവ് ആരോപിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha