ആക്ഷേപഹാസ്യത്തിൽ പൊതിഞ്ഞ ഒരു സോഷ്യോ- പൊളിറ്റിക്കൽ ഡ്രാമ ചിത്രം കുഞ്ചാക്കോ ബോബനെ കേന്ദ്രകഥാപാത്രമാക്കി രതീഷ് ബാലകൃഷ്ണ പൊതുവാൾ സംവിധാനം ചെയ്ത ‘ന്നാ താൻ കേസ് കൊട് മികച്ച പ്രതികരണത്തിലൂടെ മുന്നേറുകയാണ്. ഇപ്പോഴിതാ, പ്രേക്ഷകരുടെ ആവശ്യമനുസരിച്ച് സിനിമയുടെ പ്രദർശനം വർദ്ധിപ്പിച്ചിരിക്കുകയാണ്. കാണികളുടെ വർദ്ധനവ് അനുസരിച്ചാണ് കൂടുതൽ സ്‌ക്രീനുകളിൽ സിനിമ പ്രദർശിപ്പിക്കുന്നത്. ആദ്യ ദിനത്തിൽ1.25 കോടിയും രണ്ട് ദിവസം കൊണ്ട് 2. 71 കോടി രൂപയും ചിത്രം കളക്ട് ചെയ്തുവെന്നാണ് റിപ്പോർട്ട്.

ആദ്യം മുതൽ അവസാനം വരെ പ്രേക്ഷകരെ രസിപ്പിക്കുന്ന ദൃശ്യവിരുന്നാണ് സംവിധായകൻ ഒരുക്കിയിരിക്കുന്നത്. കാസർക്കോടാണ് ചിത്രത്തിന്റെ പശ്ചാത്തലം. അല്ലറ ചില്ലറ മോഷണങ്ങളൊക്കെ നടത്തുകയും പലയാവർത്തി പൊലീസ് പിടിയിലാവുകയും ചെയ്ത ആളാണ് കഥാനായകനായ കൊഴുമ്മൽ രാജീവൻ. ഹോസ്‌ദുർഗിൽ നടക്കുന്ന ഒരു മോഷണത്തിനിടെ പൊലീസിൽ നിന്ന് രക്ഷപ്പെട്ടോടുന്ന രാജീവൻ ചെന്നെത്തുന്നത് ചിമേനിയിൽ ആണ്. ആ നാട്ടിൽ കണ്ടുമുട്ടിയ ഒരു പെൺകുട്ടിയുമായി അയാൾ പ്രണയത്തിലാവുകയും അവൾക്കൊപ്പം ജീവിച്ചുതുടങ്ങുകയും ചെയ്യുന്നു. മോഷണമെല്ലാം നിർത്തി മനസമാധാനത്തോടെ ജീവിക്കുന്നതിനിടയിൽ അപ്രതീക്ഷിതമായി രാജീവന്റെ മേൽ ഒരു മോഷണകുറ്റം ആരോപിക്കപ്പെടുകയാണ്. ആ​ കേസിൽ താൻ നിരപരാധിയാണെന്ന് തെളിയിക്കാൻ രാജീവൻ നടത്തുന്ന നിയമപോരാട്ടമാണ് ചിത്രം.

വിചിത്രമെന്നു തോന്നുന്ന ആ കേസിന് പോകപോകെ വലിയ രാഷ്ട്രീയമാനങ്ങൾ കൈവരികയാണ്. ഇന്നാട്ടിലെ നിയമ വ്യവസ്ഥിതിയോടാണ് സാധാരണക്കാരനായ രാജീവൻ പോരാടുന്നത്. ഒരു കോർട്ട്റൂം ഡ്രാമ കൂടിയാണ് ‘ന്നാ താൻ കേസ് കൊട്’. എന്നാൽ ഒട്ടും ബോറടിപ്പിക്കുന്നില്ല കോടതി മുറിയിലെ രംഗങ്ങളൊന്നും. സാഹചര്യങ്ങൾക്ക് അനുസൃതമായ തമാശകളും നർമ്മമുഹൂർത്തങ്ങളുമൊക്കെ ധാരാളമുണ്ട് ചിത്രത്തിൽ. കാസർഗോഡ് ഭാഷയെ വളരെ ബുദ്ധിപരമായി തന്നെ ചിത്രത്തിലേക്ക് കൊണ്ടുവരാനും സംവിധായകനു സാധിച്ചിട്ടുണ്ട്.