നിരവധി കഥാപാത്രങ്ങള്‍ക്ക് ശബ്ദം നല്‍കിയ കലാകാരന്‍ വക്കം മോഹന്റെ മരണത്തില്‍ മനംനൊന്ത് സിനിമാ ലോകം
പേരുകൊണ്ട് പ്രേക്ഷകര്‍ അധികം അറിയില്ലെങ്കിലും ശബ്ദം കൊണ്ടും കഥാപാത്ര ഗാംഭീര്യം കൊണ്ടും ശ്രദ്ധേയനായ കലാകാരന്‍ വിടചൊല്ലി. സിനിമസിരിയല്‍ ഡബ്ബിങ് ആര്‍ട്ടിസ്റ്റും നടനുമായ വക്കം മോഹന്റെ മരണം ഉള്‍ക്കൊള്ളാനാവാതെ സിനിമാസീരിയലില്‍ മേഖല. വൃക്കരോഗത്തെ തുടര്‍ന്ന് തലസ്ഥാനത്തെ സ്വകാര്യ ആശുപത്രിയില്‍ തിങ്കളാഴ്ച രാത്രി പത്തോടെയായിരുന്നു അന്ത്യം. സംസ്‌കാരം ചൊവ്വാഴ്ച ഉച്ചയ്ക്കുശേഷം വക്കത്തെ വീട്ടുവളപ്പില്‍. 55 വയസ്സായിരുന്നു.
30 വര്‍ഷമായി ഡബ്ബിങ് രംഗത്ത് സജീവമാണ്. മുന്നൂറോളം സിനിമയില്‍ ശബ്ദം നല്‍കിയിട്ടുണ്ട്. കൂടുതലും വില്ലന്‍വേഷങ്ങള്‍ക്കാണ് ശബ്ദം നല്‍കിയത്. നിരവധി സീരിയലുകളില്‍ അഭിനയിച്ചിട്ടുമുണ്ട്. ഉള്ളൂര്‍ പ്രശാന്ത് നഗറിലെ ലക്ഷ്മി ഭവനിലായിരുന്നു താമസം. വക്കം കടയ്ക്കാവൂര്‍ കൊന്നവിളാകത്ത് വീട്ടില്‍ വാസുദേവന്‍ പിള്ളയുടെയും മാധവിക്കുട്ടിഅമ്മയുടെയും മകനാണ്. ഉള്ളൂര്‍ പ്രശാന്ത് നഗറില്‍ ലക്ഷ്മി ഭവനില്‍ വാടകയ്ക്ക് താമസിക്കുകയായിരുന്നു. വൃക്കരോഗത്തെ തുടര്‍ന്ന് ദീര്‍ഘനാളായി ചികിത്സയിലായിരുന്നു. കഴിഞ്ഞ ദിവസം രാത്രി 9.30 ഓടെ അസുഖം മൂര്‍ച്ഛിക്കുകയായിരുന്നു.
ദേവന്‍, ഭീമന്‍രഘു, ക്യാപ്ടന്‍ രാജു, മോഹന്‍രാജ് എന്നിവരുടെ വില്ലന്‍ വേഷങ്ങള്‍ക്ക് ശബ്ദം നല്‍കിയിട്ടുണ്ട്. ദൂരദര്‍ശനിലെ നിരവധി സീരിയലുകളില്‍ അഭിനയിച്ചു. ഡബ്ബിങ് ആര്‍ട്ടിസ്റ്റ്‌സ് അസോസിയേഷന്‍ ഒഫ് ഫിലിം ആന്‍ഡ് ടിവി എന്ന സംഘടനയുടെ പ്രസിഡന്റായും പ്രവര്‍ത്തിച്ചിട്ടുണ്ട്. അമൃതസര്‍ മിലിട്ടറി നഴ്‌സ് രമയാണ് ഭാര്യ. ഏകമകള്‍ ഉണ്ണിമായ.
https://www.facebook.com/Malayalivartha
