സുരേഷ് ഗോപി അവതാരകനായി എത്തുന്ന ജനപ്രീയ പരിപാടിയാണ് 'നിങ്ങള്‍ക്കും ആകാം കോടീശ്വരന്‍'. മഴവില്‍ മനോരമയില്‍ സംപ്രേക്ഷണം ചെയ്യുന്ന ഈ പരിപാടിയിലെ ഒരു സംഭവമാണ് ഇപ്പോള്‍ സോഷ്യല്‍ മീഡിയകളില്‍ ചര്‍ച്ചയായിരിക്കുന്നത്. ട്രോളര്‍മാര്‍ക്കും ചാകരയായിരിക്കുകയാണ് ഈ സംഭവം.

മലപ്പുറം സ്വദേശി ശ്രീജിത്ത് പങ്കെടുത്ത എപ്പിസോഡിലായിരുന്നു രസകരമായ സംഭവം. 'സിലോണ്‍, കോയിന്‍ എന്നിവ ഏതു ഭക്ഷ്യ വിവിധ തരങ്ങളാണ്'? എന്ന ചോദ്യത്തിനു നാല് ഓപ്ഷനായിരുന്നു ഉണ്ടായിരുന്നത്. പൊറൊട്ട, ദോശ, ഇഡിയപ്പം, ഇഡ്ഡലി എന്നിവയായിരുന്നു ഓപ്ഷനുകള്‍. ഓഡിയന്‍സിന്റെ അഭിപ്രായ പ്രകാരം ശ്രീജിത്ത് 'പൊറൊട്ട' എന്ന് ഉത്തരം നല്‍കുകയായിരുന്നു.

ശ്രീജിത്തിനോട് 'പൊറൊട്ട കഴിച്ചിട്ടുണ്ടോ' എന്ന് താരം ചോദിച്ചു. ഉണ്ടെന്നായിരുന്നു മറുപടി. അതോടെ 'എന്താണ് കടയില്‍ ചെന്നാല്‍ പറയുന്നത്' എന്നും സുരേഷ് ഗോപി ചോദിച്ചു. ഒട്ടും ആലോചിക്കാതെ ആയിരുന്നു മത്സരാര്‍ത്ഥിയായ ശ്രീജിത്തിന്റെ ഉത്തരം. 'പൊറൊട്ടയും ബീഫും'. ശ്രീജിത്തിന്റെ ഉത്തരം കേട്ട സുരെഷ് ഗോപി 'ഓ' എന്ന് മാത്രം പ്രതികരിച്ച ശേഷം പെട്ടന്ന് തന്നെ അടുത്ത ചോദ്യത്തിലേക്ക് കടക്കുകയായിരുന്നു.

ഏതായാലും ഇതോടെ സംഭവം സോഷ്യല്‍ മീഡിയകളില്‍ വൈറലായിരിക്കുകയാണ്. ഇന്ത്യയില്‍ നിരവധി സംസ്ഥാനങ്ങളില്‍ ബീഫ് നിരോധിച്ചിട്ടുണ്ട്. ബിജെപിയില്‍ നിന്നും പലതവണയായി ബീഫ് വില്‍ക്കുന്നതിനെതിരായ നിലപാടുകള്‍ ഉയര്‍ന്നു വന്നിട്ടുമുണ്ട്.