റിലീസിനു മുൻപ് എത്തിയ ട്രെയ്‍ലറും പാട്ടുകളും അടക്കമുള്ള പ്രൊമോഷണൽ മെറ്റീരിയലുകളിലൂടെ സമീപകാലത്ത് ഏറ്റവും വലിയ ഹൈപ്പ് സൃഷ്ടിച്ച ചിത്രമാണ് തല്ലുമാല. ടൊവിനോ ആരാധകർക്കും മേക്കിംഗ് സ്റ്റെെലിൽ പരീക്ഷണം ഇഷ്ടപ്പെടുന്നവർക്കും ആഘോഷമാക്കാനാകുന്ന ചിത്രം കൂടിയാണ് തല്ലുമാല. വ്യത്യസ്തമായ വേഷപ്പകർച്ചയിൽ ടൊവിനോ തോമസ് എത്തുന്ന ചിത്രത്തിൽ കല്യാണി പ്രിയദർശനാണ് നായികാ കഥാപാത്രത്തെ അവതരിപ്പിക്കുന്നത്. ടെെറ്റിൽ പോലെ തന്നെ ആദ്യം മുതൽ അവസാനം വരെ തല്ലാണ്. കഥയും കഥാപാത്രങ്ങളും എല്ലാം ഒത്തുചേരുന്നതും തല്ലുകളിൽ നിന്നാണ്. തല്ലിനെ ചിത്രത്തിലെ ഒരു കഥാപാത്രമായി തന്നെ വേണമെങ്കിൽ പറയാം. പ്രത്യേകിച്ച് ലക്ഷ്യബോധമൊന്നുമില്ലാതെ നടക്കുന്ന പൊന്നാനിയിലെ ഒരു കൂട്ടം ഫ്രീക്കന്മാരായ യുവാക്കളുടെ കഥയാണ് തല്ലുമാല. തല്ലിന് പുറമെ സാഹചര്യത്തിന് അനുയോജ്യമായ തമാശകളും ഗാനങ്ങളുമാണ് തല്ലുമാലയിലുള്ളത്. സംഗീതത്തിന്റെയും എഡിറ്റിംഗിന്റെയും സാദ്ധ്യതകൾ ഇത്രത്തോളം പരീക്ഷിച്ച ഒരു മലയാള സിനിമ സമീപ ഭാവിയിൽ പുറത്തിറങ്ങിയിട്ടില്ല.

നിഷാദ് യൂസഫ് ആണ് എഡിറ്റിംഗ്. വിഷ്‌ണു വിജയ് ഒരുക്കിയ ഗാനങ്ങളും പശ്ചാത്തല സംഗീതവും മികവ് പുലർത്തി. ജിംഷി ഖാലിദിന്റെ ഛായാഗ്രഹണവും ഗംഭീരമായി.ചിത്രത്തിലുടനീളമുള്ള തല്ലുകൾ ഗംഭീരമായി ഒരുക്കിയതിൽ ആക്ഷൻ കൊറിയോഗ്രാഫർ പ്രത്യേക കെെയടി അർഹിക്കുന്നുണ്ട്. ടൊവിനോ ഉൾപ്പടെയുള്ള കഥാപാത്രങ്ങളുടെ ആക്ഷൻ രംഗങ്ങളിലെ പ്രകടനവും ചിത്രത്തിന് ഗുണം ചെയ്‌തു. മുഹ്‌സിന്‍ പരാരിയും അഷറഫ് ഹംസയും ചേര്‍ന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ആഷിഖ് ഉസ്‌മാൻ പ്രൊഡക്ഷൻസിന്റെ ബാനറിൽ ആഷിഖ് ഉസ്‌മാനാണ് ചിത്രം നിർമ്മിച്ചിരിക്കുന്നത്. ആക്ഷൻ രംഗങ്ങളാൽ സമ്പന്നമായ ഒരു കളർഫുൾ ഫൺ റെെഡാണ് ചിത്രം. എന്നാൽ എല്ലാത്തരം പ്രേക്ഷകരെയും ഒരുപോലെ തൃപ്‌തിപ്പെടുത്താൻ സാധിക്കുന്നില്ല.