തീയ്യേറ്റര്‍ ഉടമകളുടെ സംഘടനയായ ഫിയോക്കിനെതിരെ ദുല്‍ക്കര്‍ സല്‍മാന്‍ ഫാന്‍സ് അസോസിയേഷന്‍ രംഗത്ത്. ചതി നടത്തിയത് ദുല്‍ഖറല്ല മറിച്ച് ഫിയോക്കാണെന്നാണ് ദുല്‍ഖര്‍ സല്‍മാന്‍ ഫാന്‍സ് അസോസിയേഷന്റെ സ്റ്റേറ്റ് പ്രസിഡന്റായ ഡി.ക്യൂ ഷാരൂഖ് മലയാളി വാര്‍ത്തയോട് പ്രതികരിച്ചത്. 'കുറുപ്പ് സിനിമ 50 ശതമാനം ഒക്കുപന്‍സിയില്‍ നല്ല തിരക്കിലാണ് തീയ്യേറ്ററുകളില്‍ ഓടിയിരുന്നത്. എന്നാല്‍ ഫിയോക്ക് സംഘടനയുടെ കീഴിലുള്ള തീയ്യേറ്ററുകള്‍ 100 ശതമാനം ഒക്കുപന്‍സിയില്‍ ആളെ കയറ്റി 50 ശതമാനം ആളുകളുടെ കണക്ക് മാത്രമേ പുറത്തുവിട്ടിരുന്നുള്ളൂ'-- ഡി.ക്യൂ ഷാരൂഖ് പറഞ്ഞു.

എന്നാല്‍ എന്തുകൊണ്ടാണ് ദുല്‍ഖറിനെതിരെ ഫിയോകിന്റെ ഭാഗത്ത് നിന്ന് ഇത്തരം ഒരു നിലപാട് ഉണ്ടായത് എന്ന കാര്യം വ്യക്തമല്ല. എന്നിരുന്നാലും മോഹന്‍ലാല്‍, പൃഥ്വിരാജ് തുടങ്ങിയ മറ്റ് താരങ്ങളുടെ ചിത്രങ്ങള്‍ ഒടിടി പ്ലാറ്റ്‌ഫോമില്‍ റിലീസ് ചെയ്തപ്പോള്‍ ഇല്ലാത്ത പ്രശ്‌നം ഇപ്പോള്‍ ഉണ്ടായതില്‍ തങ്ങള്‍ക്ക് സംശയമുണ്ടെന്നും ഷാരൂഖ് ചൂണ്ടിക്കാട്ടി. ദുല്‍ഖറിന്റെ വളര്‍ച്ച ഇഷ്ടമില്ലാത്തവരുടെ കരങ്ങള്‍ ഇതിന് പിന്നില്‍ പ്രവര്‍ത്തിച്ചിട്ടുണ്ടാകാം എന്നും സ്റ്റേറ്റ് പ്രസിഡന്റായ ഡി.ക്യൂ ഷാരൂഖ് മലയാളി വാര്‍ത്തയോട് അഭിപ്രായപ്പെട്ടു.

ധാരണകളും വ്യവസ്ഥകളും ലംഘിച്ചാണ് സല്യൂട്ട് എന്ന സിനിമ ഒടിടിക്ക് നല്‍കിയതെന്നും താരങ്ങള്‍ നന്ദികേട് കാണിക്കുന്നു എന്നുമുള്ള ഫിയോക് പ്രസിഡന്റ് കെ.വിജയകുമാറിന്റെ പ്രസ്താവനയും ഷാരൂഖ് തള്ളിക്കളഞ്ഞു. സല്യൂട്ട് യഥാര്‍ത്ഥത്തില്‍ തീയേറ്ററിലും അതിന് പിന്നാലെ ഒടിടിയിലും റിലീസ് ചെയ്യാനായിരുന്നു തീരുമാനിച്ചിരുന്നത്. ജനുവരിയില്‍ തീയേറ്ററുകളില്‍ വരാനിരുന്നതുമാണ്. എന്നാല്‍ അതിനിടെ കൊവിഡ് വന്നതോടെ എല്ലാ പദ്ധതികളും താറുമാറാകുകയാണ് ഉണ്ടായത്. അങ്ങനെയാണ് കാര്‍ പ്രകാരം ഒടിടി റിലീസിലേക്ക് എത്തിയത്. മാത്രമല്ല സിനിമ മാര്‍ച്ച് 18 ന് തന്നെ റിലീസ് ചെയ്യുമെന്നും അദ്ദേഹം പറഞ്ഞു.

കഴിഞ്ഞ ദിവസമാണ് ദുല്‍ഖറിന്റെ ചിത്രങ്ങള്‍ ഇനി തിയേറ്ററില്‍ പ്രദര്‍ശിപ്പിക്കില്ല എന്ന് ഫിയോക് അറിയിച്ചത്. കൂടാതെ തുടര്‍ച്ചയായി ഒടിടിയിലേക്ക് സിനിമ നല്‍കുന്ന താരങ്ങള്‍ ഭാവി സിനിമകളും ഒടിടിയിലേക്ക് നല്‍കിയാല്‍ മതിയെന്ന രീതിയിലാണ് കെ.വിജയകുമാര്‍ കഴിഞ്ഞ ദിവസം പ്രതികരിച്ചത്. എന്തായാലും 30 ന് ചേരുന്ന ചേരുന്ന ഫിയോക് ജനറല്‍ ബോഡി യോഗത്തില്‍ വ്യക്തമായ ഒരു ധാരണ ഉണ്ടായേക്കും.

വാര്‍ത്തയുടെ പൂര്‍ണ്ണരൂപം കാണാം..