പ്രശസ്ത സംവിധായകനായ പ്രിയദര്‍ശന്റെയും നടി ലിസിയുടെയും മകളാണ് കല്യാണി. ന്യൂയോര്‍ക്കിലെ പഠനത്തിന് ശേഷം നാട്ടില്‍ തിരിച്ചെത്തിയ കല്യാണി ഇപ്പോള്‍ സിനിമാ മേഖലയില്‍ സജീവമാണ്. വിക്രമും നയന്‍കാരയും കേന്ദ്ര കഥാപാത്രങ്ങളെ അവതരിപ്പിച്ച ഇരുമുഖനില്‍ കല്യാണി സംവിധാന സഹായിയായി പ്രവര്‍ത്തിച്ചിരുന്നു. തെലുങ്ക് ചിത്രത്തിലാണ് കല്യാണി ആദ്യമായി അഭിനയിക്കുന്നത്. ഹൃദയം, ബ്രോ ഡാഡി, മരയ്ക്കാര്‍ അറബിക്കടലിന്റെ സിംഹം എന്നീ ചിത്രങ്ങളില്‍ കല്യാണി ശ്രദ്ധേയമായ പ്രകടനം കാഴ്ചവെച്ചിരുന്നു. ടൊവിനോ തോമസ് നായകനാകുന്ന തല്ലുമാലയാണ് കല്യാണിയുടെ ഏറ്റവും പുതിയ ചിത്രം. ടൊവിനോയും കല്യാണിയും ആദ്യമായി ഒന്നിക്കുന്ന ചിത്രമാണ് തല്ലുമാല. ഓഗസ്റ്റ് 12ന് തിയേറ്ററുകളില്‍ എത്തിയ ചിത്രം മികച്ച പ്രേക്ഷക പ്രതികരണം നേടി വിജയകരമായി പ്രദര്‍ശനം തുടരുകയാണ്.

ഇപ്പോഴിതാ ഒരു അഭിമുഖത്തിൽ പ്രണവിനെ കുറിച്ച് തുറന്ന് പറയുകയാണ് കല്യാണി. പ്രണവിനൊപ്പമുള്ള ഷൂട്ടിങ്ങിലെ രസകരമായ അനുഭവങ്ങളും പ്രണവിന്റെ സ്വഭാവത്തെക്കുറിച്ചുമാണ് കല്ല്യാണി പറഞ്ഞത്. ഷൂട്ടിങ്ങിന് വരുമ്പോള്‍ അസിസ്റ്റന്റിന് ഫാന്‍ പിടിച്ച് കൊടുക്കാന്‍ തയ്യാറായിട്ടാണ് പ്രണവ് വരുന്നതെന്ന് കല്യാണി പറഞ്ഞു. ഷൂട്ടിന് പോകുമ്പോള്‍ തനിക്ക് പോലും മൂന്ന് അസിസ്റ്റന്‍സ് ഉണ്ടാകും. കാരണം ഹെയര്‍, മേക്കപ്പ്, കോസ്റ്റ്യൂം എന്നിവ പെണ്‍കുട്ടികള്‍ക്ക് ആണ്‍കുട്ടികളെക്കാള്‍ കൂടുതലാണെന്ന് കല്യാണി കൂട്ടിച്ചേര്‍ത്തു. മരക്കാറിന്റെ ഷൂട്ടിന് പോയപ്പോള്‍ താന്‍ വലിയ ലഹങ്ക പോലെയുള്ള വസ്ത്രമാണ് ധരിച്ചിരുന്നതെന്ന് കല്യാണി പറഞ്ഞു. ലഹങ്കയുടെ ഭാരം വെച്ച് നടക്കാന്‍ സാധിക്കാത്തതിനാല്‍ അത് പിടിക്കാന്‍ വേണ്ടി രണ്ടുപേരെ കൂടെ കൊണ്ടുപോകെണ്ട അവസ്ഥ വന്നിരുന്നു. എന്നാല്‍ പ്രണവാണെങ്കില്‍ അസിസ്റ്റന്റിന് ഫാന്‍ പിടിച്ചുകൊടുക്കാന്‍ തയ്യാറായ കൂട്ടത്തിലാണെന്നും കല്യാണി വ്യക്തമാക്കി.
പ്രണവുമായുള്ള വിവാഹവുമായി ബന്ധപ്പെട്ട് പ്രചരിച്ച ഒരു വ്യാജ വാര്‍ത്തയുടെ ലിങ്ക് പ്രിയദര്‍ശന് അയച്ചുകൊടുത്തിരുന്നുവെന്ന് കല്യാണി പറഞ്ഞു. 'ഹഹഹ വെല്‍ക്കം ടു ഇന്‍ഡസ്ട്രി' എന്നായിരുന്നു പ്രിയദര്‍ശന്റെ മറുപടിയെന്നും കല്യാണി പറഞ്ഞിരുന്നു.