ഷെയിന്‍ നിഗവും നിര്‍മാതാവ് ജോബി ജോര്‍ജ്ജും തമ്മിലുള്ള തര്‍ക്കം, പ്രൊഡ്യൂസേഴ്സ് അസോസിയേഷന്റെയും അമ്മയുടെയും നേതൃത്വത്തില്‍ നേരത്തെ പരിഹരിച്ചിരുന്നു. എന്നാല്‍ വിഷയവുമിപ്പോൾ കൂടുതൽ വഷളായിരിക്കുകയാണ്. ഷെയിന്‍ നിഗം വെയില്‍ എന്ന ചിത്രത്തോട് സഹകരിക്കുന്നില്ലെന്ന് കാട്ടി നിര്‍മ്മാതാവ് ജോബി ജോര്‍ജ്ജ് നല്‍കിയ പരാതിയെ തുടര്‍ന്ന് താരത്തെ പുതിയ മലയാളം ചിത്രങ്ങളില്‍ സഹകരിപ്പിക്കേണ്ടെന്നു പ്രൊഡ്യൂസേഴ്സ് അസോസിയേഷന്റെ തീരുമാനം. എന്നാല്‍ ഇക്കാര്യം അറിഞ്ഞിട്ടില്ലെന്ന് നടന്റെ മാനേജര്‍.

വെയില്‍ എന്ന ചിത്രത്തിന്റെ ഷൂട്ടിങ് കരാര്‍ ലംഘിച്ചെന്ന ആരോപണം അടിസ്ഥാനരഹിതമാണെന്നും ഇന്ന് പുലര്‍ച്ചെ വരെ വെയിലിന്റെ ചിത്രീകരണത്തിലായിരുന്നു ഷെയ്ന്‍ എന്നും അദ്ദേഹം പറഞ്ഞു. ഷെയ്നെ അസ്വസ്ഥനാക്കാന്‍ സംവിധായകനും മറ്റ് പ്രവര്‍ത്തകരും മനപ്പൂര്‍വ്വം പ്രശ്നങ്ങളുണ്ടാക്കി. സന്തോഷത്തോടെയും സ്വതന്ത്രമായ മനസ്സോടെയും അഭിനയിക്കാന്‍ കഴിയില്ലെന്ന അവസ്ഥയില്‍ മാനസികമായി തകര്‍ന്നാണ് ഷെയിന്‍ ഇന്ന് സെറ്റില്‍ നിന്ന് മടങ്ങിയത്.

അതിനെ സെറ്റില്‍ നിന്നിറങ്ങിപ്പോയെന്നും സിനിമയുമായി സഹകരിക്കില്ലെന്ന തരത്തില്‍ വളച്ചൊടിക്കുകയാണെന്നും പ്രമുഖ മാധ്യമത്തോട് മൈക്കിള്‍ സേവ്യര്‍ വെളിപ്പെടുത്തി. 'പ്രൊഡ്യൂസേഴ്സ് അസോസിയേഷന്റെ ഭാഗത്തുനിന്ന് ഔദ്യോഗികമായ യാതൊരു അറിയിപ്പും ഞങ്ങള്‍ക്ക് ലഭിച്ചിട്ടില്ല. വാര്‍ത്തകളില്‍ നിന്നാണ് ഇക്കാര്യം അറിഞ്ഞത്. ഇന്ന് പുലര്‍ച്ചെ 2.30 വരെ വെയിലിന്റെ ചിത്രീകരണത്തിലായിരുന്നു ഷെയിന്‍. 15 ദിവസത്തെ ഡേറ്റ് ആണ് ചിത്രത്തിനായി നല്‍കിയിരുന്നത്. ആവശ്യപ്പെട്ടതിലും അധികം ഷോട്ട് ചെയ്തിട്ടുണ്ടെന്നല്ലാതെ ഒരു ഷോട്ട് പോലും ഷെയ്ന്‍ കുറച്ച്‌ ചെയ്തിട്ടില്ല.
പറഞ്ഞതിലും അധികസമയത്തേക്ക് ഷൂട്ടിങ് നീട്ടിക്കൊണ്ടുപോകുക, നന്നായി ചെയ്താലും ശരിയായിട്ടില്ല എന്ന് പറഞ്ഞ് റീടേക്ക് പോകുക സെറ്റില്‍ അനാവശ്യ പ്രശ്നങ്ങളുണ്ടാക്കുക ഇതെല്ലാം പതിവായിരുന്നു. ലൈറ്റ് സെറ്റ് ചെയ്യുന്ന സമയത്ത് ഷെയ്ന്‍ വിശ്രമിച്ചാലോ പാട്ട് കേട്ടാലോ ഒക്കെ വലിയ പ്രശ്നമാക്കുന്ന അവസ്ഥയുണ്ടായിരുന്നു. ഷെയ്ന്‍ ഒരു കലാകാരനല്ലേ? സംവിധായകന്‍ പറയുന്ന വരച്ച വരയില്‍ നിന്ന് അഭിനയിക്കണം എന്ന് പറയുമ്ബോഴുണ്ടാകുന്ന പ്രശ്നങ്ങള്‍ ഉണ്ടായിരുന്നു.

സന്തോഷവും സമാധാനവും ഇല്ലാത്ത സാഹചര്യത്തില്‍ ഇനി അഭിനയിക്കാന്‍ കഴിയില്ലെന്ന അവസ്ഥയില്‍ മാനസികമായി തകര്‍ന്നാണ് ഷെയിന്‍ ഇന്നത്തെ ഷൂട്ടിങ് പൂര്‍ത്തിയാക്കി സെറ്റില്‍ നിന്ന് മടങ്ങിയത്. അത് അവര്‍ പറയുംപോലെ സെറ്റില്‍ നിന്ന് ഇറങ്ങിപ്പോന്നതല്ല. ഷെയിന്‍ പോയതിന് ശേഷം എന്താണ് അവിടെ സംഭവിച്ചത് എന്നറിയില്ല'- മൈക്കിള്‍ പറഞ്ഞു.