മലയാളികള്‍ നെഞ്ചിലേറ്റിയ കുറ്റാന്വേഷണ സിനിമയായ സിബിഐയുടെ അടുത്ത പതിപ്പ് ഉടന്‍ വരും. ചിത്രത്തിന്റെ നാലു ഭാഗങ്ങളും വിജയമായിരുന്നു. സേതുരാമയ്യരെയോ സിബിഐ ക്കാരെയോ മലയാളി പ്രേക്ഷകര്‍ മടുത്തിട്ടില്ലെന്ന് തെളിയിക്കുന്നതാണ് കഴിഞ്ഞ ഭാഗങ്ങളുടെ വിജയങ്ങള്‍. ഇതിനകം വിജയകരമായി പൂര്‍ത്തിയാക്കിയ നാലു ഭാഗങ്ങള്‍ക്ക് ശേഷം അഞ്ചാം ഭാഗവുമായി സേതുരാമയ്യരും സംവിധായകന്‍ കെ മധുവും തിരക്കഥാകൃത്ത് എസ്എന്‍ സ്വാമിയും എത്തുന്നതായും മലയാളത്തിലെ ഏറ്റവും മികച്ച കുറ്റാന്വേഷകനും സംഘവും ഇത്തവണ അതിര്‍ത്തി കടന്നുള്ള അന്വേഷണത്തിനാണ് പോകുന്നതെന്നുമാണ് കേള്‍ക്കുന്നത്. പതിവ് പോലെ മമ്മൂട്ടി കെ മധു എസ്എന്‍ സ്വാമി കൂട്ടുകെട്ടിലെ സിനിമ അടുത്ത വര്‍ഷം ആരംഭിക്കുമെന്നും ഇത്തവണ അന്യസംസ്ഥാന കുറ്റകൃത്യത്തിന്റെ കഥയാണ് സംസാരിക്കുന്നതെന്നുമാണ് വിവരം.

എറണാകുളം, ഡല്‍ഹി, ഹൈദരാബാദ് എന്നിവിടങ്ങളിലായിട്ടായിരിക്കും സിനിമയുടെ ചിത്രീകരണം. സിനിമയുമായി ബന്ധപ്പെട്ട് സംവിധായകനും തിരക്കഥാകൃത്തും കഴിഞ്ഞയാഴ്ച മമ്മൂട്ടിയെ കണ്ടിരുന്നതായും പ്രാഥമിക ചര്‍ച്ചകള്‍ പൂര്‍ത്തിയാക്കിയതായിട്ടുമാണ് വിവരം. പുത്തന്‍പണം, ശ്യംധറിന്റെ ഒരു സിനിമ എന്നിവയ്ക്ക് പിന്നാലെയാകും മമ്മൂട്ടി സിബിഐക്കാരനാകുന്നത്. മിക്കവാറും ഫെബ്രൂവരി, മാര്‍ച്ച് അവസാനത്തോടെ ആയിരിക്കും സിനിമ തുടങ്ങുക എന്നാണ് അറിയുന്നത്.

മമ്മൂട്ടിക്ക് പുറമേ രഞ്ജി പണിക്കരും സിനിമയില്‍ ഉണ്ടാകുമെന്നാണ് അറിയുന്നത്. നായികാ പ്രാധാന്യം ഇല്ലാത്തതിനാല്‍ മുന്‍ നിര നായികമാര്‍ ആരും ഉണ്ടാകില്ല എന്നാണ് അറിവ്. അതേസമയം കഴിഞ്ഞ ഭാഗങ്ങളില്‍ ഉണ്ടായിരുന്ന മുകേഷ് ഈ ഭാഗത്തും ഉണ്ടാകുമോ ജഗതിയുടെ പകരക്കാരനായി ആരു വരുമെന്നോ തുടങ്ങിയ വിവരങ്ങള്‍ അണിയറക്കാര്‍ പുറത്തുവിട്ടിട്ടില്ല.