പ്രേമം സിനിമയുടെ വ്യാജ പതിപ്പ് പുറത്തുവിട്ടതുമായി ബന്ധപ്പെട്ട് ചിത്രത്തിന്റെ അണിയറ പ്രവര്‍ത്തകരെയും സെന്‍സര്‍ ബോര്‍ഡ് അംഗങ്ങളെയും ചോദ്യം ചെയ്യും. എഡിറ്റിങ് മുതല്‍ സെന്‍സറിങ് വരെയുള്ള ജോലികള്‍ ചെയ്തവരെയാണ് ആന്റി പൈറസി സെല്‍ ചോദ്യം ചെയ്യുക. ചോദ്യം ചെയ്യലിന് ഹാജരാകാന്‍ ചിത്രത്തിന്റെ അണിയറ പ്രവര്‍ത്തകര്‍ക്ക് ആന്റി പൈറസി സെല്‍ നിര്‍ദേശം നല്‍കി.
കഴിഞ്ഞ ദിവസം സംവിധായകന്‍ പ്രിയദര്‍ശന്‍ സെന്‍സര്‍ബോര്‍ഡിനെതിരെ രംഗത്ത് വന്നിരുന്നു. സെന്‍സര്‍ബോര്‍ഡില്‍ നിന്നാണ് സിനിമ ചോര്‍ന്നതന്നും പ്രിയദര്‍ശന്‍ ആരോപിച്ചു. തിയറ്ററുകളില്‍ നിറഞ്ഞ സദസില്‍ പ്രദര്‍ശനം തുടരുന്നതിനിടെയാണ് സിനിമയുടെ പൂര്‍ണ രൂപം ഇന്റര്‍നെറ്റ് വഴിയും മൊബൈല്‍ ഫോണ്‍ വഴിയും പ്രചരിച്ചത്. ചിത്രത്തിന്റെ സെന്‍സര്‍ കോപ്പിയാണ് പുറത്തുവന്നത്. സ്മാര്‍ട്ട് ഫോണുകള്‍ വഴിയും പെന്‍ഡ്രൈവുകളിലും കമ്പ്യൂട്ടറുകളിലും കോപ്പിയെടുത്തുമായിരുന്നു വ്യാജന്റെ കൈമാറ്റം. വിപണികളിലും ചിത്രത്തിന്റെ വ്യാജപതിപ്പും സുലഭമായിരുന്നു. ഇതുമായി ബന്ധപ്പെട്ട് അന്വേഷണം നടത്തണമെന്ന ആവശ്യത്തില്‍ ആന്റി പൈറസി സെല്‍ കര്‍ശന പരിശോധന നടത്തിയിരുന്നു. വ്യാജപതിപ്പ് പ്രചരിപ്പിച്ച നിരവധി പേരെ അറസ്റ്റു ചെയ്യുകയും ചെയ്തു.
വ്യാജപതിപ്പിനെപ്പറ്റി സെന്‍സര്‍ ബോര്‍ഡും അന്വേഷണം ആരംഭിച്ചു. ഇതിനായി ചെയര്‍മാന്‍ പഹ്‌ലജ് നിഹലാനി ഒരാഴ്ചയ്ക്കകം കേരളത്തിലെത്തും. സര്‍ട്ടിഫൈഡ് കോപ്പി ചോര്‍ന്നത് ഗൗരവത്തോടെയാണ് കാണുന്നതെന്ന്് സെന്‍സര്‍ ബോര്‍ഡ് അധികൃതര്‍ അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha