കലാഭവന്‍ മണിയുടെ അഭിനയനിമിഷങ്ങളിലും അന്ത്യനിമിഷത്തിലും മുഖത്ത് ചായം പൂശിയ മേക്കപ്പ്മാനാണ് ജയരാമന്‍. ഒന്നരവര്‍ഷമായി മണിക്കൊപ്പം ജയരാമനും ഉണ്ടായിരുന്നു. എന്നാല്‍ മണിയുടെ മരണവുമായി ബന്ധപ്പെട്ട് മേക്കപ്പ്മാന്‍ പൊലീസ് കസ്റ്റഡിയിലായെന്ന വാര്‍ത്തകള്‍ പ്രചരിച്ചിരുന്നു. ആ വാര്‍ത്ത തെറ്റാണെന്നും തന്നെ പൊലീസ് ചോദ്യം ചെയ്തിട്ടില്ലെന്നും ജയരാമന്‍ ഒരു സ്വകാര്യ മാധ്യമത്തോട് പറഞ്ഞു. അത്തരത്തിലുള്ളൊരു വാര്‍ത്ത തന്നെ ഞെട്ടിച്ചു, അത്രമാത്രം താന്‍ സ്‌നേഹിച്ചിരുന്ന വ്യക്തിയാണ് മണിച്ചേട്ടന്‍. അദ്ദേഹത്തിന്റെ മരണത്തില്‍ താനും ദുഖിതനാണ് എന്നാല്‍ മരണവുമായി തന്റെ പേരും വലിച്ചിഴച്ചത് വിഷമമം ഉണ്ടാക്കിയെന്നും കൂട്ടിച്ചേര്‍ത്തു.
മണിച്ചേട്ടന്റെ മരണവുമായി ബന്ധപ്പെട്ട് ചോദ്യം ചെയ്യാനായി പൊലീസ് വിളിക്കുകയോ അതേപ്പറ്റി മറ്റേതെങ്കിലും രീതിയില്‍ എന്റെ പേര് ഉയര്‍ന്നു വരികയോ ചെയ്തിട്ടില്ലെന്ന് ജയരാമന്‍ പറയുന്നു.
മണി ചേട്ടനുമായി സ്‌നേഹബന്ധം മാത്രമാണുള്ളത്. അദ്ദേഹത്തിന്റെ മരണം തന്നെ തീരാവേദനയാണ് തന്നത്. അതിനിടയിലാണ് മരണവുമായി ബന്ധപ്പെട്ട കേസില്‍ എന്റെ പേരും കൂടി ഉള്‍പ്പെട്ടതായുള്ള വാര്‍ത്തകള്‍ വന്നത്. ഈ വാര്‍ത്തകള്‍ പ്രചരിക്കുന്ന സമയത്ത് ഞാന്‍ കാസര്‍ഗോഡ് ചിത്രീകരണത്തിലായിരുന്നു. ജയസൂര്യയുടെ പുതിയ സിനിമയ 'ഇടി'യിലാണ് ഇപ്പോള്‍ പ്രവര്‍ത്തിക്കുന്നത്. എന്താണ് ഇങ്ങനെയൊരു വാര്‍ത്ത വരാനിടയിക്കായത് എന്നെനിക്കറിയില്ല. ലൊക്കേഷനില്‍ നില്‍ക്കുന്ന എന്നെ മാള പൊലീസ് ചോദ്യം ചെയ്യുന്നുവെന്നായിരുന്നു വാര്‍ത്ത. ഞാന്‍ ആകെ ഞെട്ടിപ്പോയി. വീട്ടില്‍ നിന്നും മറ്റും ഫോണ്‍ വിളികളും കൂടിയായപ്പോള്‍ ആകെ പരിഭ്രമിച്ചു.
മണിച്ചേട്ടന്‍ ഗുരുതരാവസ്ഥയിലാണെന്ന് ടിവിയിലൂടെയാണ് അറിഞ്ഞത്. അപ്പോഴേക്കും മേക്കപ്പ്മാനായ മറ്റൊരു സുഹൃത്തും വിളിച്ച് ഇക്കാര്യം പറഞ്ഞു. സംശയം തീര്‍ക്കാനായി ഞാന്‍ എന്റെ വീട്ടിലേക്ക് വിളിച്ചപ്പോഴാണ് അറിഞ്ഞത് മണിച്ചേട്ടന്‍ വെന്റിലേറ്ററിലാണെന്ന് വാര്‍ത്തയുണ്ടെന്ന്. അധികം വൈകാതെ മരിച്ചുവെന്നും. അന്ന് രാത്രി തന്നെ കാസര്‍ഗോഡ് നിന്ന് കയറി തൃശൂര്‍ മെഡിക്കല്‍ കോളെജിലെത്തി അദ്ദേഹത്തെ കണ്ടു. മരിച്ചു കിടക്കുന്ന മണിച്ചേട്ടന്റെ വസ്ത്രങ്ങള്‍ ഒരുക്കി. പിറ്റേ ദിവസം തന്നെ തിരിച്ചു പോരുകയും ചെയ്തു. ഇതാണ് നടന്നത്. മണിച്ചേട്ടന്റെ മരണവുമായി ബന്ധപ്പെട്ട് പൊലീസെന്നല്ല മറ്റാരും തന്നെ എന്നെ വിളിച്ചിട്ടില്ല.
മണിച്ചേട്ടന് പാപനാശത്തിലാണ് ആദ്യം മേക്കപ്പിടുന്നത്. ഏറ്റവുമൊടുവില്‍ തമിഴ് ചിത്രമായ ലൗഗുരുവിലും. മണിച്ചേട്ടന് മാത്രമല്ല, വേറൊരുപാട് ആളുകള്‍ക്കും പരിപാടികള്‍ക്കും മേക്കപ്പിടാന്‍ പോകാറുണ്ട്. ഒരുപാട് സ്‌നേഹമുള്ള വ്യക്തിയായിരുന്നു മണിച്ചേട്ടന്‍. നല്ല ചങ്ങാത്തം കാണിക്കുന്നയാളാണ്. പക്ഷേ ഞങ്ങള്‍ തമ്മില്‍ നിരന്തരം ഫോണ്‍ വിളിയോ മറ്റോ ഇല്ലായിരുന്നു. അദ്ദേഹത്തിന്റെ വിശ്രമ കേന്ദ്രമായ പാടിയിലൊക്കെ ഞാനും ഒരുപാട് വട്ടം പോയിട്ടുണ്ട്. അദ്ദേഹത്തിന്റെ വ്യക്തിപരമായ കാര്യങ്ങളെ കുറിച്ച് എനിക്കധികം അറിവില്ല. മണിച്ചേട്ടന്‍ ബിയര്‍ കുടിക്കാറുണ്ട്. ബിയറല്ലാതെ മറ്റൊന്നും കഴിക്കില്ലെന്നാണ് എന്റെ ഒരു അറിവ്. അതല്ലാതെ എനിക്ക് മറ്റൊന്നും അറിയില്ല. എന്നെപ്പറ്റി വന്ന തെറ്റായ വാര്‍ത്ത ആകെ വിഷമിപ്പിച്ചു. ജയരാമന്‍ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha